Mumyaka yakalinwomu, chiyoyelo chamujitanga jakumafuchi akumulauko chinalumuka mwamunene. Lwola lumwe visemi vapwilenga nangolo hali vana vavo, kaha nawa vana vakavangijilenga vyuma vavalwezelenga visemi javo. Oloze makumbi ano mujitanga jimwe vyuma vinalumuka. Chakutalilaho, talenu vyakutalilaho vinakavangizaho vyakusolola ukalu uze uli mujitanga.

• Kanyike umwe walunga wamyaka yakusemuka 4 ali nanaye kuchitanda, kaha mwolovela kamunyau kakuhemesa. Naye mwamukanyisa nakumwamba ngwenyi, “Ngwetu uli navyakuhemesa vyavivulu kwimbo?” oloze himwaliveya hakuhanjika mazu kana. Kaha uze kanyike ngwenyi, “Ngwetu ngunayisake!” Naye himwamwecha kuchina mwalila.

• Chisemi umwe ali nakuhanjika namukwavo mukulwane, kaha mwanenyi wapwevo wamyaka yakusemuka 5 mwamuvatwijiza nakutambakana ngwenyi, “Ngunazeye, nguli nakusaka kuya kwimbo!” Kaha uze chisemi mwecha kuhanjika nakufukama kuli uze mwanenyi nakumulweza nalizu lyalivwovu ngwenyi: “Nguvandamineko chindende natuya, Mwanami.”

• Kanyike walunga walijina lyaJames wamyaka yakusemuka 12 vanamuvangijikila ngwavo natenukila mulongeshi wenyi. Kaha ise yaJames mwapihilila namulongeshi muchishishisa chakupihilila namwanenyi. Jino mwamba naJames ngwenyi, “Lwola lwosena asaka kukuyanjisa. Nanguya nakumwambulula kuvakwavo valongeshi.”

Vyakutalilaho kana vanalingi vyakufwanyisako kaha. Evi vyakutalilaho vinasolola ukalu uli mujitanga muze visemi vali nakwechelelanga vana vavo vakole namalandulu, nakulinga vyuma vize navasaka vana vavo, “nakuvahakwilanga” havyuma vyavipi vize navalinga. Mukanda waThe Narcissism Epidemic wahanjika ngwawo, “Visemi vavavulu vali nakuvatambula jingolo kuli vana vavo. Mumyaka yakalinwaha yinahichimo, vana vatachikijilenga ngwavo visemi vakiko vatela kuvayula.”

 Enga, visemi vavavulu veji kukilikitanga kunangula vana vavo vyuma vyamwaza, hakuvasolwela chakutalilaho chamwaza, nakuvatenukila mujila yalikoji. Chipwe ngocho, visemi vaze vatachikiza nganyo yakulinga vyuma kanevi “veji kuhingikanga chisemwa” kweseka namukanda uze tunavuluka kumaputukilo.

Uno ukalu kana unatoho ngachilihi? Kutala visemi vali nakulela kanawa vana vavo tahi?

Vatu vamwe veji kwambanga ngwavo kukuma changolo javisemi chaputukile muji 1960. Omu vasachiteta hundu vakolezezele visemi vapwenganga namuchima wauvwovu hakulela vana vavo, vambile ngwavo: ‘Pwako wamuvwovu, keshi nge umuka-kutenukako. Kwalisa chinawahe kuhambakana kuzangamisa. Muchishishisa chakutala hatutenga twavana venu, talenunga havyuma vyamwaza vize vali nakulinga.’ Muchishishisa chakupezalisa kanawa kusangejeka nakwolola, vasachiteta hundu vamwene ngwavo kutenukilanga vana chinahase kuvalingisa vapwenganga nakulundundu navisemi javo.

Mumyaka yakalinwaha, vasachiteta hundu vanapunga nakuvilika kuvatu muchima wavo wakulimona vavene kupwa nge vapwa vamangana. Chapwile kwijiva nge vanawane jino mangana akuvakafwa mwakulelela kanawa vana, vambilenga ngwavo: Lingisa vana vove valivwe kupwa vavalemu. Enga, chapwa chamwaza kunangula vana venu valifwelelenga vavene. Oloze muchima wakulifwelela mutu ivene wahambakanyine haseteko mwomwo valwezelenga visemi ngwavo: ‘Lihendenunga kukuzachisa mazu amapi akufwana nge pimbi nakupihya.’ ‘Twalenuho lika kulwezanga vana venu ngwenu vapwa vavalemu, kaha nawa vanahase kulinga vyuma vyakulumbunuka.’ Chapwile kwijiva nge vambile ngwavo kwivwa kuwaha chapwa chachilemu chikuma kuhambakana kupwa namuchima wamwaza.

Kutwala muze, vatu vamwe vambile ngwavo kulifwelela mutu ivene chinalingisa vana kupwa nangolo jakulinga vyuma kwijiva nge lifuchi likiko lyeji kuvalelanga. Mukanda waGeneration Me wahanjika ngwawo muchima kana unalingisa vakweze vavavulu “vahone kupwa vakulizanga naukalu wamukuyoya.” Chisemi umwe walunga ahanjikile mazu amumukanda  kana ngwenyi, “Makumbi ano vatu kumilimo kavasaka mutu uze alimona livene kupwa wamulemuko. . . . Nge musoneka mukanda wamazu amapi nakuutwala kuli mukulwane wove wamilimo, keshi kwamba ngwenyi, ‘Unalingi kanawako.’ Chochimwe nawa, kulela vana mujila yayipi nachivahungumwisa.”

Hamyaka yayivulu yinahichi kunyima visemi vanalelenga vana vavo mujijila jakulisezaseza. Ronald G. Morrish uze apwa muka-kusoneka mijimbu ambile ngwenyi: “Jijila jakulelelamo vana jili nakwalumuka, echi chili nakwalumuna nachiyoyelo chamakumbi ano.” * Kaha nawa chapwa chachashi visemi kupwa “vakuhungwomwoka noku noku kwijiva nge namakimba, nakupekwomwoka noku noku napeho yakunangula yosena.”—Wavaka-Efwesu 4:14.

Enga, kuhona kulela kanawa vana chenyekelenga vana. Chinazeyesa visemi nakulingisa vana vahone kupendamina hali visemi mangana vasakule kanawa vyakulinga mukuyoya.

Uno kuliko jila yeka yamwaza yakulelelamo vana tahi?