VYUMA VEJI KUHANJIKANGA VATU

Vatu vamwe veji kushinganyekanga ngwavo vanahase kuzachisa tunyama mweshomwo vanasakila. Kaha veka nawa ngwavo tunyama twatela kuvamona ngana muze twamona vatu.

• Lunga umwe uze alinangula chikuma vyatunyama ambile ngwenyi, “katwatela kuyanjisanga tunyamako.” Ambile nawa ngwenyi: “Katwatela kumonanga tunyama mujila yayipiko.”

• Oloze pwevo wajimbongo chikuma walijila lyaLeona Helmsley omu afwile asezelele kawa kenyi jimbongo jakuheta kujimiliyoni $12 nakusoneka mukanda ngwenyi omu kawa kenyi mwakafwa vatela kukamufunda kwakamwihi naikiye.

Shinganyekenu hachihula chino: Mukushinganyeka chenu ngwenu tunyama twatela kuvamonanga mujila muka?

VYUMA YAHANJIKA MBIMBILIYA

Yehova Kalunga uze atengele kuyoya alwezele vatu ngwenyi “Twamenunga nawangana wavaishi vamukalungalwiji, natujila vamwilu, navaka-kuyoya vakutambuka hamavu vosena.” (Kuputuka 1:28) Echi chili nakusolola nge Kalunga amona vatu kupwa vavalemu kuhambakana tunyama.

Mazu kana awa vawakundwiza kumazu amalemu amuchisoneka chakavanga. Mbimbiliya yahanjika ngwayo “Kalunga atangile mutu wakutambula kuli Ikiye. Amutangile wakutambula kuli Kalunga. Avatangile nalunga napwevo.”—Kuputuka 1:27.

Hakuwana nge etu vatu vatutengele ‘muchifwanyisa chaKalunga,’ ngachize twapwa tuvakulipwila mujila tweji kusolwelangamo vilinga vyaKalunga, vyakufwana nge mangana, chiyulo chamwaza, nazangi. Vatu vasemuka nauhashi wakulinga vyuma vyamwaza vyakushipilitu. Oloze tunyama kavatwama nauhashi kanako mwomwo kavavatengele ‘muchifwanyisa chaKalungako.’ Kavapwa vavalemu ngana mwavatuko, ngachize katwatela kuvamonanga ngana muze twamona vatuko.

Uno echi chili nakulumbununa nge vatu vatela tuhu kuyanjisa tunyama tahi? Nduma.

• Kalunga ahanyine Lushimbi vaIsalele ngwenyi tunyama vatela kuhwimanga, kuvahana vyakulya, nakuvakafwa nge vali muukalu, nakuvazakama nge vanalemana.—Kulovoka 23:4, 5, Lushimbi lwamuchivali 22:10; 25:4.

“Zatenunga milimo yenu makumbi atanu nalimwe, kaha likumbi lyamuchitanu naavali mukanoka, mangana vangombe jenu navimbulu jenu vakanoke.”—Kulovoka 23:12.

VYUMA VEJI KUHANJIKANGA VATU

Vaka-kujiha tunyama navaka-kuta ishi vamwe veji kuvajihilanga chiseke. Vatu veka vanahase kwitavila mazu asonekele lunga umwe wakulifuchi lyaRussia ngwenyi kujiha tunyama nakulya chapwa “chachipi.”

VYUMA YAHANJIKA MBIMBILIYA

Kalunga etavisa vatu vajihenga tunyama mangana chivakafwe kukulya chipwe kukuvwala. (Kulovoka 21:28; Mako 1:6) Mbimbiliya nawa yahanjika ngwayo vatu vanahase kujiha tunyama mangana valyenga. Mukanda waKuputuka 9:3 wahanjika ngwawo, “Vaka-kutambuka vakuyoya vosena navapwanga kulya chenu.” NaYesu alwezele tumbaji twenyi vafute vaishi mangana valyenga.—Yowano 21:4-13.

Chipwe ngocho, Mbimbiliya yahanjika ngwayo Kalunga “vaka-kuhuka navava vazanga ulyanyi mwono wenyi unavahungu.” (Samu 11:5) Ngocho, Kalunga kasaka tuyanjisenga chipwe kujiha tunyama mwomwo yachisekeko.

Mbimbiliya yahanjika ngwayo Kalunga amona kuyoya chatunyama kupwa chachilemu chikuma.

• Mbimbiliya yahanjika ngwayo halwola Kalunga apwile nakutenga vyuma, “Kalunga atengele tunyama vahamavu mwaya miyachi yavo, navimuna mwaya miyachi yavo, navaka-kuhalala hamavu vosena mwaya miyachi yavo. Kaha Kalunga achimwene ngwenyi, chinawahe.”—Kuputuka 1:25.

• Mbimbiliya yahanjika hali Yehova ngwayo: “Eji kuhananga kulya chavo kuli tunyama.” (Samu 147:9) Kalunga atengele vyuma vyamumusenge vize navilovola vyakulya vyakutamo namwakuswama tunyama.

• Mwangana Ndavichi wamuIsalele alombele ngwenyi: “Ove Yehova, weji kulwilanga vatu natunyama.” (Samu 36:6) Chakutalilaho, halwola lwaLivaji, Yehova akingile vatu 8 namiyachi yatunyama yosena shimbu kanda enyeke vatu vakuhuka.—Kuputuka 6:19.

Chikupu vene Yehova amona tunyama kupwa vavalemu, kaha asaka vatu vavamonenga kupwa vavalemu.

“Muka-kwoloka eji kulamanga mwono wakanyama kenyi.” —Vishimo 12:10.