CHIHANDE CHACHINENE | KUTALA VISEMI VALI NAKUNANGULA KANAWA VANA VAVO TAHI
Kwolola Chize Nachikafwa Vana
CHAKUZENEKA KUKAKASANA, mulimo wakulela vana wapwa waukalu. Oloze kuhona kwolola vana cheji kukaluhwisanga chikuma mulimo kana. Mwomwo ika? Mwomwo nge visemi navahona kwolola vana vavo, (1) kaha navalihita, kahechi chinahase kuzeyesa visemi, (2) visemi navahona kunangulanga vana vavo lwola lwosena, nakuluwanganyisa jino vana.
Oloze kwolola vana mujila yamwaza chinahase kukafwa vana vapwenga navishinganyeka navilinga vyamwaza. Kaha nawa nachikafwa vana vakapwe vakukingiwa omu navakakola nakulimanyina jino vavene. Uno kulihi munahase kuwana jindongi jize najimikafwa mwolole kanawa vana venu?
Nganyo Yize Yatwama haJindongi jamuMbimbiliya
Vaka-kusoneka mangazini yino Vinjiho jaYehova vafwelela ngwavo mazu amuMbimbiliya, “anawahila kunangula, nakuhuhumuna, nakwolola, nakulongesa kana chili mukwoloka.” (WaChimoteu 2, 3:16) Mbimbiliya kayapwa kaha mukanda wakukafwa visemi mwakulelela vanako; oloze jindongi jatwamamo jeji kukafwanga jitanga. Talenu vyakutalilaho vino.
MBIMBILIYA YAHANJIKA NGWAYO: “Uleya unapu wakukashila mumuchima wakanyike.” —Vishimo 22:15.
Numba tuhu vana vanahase kupwa namuchima wamwaza, oloze vanahase kupwa navilinga vyauleya. Ngachize, vana vasaka kuvolola. (Vishimo 13:24) Kutachikiza chishina kana nachimikafwa mutesemo mulimo wenu wakupwa muvisemi.
MBIMBILIYA YAHANJIKA NGWAYO: “Kanda ukana kuzangamisa mwanoveko.”—Vishimo 23:13.
Kamwatela kwivwa woma ngwenu kupezalisa kanawa vyuma hakwolola vana venu nachivahungumwisa chipwe kumilamina kokoko. Kunangula vana venu muzangi, nachivakafwa valinangule kupwa namuchima wakulikehesa nakwitavila kuvakafwa—chuma chize nachikavakafwa omu navakakola.—WavaHepeleu 12:11.
MBIMBILIYA YAHANJIKA NGWAYO: “Vyeshovyo mwakuva mutu, vikiko vene mwakavyaha nawa.”—Wavaka-Ngalesha 6:7.
Visemi vasaka kukinga vana vavo. Olozenyi vatela kupezalisa kanawa vyuma. Nge mulongeshi chipwe mukulwane weka mwamilweza ngwenyi mwanenu ali namangana amapi, kaha kamwatela “kumuhakwilako.” Mwatela kutachikiza ngwenu vatu kana vali nakumikafwako. Echi nachimikafwa munangule vana venu vakavangizenga jishimbi jamukuyoya, najishimbi jenu.—Wavaka-Kolose 3:20.
MBIMBILIYA YAHANJIKA NGWAYO: “Mwana vaneche tuhu mwakamwivwisa naye sonyi.”—Vishimo 29:15.
Sololenunga zangi, kanda kuzeyako, nakupwa muvavavwovu
Numba tuhu visemi kavatela kuyanjisa vanako, oloze kavatela nawa kulela vana vavo ndendekako. Mukanda waThe Price of Privilege wahanjika ngwawo, “Vana vaze valela ndendeka kavatachikiza ngwavo vakulwane hembo vakiko vatwama nangoloko.” Nge kamweshi kusolola ngolo mwatwama najoko, kaha mwanenu nahase kushinganyeka ngwenyi ngolo kana jili kuli ikiye. Echi nachimulingisa jino alinge vyuma vize navimwingisa muukalu, hamwe nayenu.—Vishimo 17:25; 29:21.
MBIMBILIYA YAHANJIKA NGWAYO: ‘Lunga . . . mwakalipanjika napwevo lyenyi, kahava vavali hinavapwanga mujimba umwe kaha.’—Mateu 19:5.
Mbimbiliya yahanjika ngwayo lunga napwevo vatela kulimbata shimbu kanda vaseme vana nakutwalaho kupwa hamwe nge vana vavo vanakolo nakulimanyina. (Mateu 19:5, 6) Echi nachilumbununa nge, chatete munengila muulo—kaha chamuchivali munapu muvisemi. Nge chishina kana kamweshi kuchimona kupwa chachilemuko, kaha mwanenu ‘mwashinganyeka mweka mwakuhambakanomu mwamutela kushinganyekako.’ (Wavaka-Loma 12:3) Tanga yize yapendamina havana yeji kuzeyesanga ulo.
Vyuma Vize Navikafwa Visemi
Hakusaka mutesemo mulimo wenu wakupwa muvisemi, vyuma namwolola vana venu vyatela kupendamina hajindongi jino.
Sololenunga zangi. “Kanda muvasowangizanga vana venuko, kuchina navakahomba.”—Wavaka-Kolose 3:21.
Kanda kuzeyako. “Lizu lyenu lyakwamba ngwenu ‘eyo’ lipwenga vene eyo, kaha ‘nduma,’ lipwenga vene nduma.”—Mateu 5:37.
Pwenunga muvavavwovu. “Nangukakuzangamisa mwachiyulo.”—Yelemiya 30:11. *
^ par. 21 Nge muli nakusaka mijimbu yikwavo, kaha yenu hajw.org. Talenu HAVYUMA YANANGULA MBIMBILIYA > VAKA-KULIMBATA & VISEMI mangana muwane mitwe yakufwana nge “Kwolola Vana,” “How to Deal With Tantrums,” “Nangulenu Vana Venu Vilinga Vitoma,” “naHow to Discipline Your Teenager.”
