VATU veji kuhonanga membo mwomwo yavyuma vyakulisezaseza. Vatu vamwe vakufwana nge Joe vamwene ukalu kana mwomwo yaponde yakulijila. Kaha vatu veka vakufwana nge Martin vamona “kuyoya” nge chapwa chamokomoko. Veka veji kuhonanga kupwa namembo mwomwo yauhutu, ukalu wakulijila, ukenya, kunwa maundu akupendesa chipwe kunwa wala mujila yayipi, kuvayangila, chipwe mwomwo yakufuma milimo.

Paul Toro * uze alinangula chikuma vishinganyeka vyavatu ambile ngwenyi, kuhona membo kacheshi kaha mumafuchi akuhona luhetoko, chipwe mumafuchi muze mwatwama jijitako, oloze “ukalu kana uli namumafuchi aluheto.” Vyuma vili nakuneha ukalu kana shina jishimbi jafulumende jakutalisa kukutepulula jimbongo mulifuchi.

Vatu vavavulu veji kulizakaminanga haukalu wakulutwe. Oloze veka vanakehesako kulizakamina hakukekesa vyuma yahanjika Mbimbiliya hachiyoyelo chakulutwe nganomu natumona. Mbimbiliya yinahase kutukafwa oholyapwa hakutuhana jishimbi jamwaza jize twatela kukavangiza mangana jitukafwe tupwenga nachiyoyelo chamwaza nakulikangula kumujimba ngana muze chapwile kuli Joe naMartin.

Cindi uze azachilenga muchisete chamikanda ambile ngwenyi, “Joe apwile wachinyingi, wakavumbi kaha nawa wakulinyisa.” Hakuwana nge Cindi apwile Chinjiho chaYehova, ngachize ahanyinenga Joe jimangazini jaKaposhi Kakutalila naTonenu!, kaha nawa amulanyine kuchilika chaKwanuka Kufwa chaMwata mumwaka wa 2007. Omu ayile kuchilika kana, vamutambwile nalikoji nakavumbi, kahechi chamulingishile aputuke kuyanga kukukunguluka lwola lwosena. Etavilile kumunangula Mbimbiliya kuli ndumbwetu umwe walunga muchikungulwilo.

Vyuma alinangwile Joe vyamuvendejekele chikuma, kaha aputukile kuzachisa vyuma apwile nakulinangula muMbimbiliya, nakwalumuna kuyoya chenyi numba tuhu kulinga ngocho chapwile chachikalu. Chakutalilaho, alinangwile nge kuyoya chapwa wana wakufuma kuli Kalunga, kaha vatela kuchivumbika, kaha nawa kunwa makanya cheji kwenyekanga mujimba. (Samu 36:9) Echi chamulingishile echenga kunwa makanya, kweseka nalushimbi lwatwama hachisoneka chaWavaka-Kolinde 2, 7:1 chize chamba ngwacho: “Tulitomesenu kuvyuma vyosena vyakupihisa mujimba.” Vyuma asakwile Joe vyamulingishile apwenga wakulikangula kumujimba nakulama jimbongo.

Mazu amuMbimbiliya akwamba ngwavo twatela kulinga vyuma vyasakiwa mukuyoya chetu akafwile Joe aputuke kutonda milimo. * (Wavaka-Tesolonyika 1, 4:11, 12) Mukanda waMuka-kwambulula 2:24 wahanjika ngwawo, “Kakweshi chuma chamwaza atela kulinga mutu kuhambakana kulya nakunwa nakulivwisa kuwaha hamilimo yenyi eji kukilikitangako.” Echi kulivwisa kuwaha cheji kwizanga mwomwo yakupwa nakavumbi, mwomwo kuzata milimo yamwaza cheji kutunehelanga kavumbi. Kaha cheji kutulingisanga tukafwe navaze vali muukalu.—Wavaka-Efwesu 4:28.

Cindi ambile ngwenyi, “Omu Vandumbwetu muchikungulwilo vamwene vilinga vyamwaza vyaJoe vevwile kuwaha chikuma, kaha veka vamukafwile kuwana zuvo yamwaza yakutwama navyuma vyeka vize kapwile navyoko.” Joe atwalileho lika kuzovoloka, kaha kutwala muze vamumbapachishile nakupwa Chinjiho chaYehova. Joe eji kuhanjikanga vyuma ahichilemo nge anakukolezeza vakwavo vafwile chinyingi chakufuma kuli Kalunga ngana muze yahanjika Mbimbiliya.—Vishimo 3:13, 14.

Martín aputukile kutondatonda chiyoyelo chamwenemwene omu apwile namyaka yakusemuka 20. Ambile ngwenyi, “Ngwayilenga mukwitava chakulisezaseza, nakulinangula mangana autu, nakunwa maundu akupendesa mangana nguwahilile, oloze kavyangukafwileko.” Martín atwamine chindende kulifuchi lyaCalifornia, U.S.A, kaha kufumaho ayile nakutwama kulifuchi lyaHawaii. Ambile ngwenyi, “Ngwashinganyekele ngwami ngunawane chiyoyelo chamwaza mulifuchi kana. Oloze kuwaha chalifuchi kana chapwile chamavokovoko. Kaha ngwahombele chikuma nakusaka kulijiha.” Halwola kana alilile chikuma nakulembelela Kalunga ngwenyi: “Nge kuwatwama, kaha ngukafwe ngukuwane.”

