Vinakusoloka Mukaye | Asiaasia
Mijimbu Yize Yahanjika haLifuchi lyaAsia
Litungu lyaAsia likiko lyatwama navatu vavavulu chikuma muno mukaye. Kaha mulifuchi lyaChina naIndia namukiko mwatwama vatu vavavulu. Ukalu muka unakusoloka mumafuchi amuAsia kutalisa kukutanga mashikola nahakukinga vatu javo?
Kunangula Vana Cheji Kuvakinganga
Vatu vamuChina vaze valinangula chikuma jishimbi vambile ngwavo, vana veji kupwanga muponde yayinene chikuma nge visemi javo navahona kuvanangula vyakulimona chalunga napwevo shimbu vachili vanyike. Mumyaka yiwana yakalinwaha vachambamilonga vamulifuchi lyaChina vasopele milonga 8,000 yakupika vanyike. Mutu uze alinangula chikuma jishimbi wahayunivesiti yaBeijing Normal ahanjikile ngwenyi vanyike “vapwa vavashi kwonga, kaha nawa vali nakuvapikanga chikuma. Kunangula vana nachivakafwa valikinge kuukalu kana.”
VYUMA YAHANJIKA MBIMBILIYA: Visemi vakuzangama veji kunangulanga vana vavo mwakulikingila ‘kuli vatu vaze veji kuhanjikanga vyuma vyakuhingama.’—Vishimo 2:1, 10-12.
Vatu Vaze Vafwile Kupeho Yachijimbilanganga
Kweseka nakuhehwojola chimwe, vawanyine nge vakemba vamapwevo vamulifuchi lyaPhilippines vaze vafwile hanyima yapeho yachijimbilanganga vavulile chikuma kuhambakana vaze vafwile napeho yachijimbilanganga. Ponde kana yanehele ukalu kuvatu wauvulu kuvatu wakufwana nge kuhona milimo, kuhona jimbongo jakutungulula jizuvo javo, kuhona kuzakama vakemba vamapwevo, nakuhona kuvalisa vyakulya vyakukafwa mujimba ukole.
VYUMA YAHANJIKA MBIMBILIYA: ‘Lipangilenu kulya chenu navaze vali nazala, nehenu vaka-kuhutwa mujizuvo jenu vaze kaveshi namemboko, vwikenu vaze namumona ngwenu vali nauvu.’—Isaya 58:7.
Kulijiha chaTushinakaji muLifuchi lyaSouth Korea
Mumwaka wa 2011, vatu vavavulu vamyaka yakusemuka 65 nakutwala kwilu vamulifuchi lyaSouth Korea valijihile vavene. Vaka-kuhehwojola vamwe vambile ngwavo kuhona kuzakama tushinakaji nakukaluhwa chachiyoyelo vikiko vyanehele ukalu kana. Kafwe chimbwa chavatu vamulifuchi lyaSouth Korea vapwa vakuhutwa. Kaha vatu vamwe mulifuchi kana vali jino nakushinganyeka ngwavo vanyike vatela kuzakama visemi javo vaze vanakolo.
VYUMA YAHANJIKA MBIMBILIYA: “Vumbikenunga masenu namanenu.”—Wavaka-Efwesu 6:2.
