VYUMA VEJI KUHANJIKANGA VATU

Muvisemwa vimwe kulinga ukoji kavachimona kupwa chakuhengako, chikumanyi nge lunga yikiye nalingi ukoji. Vatu vamwe vamona ngwavo vapwevo nalunga valimbata kavatela kutwama hamwe myaka namyakako.

VYUMA YAHANJIKA MBIMBILIYA

MuMbimbiliya lizu ukoji lyatalisa kumutu ambata chipwe asomboka uze mwalisavala namutu uze kapwa muka-mahyenyiko. (Yopa 24:15; Vishimo 30:20) Kalunga amona ukoji kupwa hichuma chachipi. Kushikulu muIsalele mutu uze alingilenga ukoji vamujihilenga. (VyavaLevi 18:20, 22, 29) Yesu anangwile vaka-kumukavangiza valihendenga kuukoji.—Mateu 5:27, 28; Luka 18:18-20.

OVYO CHAPWILA CHACHILEMU

Ukoji weji kujihanga lushiko luze pwevo nalunga valishikile hakulimbata chavo. Kaha nawa ukoji wapwa “shili kuli Kalunga.” (Kuputuka 39:7-9) Weji kuhandununanga vana kuvisemi javo. Chachinenenyi Mbimbiliya yamba ngwayo, “Kalunga mwakasopesa . . . vaka-ukoji.”—WavaHepeleu 13:4.

“Ulo vauvumbikenga kuli vosena, kaha kahela kaulo kanda vakakapihisako.”—WavaHepeleu 13:4.

VYUMA YAHANJIKA MBIMBILIYA

Mbimbiliya yamba ngwayo vatu vanahase kulilukulula nge muka-mahyenyi nalingi ujila. (Mateu 19:9) Shikaho nge umwe muulo nalingi ukoji, uze keshi namulongako akwechi lisesa lyakusakula kulilukulula, chipwe lyakutwalaho lika kutwama namuka-mahyenyi.—Wavaka-Ngalesha 6:5.

Kalunga amona ulo kupwa hichuma chachilemu, kaha nawa watela kwilila. (Wavaka-Kolinde 1, 7:39) Ahunga vatu vaze veji kushinganyekanga kujiha ulo mwomwo yaukalu waundende uze vanahase kukumisa, nyi pamo mwomwo yakuhona kusuuluka navyuma anakulinga muka-mahyenyiko. Shikaho kulilukulula kachapwa chuma chachilelu chize mwatela kulusukilako.—Malaki 2:16; Mateu 19:3-6.

“Aminyi nangwamba kuli enu ngwami, weshowo mwalukulula pwevo lyenyi chakuzeneka mulonga waujila, mwamulingisa kupwa muka-ukoji.” —Mateu 5:32.

VYUMA YAHANJIKA MBIMBILIYA

Eyo. Mbimbiliya yahanjika ngwayo Kalunga eji kwivwilanga keke vaze veji kupihililanga nakwalumuka kumilonga yavo yashili, kuhakilako vene navaka-ukoji. (Vilinga 3:19; Wavaka-Ngalesha 5:19-21) Mbimbiliya yavuluka mapwevo namalunga vavavulu vaze vechele kulinga ukoji, nakupwa jino masepa jaKalunga.—Wavaka-Kolinde 1, 6:9-11.

Omu Ndavichi Mwangana wavaIsalele alingile shili, Kalunga amukonekelele. Ndavichi alingile ukoji napwevo lyakapitau kamaswalale jenyi. (Samwele 2, 11:2-4) Mbimbiliya yamba ngwayo Kalunga “evwile kupihya chikuma havyumevi alingile Ndavichi.” (Samwele 2, 11:27) Oloze omu Ndavichi vamuhuhumwine, apihililile nakwalumuka, ngocho Kalunga amukonekelele. Chipwe ngocho Ndavichi amwene ukalu wakufuma havilinga vyenyi vyavipi. (Samwele 2, 12:13, 14) Mwangana wamangana Solomone ahanjikile ngwenyi, “weshowo mwalinga ukoji . . . keshi namanganako.”—Vishimo 6:32.

VYUMA MWATELA KULINGA

Nge munalingi ukoji, kaha mwatela kulomba Kalunga namuka-mahyenu vamikonekele. (Samu 51:1-5) Mwatela kuhunga ukoji ngana muze auhunga Kalunga. (Samu 97:10) Mwatela kulihendanga kukutalanga mivwimbimbi yauselesele, nakusapula chaseya chipwe kala vyuma vize navimilingisa mwivwile peha mutu uze kapwa muka-mahyenuko.—Mateu 5:27, 28; WaYakova 1:14, 15.

Nge munakwivwa kupihya mwomwo yaukoji nalingi muka-mahyenu, kaha tachikizenu ngwenu Kalunga nejiva omu muli nakwivwa. (Malaki 2:13, 14) Lombenu Kalunga amivendejeke nakumitwaminyina, ‘kaha mwamizamikisa.’ (Samu 55:22) Nge munasakula kukonekela muka-mahyenu, kaha muvosena mwatela kuzata nangolo mangana muzamikise ulo wenu.—Wavaka-Efwesu 4:32.

Kapolofweto Natane alwezele Ndavichi uze apihililile nakwalumuka kuukoji alingile ngwenyi: “Yehova nakukonekela shili yove.”—Samwele 2, 12:13.