Martín anukile ngwenyi halwola lwatete amwene chinjikizo chakusoneka ngwavo “Zuvo yaWangana yaVinjiho jaYehova.” Ngocho ayile nakukunguluka. Ambile ngwenyi: “Ngwengilile muZuvo yaWangana nalipupe kumutwe nawevu wakuhona kuteula, kaha ngwavwalile vyakuvwala vyamajilo vize  ngwavwalile hatukweji vavavulu. Chipwe ngocho, vangutambwile namavoko avali.” Martín etavilile vamunangule Mbimbiliya kaha atambukilenga kufuma “hembo” lyenyi nakuya mumbaka nakulinangula Mbimbiliya.

Kutwala muze, vihula vyenyi vyosena vavikumbulwile, kaha kahombele chekako. Aputukile kusuuluka mukuyoya nakumona kuwaha ahanjikile Yesu ngwenyi: “Vawahilila vaze vejiva ngwavo vasaka vyuma vyakushipilitu.” —Mateu 5:3.

Vilinga vyaMartín vyalumukile nakupwa vyamwaza omu aputukile kukavangiza jindongi jamuMbimbiliya jize jakafwile Joe uze twavulukanga hakavanga. Martín asolokele jino kanawa kumujimba, kaha nawa Vinjiho vamukafwile awane milimo nazuvo yakutwamamo. Ambile ngwenyi, “Kunyima, vatu vangumwenenga ngwavo nguchipekwapekwa wakuhona limbo, oloze vatu valikomokelele omu ngwalumukile nakupwa mutu wamwaza.”

Kutwala muze, Martín akindulukile kulifuchi lyaArgentina, kaha vamumbapachishile nakupwa Chinjiho chaYehova. Oholyapwa ali nakulivwisa kuwaha kwazana mumulimo wakukafwa vatu vaze vali nazala yakushipilitu nakukumbulula vihula vize vyeji kuvayanjisanga mukuyoya.

Lwola lumwe ngamba yaKalunga Yelemiya kushikulu amwene ukalu mukuyoya. Muka-kole umwe alukukile ngalila yenyi nakukwata vatu vavavulu nakuvatwala muundungo. (Lungungu 1:3) Numba tuhu Yelemiya kavamukwachileko, oloze vikumba vyenyi vavipukwile. Alishonene nakulomba kuli Kalunga ngwenyi: “Anuka vihuli vyami nakulumbwangila chami.”—Lungungu 3:19.

Numba tuhu Yelemiya apwile nakumona ukalu, oloze kashinganyekele ngwenyi nautwalaho likako. Mwomwo ika? Mwomwo atachikijile ngwenyi Yehova keshi kumusezako. (Yelemiya 1:8) Kaha nawa kulinangula Visoneka chamukafwile atachikize nge kuhutwa nakuyanda navikakuma kuvatu nakuvalingisa vakatwame mukuunda.—Samu 37:10, 11.

 Vyuma kana kavyeshi kukeza kuhichila mujingolo javatuko, oloze kuhichila mufulumende yaKalunga yize vavuluka ngwavo Wangana waKalunga. (Ndanyele 7:13, 14) Mwangana waWangana kana ikiye Yesu Kulishitu uze evwililenga keke vaka-kuyanda omu apwile hano hamavu. (Luka 7:22; 14:13) Muchiyulo chenyi, “vaka-kwoloka navakafukilanga, kaha nakukapwa kuunda chamwenemwene . . . mwakapululula vaka-kuhutwa vaze vali nakutwa kawelele, navaka-kukalikiza navaze vazeneka mutu wakuvakafwa, mwakavapululula kuluyanjisa nakuulyanyi.”—Samu 72:7, 12, 14.

Yesu anangwilenga chikuma vatu vyaWangana waKalunga omu apwile hano hamavu. (Luka 4:43) Avalwezele valombenga ngwavo: “Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:9, 10) Uno kuyoya nachikapwa ngachilihi hano hamavu omu Wangana waKalunga naukayula? Mbimbiliya yakumbulula chihula kana mujila yamwaza. Chakutalilaho, yahanjika havatu kana ngwayo:

• “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. Kaveshi kukatunga jizuvo javo mangana veka vakatwamengamoko, kaveshi kukalima mangana veka vakalyenga vyuma vanalimiko. . . . navakalivwisanga kuwaha milimo yamavoko avo.”—Isaya 65:21, 22.

• “Navakatwamanga mutu himutu mwishi yamuvinyo wenyi, mwishi yamukuyu wenyi, kaha naumwe wauchi mwakavevwisa woma, mwomwo Yehova wamayongomena nahanjikamo lyehi” —Mika 4:4.

Kushinganyeka havyuma kana chinahase kutuvendejeka nge tuli nakumona ukalu. Kaha nawa jishimbi jamuMbimbiliya jinahase kutukafwa tupwenga nachiyoyelo chamwaza oholyapwa ngana muze chapwile kuli Joe naMartín, navatu veka vavavulu. Tengi yetu Yehova Kalunga atufwelelesa ngwenyi: “Weshowo mwangwivwilila mwapwanga wakukingiwa, mwatwamanga mukuunda, chakuzeneka kwivwa woma wavihuli.” (Vishimo 1:33) Mazu kana atela kutukolezeza chikuma mukuyoya chetnu.