MUTU muka asaka kuviza? Kuviza cheji kuhakanga mutu muukalu nakukumisa jimbongo. Kuviza cheji kulingisa mutu ahone kuya kumilimo, chipwe kushikola, chipwe kuzata awane jimbongo, chipwe kuzakama kanawa tanga yenyi. Mutu anakuviza eji kusakanga vatu vakumulama, namali akulanda vitumbo.

Kulikinga shimbu kanda muvize chapwa chachilemu kuhambakana kuvandamina misongo yimiwane numba mulyuke. Numba tuhu misongo yimwe katweshi kuhasa kuyichinako, oloze munahase kulingako vyuma vimwe vyakulikinga mangana mukeheseko kuvizaviza. Talenu vyuma vitanu vize mwatela kulinga mangana mulikinge kumujimba.

VAKA-CHIPATELA chaMayo vambile ngwavo, kusananga kumavoko yapwa “hijila yamwaza yakulikingilamo kumisongo nakuhona kutambwisako vakwetu.” Chakutalilaho, nge mutu ali namajilo kumavoko, kaha mwalikwatakwata kumazulu namumeso, kaha nahase kuviza lipwema chipwe kakoho. Shikaho mwatela kusananga kumavoko lwola lwosena nge kuli majilo mangana mulikinge kumisongo. Kupwa vaunyoji cheji kukinganga vatu kumisongo yayipi yakufwana nge yatulo nakuhichisa yize yinakujihanga chikuma vatu, kaha nawa yinakujihanga vana vavandende vakuheta kujimiliyoni jivali mwaka himwaka mukaye kosena. Namusongo waEbola uze unakulindumuna vatu vavavulu munahase kulikingawo nge namusananga kumavoko.

Kwatwama lwola lumwe lwalulemu chikuma luze mwatela kusana kumavoko mangana mulikinge kumisongo nakukinga vakwenu nawa. Lwola kana shina:

• Nge munafumu kuchimbushu.

• Nge munafumu hakuzula kemba matevela, chipwe nge mwatwalanga mwana kuchimbushu.

• Shimbu kanda mukose hambandu nomu namukumisa.

• Shimbu kanda muyenga nakumenekela muveji nomu namufumako.

• Shimbu kanda muputuke kuwahisa vyakulya, nahakuputuka kulya.

• Nge munafumu nakupemba, chipwe nge muli nakukohola.

• Nge munafumu nakukwata kanyama chipwe tuji twavo.

• Nge munafumu nakumbila swali.

Mwatela kusananga kanawa kumavoko enu. Vaka-kuhehwojola vamba ngwavo vatu vavavulu vaze veji kuzachisanga vimbushu vyasanga kaveshi kusana kumavokoko, chipwe veji kusana oloze kaveshi kutomako. Uno mwatela kusana ngachili kumavoko enu?

• Mwatela kusana nasopo nameya amwaza.

• Mwatela kusana namavoko osena avali, nakukosa muvyala, nahavikamba vyamavoko namujipanda jaminwe.

• Mwatela kusana kumavoko hajisekondi 20.

• Mwatela kukosongola kumavoko nameya amwaza.

• Mwatela kupukuta kumavoko nalitwayi chipwe lihina lyakuzeneka majilo.

Kukavangiza vyuma kana nachimikafwa mulikinge kumisongo nakukinga vakwenu nawa.

Kumafuchi amwe vatu vavavulu veji kumonanga ngwavo kuze kunakufuma meya vanakuzachisa kwaunyoji. Oloze vatu veji kulizakaminanga chikuma kachi nge kuze vanakuswitanga meya kuli majilo mwomwo yalivaji, nanyamanganda, chipwe nge miyengo yameya yinatuvika, chipwe ukalu weka wangana. Kachi nge namuswita meya kuchihela kuze kuli majilo chipwe kutumbika meya chakuhona kuwafwika, kaha muhase kwingila tututu nakuneha misongo yakufwana nge kuhichisa, kapwele kachikonga, kujimba masuli namisongo yeka yayipi. Mwaka himwaka, vatu kafwe jimbiliyoni 1.7 vali nakufwa kumisongo kaneyi yakufuma kumeya amajilo.

Musongo wakuhichisa weji kwizanga nge mutu mwanwa meya amajilo chipwe kulya vyakulya vyamajilo. Vyuma muka mwatela kulinga mangana mulikinge, kachi nge vyuma vimwe vinapihisa meya mweji kunwanga?

• Mwatela kumona ngwenu meya muli nakunwa, nakuhikisa, nakukosesa vyakulya namalonga, nakusana, amwaza akuhaka kanawa vitumbo. Nge namulanda meya, kaha mwatela kulanda aze ali mumitumwa yakusoka kanawa nachifwiko akufuma kukapani yamwenemwene.

