CHINYANGA waufuku, Hawaiian bobtail squid eji kumunyikanga, keshi nge mangana vamumoneko, oloze mangana vahone kumumona. Kumunyika chenyi chapwa nge chize chakakweji navatanganyika. Kanyama kana alizanga natututu vaze veji kumunyikanga. Ou kanyama nava tututu vanahase kunganyalisa vatu mujijila jimwe. Vanahase kutunganyalisa kumujimba.

Shinganyekenu hachuma chino: Ou kanyama Hawaiian bobtail squid atwama mutulwiji vamumatungu aHawaiian. Kumunyika chakufuma kukakweji navatanganyika cheji kulingisanga ou kanyama vahone kumumona kuvitoji vaze vali mwishi yenyi nge ali nakuhita helu lyameya. Mujimo lyou kanyama mweji kumunyikanga naufuku. Echi cheji kulingisanga muvwimbimbi wenyi uhone kusoloka. Kumunyika nawa cheji kumukafwanga mangana awane vyakulya.

Tututu vaze alizanga kutambuka navo veji kumukafwanga nawa ayenga mutulo chipwe kuhinduka. Echi cheji kukomwesanga vaka-kuhehwojola mwomwo ou bobtail squid kayoya chakuzeneka kumukundwiza kuli tututu vekako. Chakutalilaho, vaze tututu veji kukafwanga nawa tunyama veka mangana vyakulya vyamujimo lyavo vihase kuchikika. Nge ava tututu kaveshi kuzata kanawako chinahase kulingisa vatu vavize misongo yakufwana nge kuhomba, namusongo washuka, nakutohwa chikuma, nakuhona kusavala tulo. Ngachize, kutachikiza muvazata ava tututu chinahase kukafwa vatu kumujimba.

Enu munashinganyeka ngachilihi? Uno kumunyika chakanyama wamukalungalwiji uze vavuluka ngwavo Hawaiian Bobtail Squid chalijilile chivene tahi nyi valingile chakutenga?