Halikumbi mwalimbachile, mwalishikile lushiko namuka-mahyenu ngwenu namutwamanga lika hamwe mukuyoya chenu chosena. Kaha nawa ngwenu namukakumisanga kala ukalu naukamiwananga.

Oloze mukuhita chalwola, pamo ukalu wamukuyoya uli nakuzeyesa ulo wenu. Nyi ngachilihi yenu, kutala noholili muchili nakulama lushiko lwenu tahi?

Kulama lushiko lwenu cheji kukumisanga ukalu. Vatu vavavulu makumbi ano kavasaka kulama lushiko lwavoko. Vamwe veji kushinganyekanga ngwavo kulama lushiko chapwa nge njele mwomwo cheji kuvahonesanga kusakula vyakulinga. Oloze jishiko kana japwa nge chikungo chakwimikisa wato chize chinahase kukinga ulo wenu. Megan, pwevo wakusomboka ambile ngwenyi: “Nge munalimbalaka, kwanuka lushiko lwenu chinahase kumikafwa mushinganyeke ngwenu naumwe wauchi atela kuseza mukwavo.” * Kutachikiza ngwenu ulo wenu kaweshi kukafwako, numba mupwa ngachilihi naukalu, chinahase kumikafwa mufwile washi kukumisa ukalu wenu.—Talenu lipwata lyakwamba ngwavo “ Kutesamo Lushiko naKulyononona.”

Chuma chachilemu shina echi: Nge muli nakumona ukalu muulo wenu, kaha fwilenu kulama lushiko lwenu muchishishisa chakuliveya. Munahase kulinga ngachilihi ngocho?

Kekesenu kanawa vishinganyeka vyenu. Vatu vamwe vamba ngwavo “Ulo wapwa nge njele.” Kutala nayenu mukiko mwaumona tahi, nyi cheji kumikafwa mwivwenga nge muvakukingiwa? Nge muli naukalu, kutala mweji kushinganyekanga kujiha ulo tahi? Hakusaka mulame lushiko lwenu, mwatela kumona muka-mahyenu kupwa hisepa lyenu wakuwahilila nenyi myaka yosena.—Lushimbi lwamuMbimbiliya: Mateu 19:6.

Kekesenu chiyoyelo chenu chakunyima. Jila vamilelelelemo visemi jenu yinahase kumilingisa mumone ulo mujila yamwaza chipwe yayipi. Lea, pwevo wakusomboka ambile ngwenyi: “Visemi jami valilukulwile omu ngwapwile ngukanyike, kaha changulingisa nayami nguhone kumona kulema chaulo.” Fwelelenu ngwenu, enu munahase kulama ulo wenu. Kamwatela kushinganyeka ngwenu nayenu kamweshi kuhasa kutwama muulo ngana mwavisemi jenuko.—Lushimbi lwamuMbimbiliya: Wavaka-Ngalesha 6:4, 5.

Kekesenu hanjikiso yenu. Nge munalisulakanyisa namuka-mahyenu, kanda kutuvatuva mazu amapi akufwana nge “Nangukuseza,” chipwe, “Nanguya nakutonda mukwenu weka uze mwanguvumbikanga.” Hanjikiso kana kayavumbika uloko, kaha nawa kayeshi kukumisa ukaluko, oloze yeji kusangumunanga kaha vikokojola. Ngachize mwatela kupwa nahanjikiso yamwaza. Chakutalilaho, nge muli nakulikokojwesa mwatela kuhanjika mukuunda ngwenu, “Ngwamono ngwami tuvosena tunapihilila.” Vyuma muka twatela kulinga mangana tukumise ukalu kanou?—Lushimbi lwamuMbimbiliya: Vishimo 12:18.

Sololenu ngwenu ‘mwamona muka-mahyenu kupwa wamulemu.’ Hakenu muvwimbimbi wamuka-mahyenu hamesa yakumilimo yenu. Hanjikenu vyuma vyamwaza hali muka-mahyenu. Tuminenunga shinga muka-mahyenu nge muli kumilimo. Lijilisenu kuhanjika ngwenu “yetu,” chipwe “ami napuwami,” chipwe “ami nalunga lyami.” Nge namulinga ngocho, kaha namusolola ngwenu mwavumbika ulo namuka-mahyenu.

Hulisenu vaze vanashimbula muulo. Yenunga kuli vandumbwetu valimbata vaze vanashimbula muulo chamokomoko naukalu. Vahulisenu ngwenu, “Vyuma muka vyamikafwa mulame jishiko jaulo, kaha chinazamisa ngachilihi muulo wenu?” Mbimbiliya yamba ngwayo “Nge omu chikungo nachihotola chikungo chikwavo, mukiko mutu nahase kuhotola mukwavo.” (Vishimo 27:17) Mazu kana anamikolezeza muyenga kuli vaze vanafukila muulo mangana vamikafwe mwakutwamina kanawa.