VYUMA VEJI KUHANJIKANGA VATU

Vatu vavavulu kuhakilako vene navaka-kwitava veji kushinganyekanga ngwavo chapwa chakwoloka kuvulumuna mutu chikalu kaha nge nakuputuka. Kaha nawa vatu vavavulu vamona ulyanyi uze veji kusololanga havisaji vyamivwimbimbi kupwa hikuhema chize vetavisa.

VYUMA YAHANJIKA MBIMBILIYA

Kunote yalifuchi lyaIraq kwakamwihi nanganda yaMosul kukiko kwatwama malala anganda yaNyineve yayinene yakushikulu yaWangana waAsulya. Omu nganda kana yapwile naluheto chikuma, Mbimbiliya yahanjikile ngwayo Kalunga “Mwakalingisa Nyineve kupwa ngundu.” (Zefwanyiya 2:13) Kalunga ambile ngwenyi, “Nangukakulingisa vakakusehenga kuvatu.” Mwomwo ika? Mwomwo nganda yaNyineve yapwile ‘nganda yakumwanga manyinga.’ (Nahume 1:1; 3:1, 6) Kaha nawa mukanda waSamu 5:6 wahanjika ngwawo “Yehova evwila unyengwe vaka-ulyanyi.” Malala aNyineve asolola nge Kalunga ateselemo mazu enyi.

Ulyanyi wafuma kuli muka-kole wamunene waKalunga navatu, Satana Liyavolo uze Yesu avulukile ngwenyi “muka-kujiha vatu.” (Yowano 8:44) Hakuwana nge “kaye kosena katwama mumavoko ayauze wakuhuka,” ngachize vilinga vyenyi vyeji kusololanga muchima waulyanyi kuhichila muli vaka-kwazana mijimbu. (WaYowano 1, 5:19) Hakusaka twivwise Kalunga kuwaha, twatela kuhunga ulyanyi nakuzanga vyuma vize azanga Kalunga. * Uno kulinga ngocho chapwa chachashi tahi?

“Yehova . . . ahunga weshowo azanga ulyanyi.”—Samu 11:5.

VYUMA VEJI KUHANJIKANGA VATU

Ulyanyi wapwa chuma chize chatwama muli vatu vosena, mutu keshi kuhasa kuumbilako.

VYUMA YAHANJIKA MBIMBILIYA

Sezenu “utenu, namatoto, naupi, nahanjikiso yakasautu, namazu aunyengwe.” Yahanjika nawa ngwayo: “Zulenu mutu wamwaka navilinga vyenyi, kaha vwalenu mutu wamuhya.” (Wavaka-Kolose 3:8-10) Uno vyuma anakutulweza Kalunga kulinga vyavikalu chikuma tahi? Nduma. Vatu vanahase kwalumuka. * Mujila muka?

 Chuma chatete shina kulinangula chinyingi chakwoloka chaKalunga. (Wavaka-Kolose 3:10) Nge mutu wamuchima wamwaza mwalinangula vilinga vyamwaza vyaTengi yetu najishimbi jenyi, kaha mwapandama kuli Kalunga muzangi nakusaka kumwivwisa kuwaha.—WaYowano 1, 5:3.

Chuma chamuchivali shina vatu tweji kulikatanga navo. “Kanda naulikata namuka-kukwata washi matoto, chipwe kulikwatasana namuka-kukwata washi kulundunduko, mangana uzeneke kulinangula jijila jenyi, nakufwa mumuheto.”—Vishimo 22:24, 25.

Chuma chamuchitatu shina mangana. Mutu mwazana muulyanyi eji kusololanga nge katwama namuchima wakulikanyisako. Oloze mutu wakuunda apwa wakujikiza. Mukanda waVishimo 16:32 wahanjika ngwawo, “Muka-kushipwokela kukwata utenu nawahe kuhambakana chindume.”

“Fwilenunga kutwama mukuunda navatu vosena.” —WavaHepeleu 12:14.

VYUMA VEJI KUHANJIKANGA VATU

Ulyanyi unapungako lika kaha nawa nautwalangaho lika.

VYUMA YAHANJIKA MBIMBILIYA

“Kunasale kashimbu kakandende kaha, vaka-kuhuka kaveshi kupwako chekako . . . Oloze vavavwovu navakaheta mavu, kaha navakalivwisa kuwaha kuunda chamwenemwene.” (Samu 37:10, 11) Hakusaka Kalunga akayovole vatu vavavwovu navaze vakuunda, mwakavangila kunongesa vaze vasaka ulyanyi ngana muze anongesele vatu vamuNyineve yakushikulu. Kufumaho ulyanyi kaweshi kukenyeka cheka mavuko.—Samu 72:7.

Luno jino hilwola twatela kufwila kupwa vakuunda mangana Kalunga atwivwile uselewa. Mukanda WaPetulu 2, 3:9, 10 wahanjika ngwawo: “Yehova . . . namitalilila chikoki, mwomwo kazanga mutu numba umwe akanongeko, oloze azanga vosena vapihilile nakwalumuka.”

“Jipoko javo jamikwale navakajifululula nakupwa matemo akulimisa, makunga avo navakawafululula nakupwa jipoko jakunongesa kumitondo.” —Isaya 2:4.