• Nge munamono ngwenu kuze kunakufuma meya kuli majilo, kaha mwatela kuwateleka chipwe kuhakamo vitumbo vyakuzachisa kumeya.

• Nge muli nakuzachisa vitumbo vyakufwana nge chlorine chipwe maundu eka akujiha tututu mumeya, mwatela kukavangiza kanawa jindongi jamwakuzachishila vitumbo kana.

• Nge chinahase kaha mwatela kulanda lunyungo lyakutuchisa meya.

• Oloze nge kamweshi navitumbo vyakuhaka mumeyako, kaha munahase kuzachisa bleach (jik) nakusotwela mamata 10 mujilita 5 jameya nakuvandamina muhite minyutu 30 numba muwazachise.

• Mwatela kulaminanga meya enu mumingomo navindundu vyakufwika kanawa.

• Lupasa namuswichisa meya lwatela kupwa lutoma lwakuzeneka majilo.

• Mwatela kusana kumavoko numba mukwate kumungomo chipwe chindundu chameya akunwa, kaha nawa kamwatela kukwata minwe meya akunwako.

Munahase kupwa vakulikangula kumujimba nge namulyanga vyakulya vyakulisezaseza. Kamwatela kuhakanga mungwa wauvulu muvyakulya vyenuko, chipwe kulya vyamaji chikumako, chipwe vyashuka chikuma. Kaha nawa kamwatela kulya vyakulya vyavivulu halwola lumweko. Mwatela kulyanga mihako namafwo. Hakulanda vyakulya muvitanda, mwatela kuvangila kutanga jindongi vasoneka halipapilo lyavyakulya kana. Echi nachimikafwa mutachikize ovyo vatungisa vyakulya kana vyakufwana nge chivwale, tiliku chipwe loso. Vyakulya kana vyapwa vyamwaza mwomwo vyeji kukafwa lijimo lizate kanawa hakuchika vyakulya. Mwatela kwesekela kulya vyakulya vyamaji chikuma vyakutunga mujimba vyakufwana nge nyama yangombe, yangulu, natusumbi. Oloze mwatela kulya chikuma vaishi muchalumingo nge chinahase. Kaha nawa kuvihela vimwe veji kulanjisanga vyakulya muvitanda vyakufuma kumafwo, vize vyatwama namaji chikuma, kaha mwatela kulihendako.

Nge namulyanga chikuma vyashuka navyamaji kaha namutohwa chikuma nakuminehela misongo. Hakusaka mukeheseko ukalu kanou, mwatela kunwanga meya muchishishisa chakunwa viyekemena. Lyenunga chikuma mihako kuhambakana kulyanga vyakulya vizekemena chikuma. Mwatela kukehesako kulyanga vyakulya vyamaji chikuma vyakufwana nge nyama, sosenji, mateka navyeka vyangana. Mwatela nawa kukehesako kutelekesanga maji amavulu.

Nge namuhakanga lizumbu chipwe mungwa wauvulu kuvyakulya, kaha munahase kulinehela musongo wamuchima. Nge cheji kumikaluhwilanga kutachikiza seteko yamungwa mwatela kuhaka mundeho, kaha kavangizenu jindongi vasoneka halipapilo lyamungwa. Kaha nawa muchishishisa chakuhaka mungwa mundeho munahase kuhakamo vyuma vyamavumba amwaza.

Kulya chapwa chachilemu, kaha nawa seteko yavyakulya watela kulya yapwa yayilemu. Shikaho omu namulyanga vyakulya, mwatela kumona ngwenu kamweshi nakuliwezangako.

Vyakulya vinahase kuminehela misongo nge kamwaviwahishile kanawako chipwe nge kamwavilamine kanawako. Mwaka himwaka mulifuchi lyaAmerica, mutu umwe havatu 6 eji kufwanga mwomwo yakulya vyakulya vize kavyeshi kanawako. Vavavulu veji kuvizanga nakuyoya, oloze vamwe veji kufwanga. Vyuma muka mwatela kulinga mangana vyakulya vihone kumivijisa?

• Nge munahele mafwo mulitepa muze vazachishile wilo watunyama chipwe tusumbi, kaha mwatela kuwakosa kanawa numba muwateleke.

• Mbatenu sopo nakusana kumavoko nameya azuma, nakukosa poko navyuma namuzachisa shimbu kanda muputuke kuvizachisa.

• Nge halilonga mwakwachilangaho maulu, chipwe vaishi, chipwe nyama mwatela kulikosa numba muhakeho vyuma vyeka.

