“Ngwapwile namasepa jami vamapwevo vavali vaze valingililenga vyuma hamwe, oloze ami vangusezelengaho. Kakavulu ngwevwilenga vyuma vyamwaza vize vashimutwililenga. Likumbi limwe ngwatumine shinga kuzuvo yava masepa jami vavali, kaha omu kwetavile mutu weka, ngwevwile ava masepa jami vali nakuhanjika nakusehela mwishi. Ngwevwile vyuma vyamwaza vapwile nakushimutwila, ngachize echi changulishile ngwivwenga uli chikuma.”—Maria. *

Kutala mwevwaho lyehi uli tahi? Nge mukiko, kaha Mbimbiliya yinahase kumikafwa. Chatete, talenu vyuma vimwe vize mwatela kutachikiza kutalisa kuuli.

Vatu vosena veji kwivwanga uli lwola lumwe. Navatu vaze vaya fuma veji kwivwanga uli. Mwomwo ika? Mwomwo keshi nge kuvula chamasepa chikiko cheji kuhonesanga uliko, oloze vilinga vyamasepa kana. Mutu uze aya fuma nahase kupwa navatu vavavulu, oloze masepa vamwenemwene vauchi, ngachize nahase kufwanga uli.

Uli unahase kumilingisa muhone kupwa vakulikangula kumujimba. Vaka-kuhehwojola vaze vakekesele havyuma 148 vize valinangwile vakukulwile ngwavo, kuhona kupwa namasepa cheji kulingisanga vatu kufwa washi. Kaha nawa chapwa chachipi “ngana muze chapihya kutohwa chikuma nakunwa makanya.”

Uli unahase kumizeyesa. Echi chinahase kumilingisa mwitavile kala mutu uze mwasaka mulikwate nenyi usepa. Mukweze walunga walijina lyaAlan ambile ngwenyi, “Nge uli unakukwate, unahase kusaka kachi uwane wakulihanjikisa nenyi, nakuputuka kushinganyeka ngwove kupwa namutu wakulihanjikisa nenyi chinawahe kuhambakana kufwa uli. Kahechi chinahase kukunehela ukalu.”

Makina amakumbi ano kaweshi kuhasa kuhonesa uliko. Mukweze wapwevo walijina lyaNatalie ambile ngwenyi, “Numba tuhu halikumbi limwe ngweji kutuminanga vatu vavavulu mijimbu hashinga, oloze ngweji kufwanga lika uli.” Mukweze walunga walijina lyaTyler naikiye ambile ngwenyi, “Kulitumina mijimbu hashinga chinafwane nge kunwa milava kaha, oloze kushimutwila namutu meso nameso chinafwane nge kulya shima. Milava yapwa yika-kujiha zala, oloze shima yapwa yika-kwikuchisa.”

Lingenu vyuma vyamwaza. Chakutalilaho, achishinganyekenu munayi hainternet nakutala jifwato jamasepa jenu jize najivasolola vali kuchiwanyino kuze kavamilanyineko. Halwola kana munahase kushinganyeka ngwenu vanamiliula, chipwe kuvamona mujila yamwaza. Hakuwana nge kamwatachikijile mashina namasongoko, kamwatela kuvashinganyekela mujila yayipiko. Oloze mwatela kushinganyeka mujila yamwaza ovyo vanahonena kumilanya. Chuma cheji kuminehelanga uli shina muchima wenu keshi nge masepa jenuko. —Lushimbi lwamuMbimbiliya: Vishimo 15:15.

Lihendenu kumuchima wakutaka vyuma. Nge muli nakufwa uli, munahase kuputuka kushinganyeka ngwenu ‘Vatu kaveshi kungulanyako’ chipwe ngwenu ‘Kavangusakako.’ Oloze vishinganyeka kana navilingisa mufwenga chikuma uli. Vishinganyeka vyangana vinahase kumilingisa muputuke kushinganyeka ngwenu vatu kavamisakako, nakulihandula kuvakwenu, nakumilingisa mufwenga uli.—Lushimbi lwamuMbimbiliya: Vishimo 18:1.

Likwatenu usepa navatu vaze vanakolo kumihambakanenu. Mbimbiliya yahanjika hachiyoyelo chaNdavichi uze apwile mukweze omu alikwachile usepa naYonatane uze amuhambakanyine namyaka 30 yakusemuka. Numba tuhu valihandunwine mumyaka yakusemuka, oloze Ndavichi naYonatane vapwile nausepa wakukola. (Samwele 1, 18:1) Nayenu munahase kulikwata usepa navaze vanakolo. Mwanapwevo wamyaka yakusemuka 21 walijina lyaKiara ambile ngwenyi, “Ngunamono jino kulema chatwama hakupwa namasepa vakukola. Nguli namasepa vaze vanakolo chikuma kunguhambakanami, kaha ngweji kwivwanga kuwaha havilinga vyavo vyamwaza nakujikiza chavo kushipilitu.” —Lushimbi lwamuMbimbiliya: Yopa 12:12.

Kutwama kwaukawenu chinahase kumikafwa. Vatu vamwe veji kwivwanga uli nge vali kwaukawavo. Oloze echi kachatela kumivwisa uliko. Chakutalilaho, Yesu ayoyelenga kanawa navatu, kaha nawa lwola lumwe atwaminenga kwaukawenyi. (Mateu 14:23; Mako 1:35) Omu mukiko mwatela kupwa nayenu. Muchishishisa chakumona kutwama kwaukawenu mujila yayipi, oloze sakwililenunga vyuma vyamwaza vize amihana Yehova. Echi nachilingisa vakwenu vamisake chikuma.—Vishimo 13:20.