NATALYA namwanenyi walunga Aslan wamyaka 9, vatwamine kwakamwihi napwevo walijina lyaZarina namwanenyi wapwevo Anzhelika wamyaka 12. Kaha vanyike navakulwane vakuhambakana 1, 000 navakiko vatwaminyine hakamwihi, oku vali nakuvalama kuli maswalale.

Halikumbi vene lize lyaChitatu haSeptember 1, 2004, vaze vanyike navisemi javo vapwile haweluka nakuliwahisa mangana valinge chilika chakupwa kushikola halikumbi lyatete munganda yaBeslan yamungalila yimwe yayindende yaAlania mulifuchi lyaRussia. Oloze vakasumukile maswalale vaneza namata nakwimana mukachi kavo nakuputuka kutotola vilyanga nakutambakana. Maswalale vakuhambakana 30 vayile nakujingilika vatu vapwile muzuvo yakulinangwila kwalumuka makonde akalulu.

Maswalale navaka-kulama vazungile ndombo yakafukufuku hamakumbi atatu. Natalya uze apwile nakulinangula Mbimbiliya naVinjiho jaYehova ambile ngwenyi, “Halwola kana ngwalombele chikuma kuli Kalunga.”

Yapwile ngonde yanonga, kaha muze muzuvo mwazumine chikuma. Kuputuka nachimene halikumbi lyamuchivali vaze maswalale kavahanyine vyakulya chipwe meya vaze mapwevo navana vavoko, kaha likumbi lyamuchitatu haChitanu ava mapwevo navana vavo vamwe vanwine masu nakuputuka kulya jitemo jize vaze vanyike vanehelele valongeshi javo. Natalya ambile ngwenyi, “Kanyike walunga uze atwamine kwakamwihi nayetu anguhanyine lifwo mulivoko. Kaha ngwapulile lize lifwo havali nakuhana chihanda chimwe Anzhelika chihanda chikwavo Aslan.”

Kaha likumbi vene lize vaze maswalale vaputukile jino nakutotola tupata navilyanga. Natalya ambile ngwenyi, “Tupata twanguholwele hamavu. Mwilu mwelavile wi nawishi, kaha mata aputukile kuvuma.” Omu vaze maswalale navaze vihwanga vaputukile kulyasa  mata, Natalya naAslan vakalavile nakuchina. Kaha lunga wakungalila yaOssetia walijina lyaAlan avayowele. Oloze vatu vavavulu vanongele.

Vanyike navakulwane vavavulu kuhakilako vene naAnzhelika vafwile. Vatu vamunganda yaBeslana valilile chikuma havyalumingo vyavivulu. Zuvo yaNatalya yalihata nashikola. Mukuhita chamakumbi, vatungileho shikola yayihya, oloze Aslan evwilenga woma wakuya haze hashikola. Kasakile kuyanga navakwavo nakuhemenahoko. Natalya ambile ngwenyi, “Twalombele Yehova amukafwe ahone kupwa nawoma.” Omu mwahichila lwola, Aslan woma wakumine kaha aputukile kuyanga jino haze hashikola nakutanga.

Natalya apwilenga nakwivwa woma kuya nakukunguluka kuZuvo yaWangana. Ambile ngwenyi, “Nge nguli navatu vavavulu muzuvo, ngwevwile kwijiva nge navatulukuka. Kaha ngwalombelenga ngwami chuma kana kachatela kusolokako. Kutwala muze ngwalitwaminyine kukunguluka. Kaha nawa ngwevwilenga kumuchima vo nge ngunanuka lize likumbi ngwayovokele omu vatu vavavulu vafwile.”

Natalya ambile ngwenyi, “Nguli nakusakwilila vatu vosena muchikungulwilo vaze vanatwaleho lika kungukafwa. Chinjiho walijina lyaTatyana angutambukililenga lwola lwosena nge munahichi makumbi atatu. Kutwala muze, ejile namukwavo Chinjiho walijina lyaUlyana uze apwile wamwenemwene namuchima walikoji, wahanjikiso yamwaza, kaha nawa atachikijile kanawa Mbimbiliya. Apwilenga nakungwivwilila omu ngwahanjikilenga, kaha angusangejekelenga omu ngwapwile nakuzovoloka kushipilitu.”

Natalya atwalilileho ngwenyi: “Ulyana angutangilile mazu akaposetolo Paulu aze atwama hali Wavaka-Kolinde 2, 1:9. Omu ahichile mumakava muAja, Paulu ahanjikile jino ngwenyi: ‘Twamwene ngwetu vanatutongwela kufwa.’ Atangile nawa chisoneka chaIsaya 40:31 chize chahanjika ngwacho: ‘Vaze vatalilila kuli Yehova navakakwata ngolo. Navakatuka namavava nge vangonga.’ Visoneka kana hamwe kaha namazu akukolezeza akufuma kuli Ulyana navakwavo veka vyanguzamishile nakungulingisa nguputuke cheka kukunguluka hamwe navana vami. Chipwe ngocho, ngweji kwivwanga woma kupwa halizavu lyavatu vavavulu.”

Kutwala muze Zarina apwile Chinjiho chaYehova, kaha ali nakutalilila kulutwe omu mwakasambilila Anzhelika omu navakamusangula nakukatwama jino hano hamavu mukuunda muWangana waKalunga. (Mateu 6:9, 10; Vilinga 24:15) Natalya navana venyi vavambapachishile mu 2009. Vachili nakutwama kwakamwihi nayize zuvo venyekele, olozenyi kaveshi cheka nakulizakamina vyaponde yize yavasolokeleleko. Natalya ambile ngwenyi, “Ngunahase jino kuhanjika vyuma vyasolokele chakuzeneka kwivwa woma. Kalunga ali nakutukafwa.”