• Vyakulya namuteleka vyatela kuhya kanawa, kaha nge vinasaleho mwatela kuvifwika chipwe kuvitumbika kanawa mufulinji.

• Nge vyakulya vinashimbula, kaha mwatela kuvimbila.

Chamokomoko namyaka muli nayo, mwatela kulinyukanga mujimba mangana mulikangule. Vatu vavavulu makumbi ano kavalinyuka mujimbako. Mwomwo ika chapwila chachilemu kulinyuka mujimba? Mwomwo nachimikafwa:

• Musavalenga kanawa.

• Mujimba wenu upwenga wakulikangula.

• Vifuwa vijikize.

• Mulame kanawa seteko yakulema chamujimba wenu.

• Mulihende kumusongo wakuhomba.

• Muhone kufwa washi.

Oloze nge kamweshi kulinyuka mujimbako, kaha munahase kuviza misongo yakufwana nge:

• Musongo wamuchima.

• Musongo washuka.

• Musongo wamuchima (BP).

• Kuvula maji mumujimba.

• Musongo wakalepa.

Mutu atela kusakula kulinyuka mujimba chize chinamutela kweseka namyaka ali nayo. Shikaho nge munakolo chipwe nge mwatwama naukalu umwe kumujimba, kaha nachipwa chamwaza kuhulisa ndotolo amilweze kuhema chakulinyuka chize nachimitela. Vandotolo vamba ngwavo vanyike navakweze vatela kulinyuka mujimba haminyutu 60 hakumbi hakumbi. Vakulwane vatela kulinyuka mujimba haminyutu 150 oloze nge kulinyuka kana chasakiwa ngolo chikuma kaha chatela kumbata minyutu 75 muchalumingo hichalumingo.

Sakulenu kuhema chize nachimisuulwisanga. Munahase kusakula kuhema chakufwana nge kwasa ngunja yamahinji chipwe yamavoko, kulaha jimbushi, kuchovwa kinga, kulima mulitepa, navyuma vyeka vize navimilingisa munyuke mujimba. Munahase kutachikiza ngachilihi ngwenu kuhema kana chamweseke nyi changolo chikuma? Munahase kutachikiza ngwenu kuhema kana chamweseke nge namutukuchila livule omu muli nakuhema, oloze kuhema changolo chikuma nachimilingisa muhone nakuhanjika namutu munakuhema nenyi.

Jiola jakusavala jalihandununa kumutu himutu. Vakemba veji kusavalanga jiola 16 chipwe 18 halikumbi, kaha vanyike vaze vali nakulilongesa kutambuka vatela kusavala jiola 14, kaha vaze vanakoloko chindende vatela kusala jiola 11 chipwe 12. Vanyike vaze vanaputuka kuya kushikola vatela kusavala jiola 9 chipwe 10. Vakulwane vatela kusavala jiola 7 chipwe 8.

Mutu himutu atela kumona ngwenyi chapwa chachilemu kusavala jiola jakutamo. Vandotolo vamba ngwavo kusavalanga jiola jakutamo chapwa chachilemu mwomwo:

• Cheji kulingisanga mijimba yavanyike yikole kanawa.

• Cheji kulingisanga vatu vapwenga nauhashi wakulinangula nakwanuka vyuma.

• Cheji kulingisanga maselusi amumujimba azate kanawa.

• Cheji kulingisanga manyinga atambuke kanawa mumishisa.

• Cheji kukinganga mujimba kukukwachiwa misongo.

Kuhona kusavalanga jiola jakutamo chinakulingisa vatu vavize michima, misongo yashuka, kutohwa chikuma, kuhomba, nakupwa mujiponde jahamikwakwa najeka jangana. Chikupu vene, vyuma kanevi vyatela kutukafwa tumone kulema chakusavalanga.

Vyuma muka mwatela kulinga nge munamono ngwenu kamweshi nakusavalanga jiola jakutamoko?

• Nonekenu lwola namusavalanga hakumbi hakumbi.

• Mukapete kakusavala kamwatela kupwa vyemako, kamwatela kututa chikuma chipwe kuzuma chikumako, manongo mwatela kuwajima.

• Kamwatela kutala TV chipwe kwivwilila kuchisajiko.

• Mwatela kumona ngwenu kahela kenu kali kanawa.

• Nge hinamuya nakusavala, kamwatela kwikuchila chikuma, chipwe kunwa kofi, chipwe kunwa walako.

• Nge munesejeka vyuma vyosenevi, oloze tulo vauchi hakusavala, chipwe nge munakunongokanga namusana, kaha mwatela kuya kuli ndotolo amikafwe.