VINAKUSOLOKA MUKAYE
Mijimbu Yize Yahanjika haAfrica
Mauka navatu vavavulu vali lika nakuzata nangolo mangana chiyoyelo chamuAfrica chiwahe. Oloze mulifuchi kana muchili lika ukalu waunene.
Kujiha Vasoto
Mumwaka wa 2013, mulifuchi lyaSouth Africa vajihile vasoto vakuheta ku 1,004 chakuhona lisesa lyakufuma kufulumende, hakuvesekesa navasoto 13 vaze vajihile mumwaka wa 2007. Numba tuhu echi chalingishile jimbinga javasoto jivule chikuma, oloze vatu vapwile nakujitonda chikuma mwomwo jatwama napezo chikuma kuhambakana napalata. Lumbinga lumwe vanahase kululanjisa kafwe K30, 000, 000
VYUMA MWATELA KUSHINGANYEKAHO: Kutala jifulumende jinahase kukumisa vilinga vyavipi tahi?—Yelemiya 10:23.
Maswekeza aze Kavambululako
Liuka lyaTransparency International lyambile ngwalyo mafuchi amavulu akumututuko wakuAfrica akiko ali nakwazana chikuma mumaswekeza mukaye kosena. Kaha vatu vakuheta kujipaseti 90 vaze veji kumonanga vatu vali nakulihana maswekeza kaveshi kuvambululako. Muka-kuhanjikilako liuka lyaKenya chapter ambile ngwenyi: “Vatu kavafwelela ngwavo jifulumende javo jinahase kulingako vyuma vimwe mangana kulihana maswekeza chikeheko.”
VYUMA YAHANJIKA MBIMBILIYA: “Maswekeza eji kuvawuvisangava vanatono kumeso.”—Kulovoka 23:8.
Mafuchi amuAfrica Atela Kuzachisa Internet
Liuka lyaInternational Telecommunication Union lyasakile vatu jipaseti kafwe 20 vamuAfrica vazachisenga jino Internet kusongo yamwaka wa 2014. Vaka-kuzachisa jishinga jaInternet vamuAfrica vali nakuvula chikuma mukaye kosena.
