“Omu ngwapwile nakulikata namutu uze twalivwasanyine kukalimbata, ngwamwene ngwami ngunawane lunga wamwaza uze nangutela. Ngwamwene ngwami, ‘Kukalihandununa namutu kana kuvanga kufwa kaha.’ Oloze omu mwahichile tukweji vavali, usepa wetu wafwile.”—Anna. *

“Ngwamwene ngwami twapwile nakulivwasana. Muvishinganyeka vyami chapwile kwijiva nge tunalimbate lyehi. Oloze mukuhita chalwola ngwamwene nge katwaliteleleleko. Ngocho ngwamukanyine.”—Elaine.

Kutala nayenu mwahitaho lyehi muukalu kanou tahi? Nge mukiko, kaha chihande chino nachimikafwa chikuma.

Nge usepa wenu wakusaka kulimbata unafu, nachimikolesa chikuma kumuchima numba tuhu enu yenu munamukane. Kanyike wapwevo walijina lyaSarah uze akanyine kulimbata nalunga uze apwile nakulisesembwa nenyi hatukweji 6 ambile ngwenyi: “Ngwevwile kupihya chikuma mwomwo twalifwelelesele kukalimbata, oloze kangweshi nenyi chekako. Nge nangwivwilila kumyaso yize twapwilenga nakulivwisa kuwaha, cheji kungwanukisanga omu twapwilenga hamwe tuvavali. Omu ngwapwilenga nakuya kuvihela kuze twayilenga, ngwevwilenga kukola kumuchima hakumona jino nguli uka wami. Numba tuhu yami ngwamukanyine, oloze ngwevwilenga kumuchima kukola hakwanuka vyuma vyosenevi.”

Numba tuhu kufwa chausepa wenu chinahase kumikolesa kumuchima, oloze chinahase kupwa chamwaza. Elaine ambile ngwenyi: “Numba tuhu kaweshi nakusaka kukolesa mukwenu kumuchimako, oloze unahase kumona ngwove muvosena muvavali namukamona ukalu nge namutwalaho lika numba tuhu kamwaliteleleleko.” Sarah naikiye ambile ngwenyi. “Nge mutu uli nakulisesembwa nenyi kawamuzangileko, kaha kaweshi kukasuuluka nenyi muuloko. Shikaho nachipwa chamwaza kulitwamina.”

Kulitwamina kachalumbununa nge munahonoko. Vatu vaze vali nakulisesembwa vanahase kulitwamina chipwe kulimbata. Nge munamono ngwenu kamwaliteleleleko, kaha nachipwa chamwaza kulitwamina. Nge munalitwamina, kaha kacheshi nakulumbununa nge munahonoko. Mwomwo munahase kutwalililaho nachiyoyelo chenu. Mujila muka?

Tachikizenu ngwenu namwivwa kukola kumuchima. Elaine ambile ngwenyi, “Ngwajimbalishile sepa lyami uze ngwazangile chikuma.” Chapwa chakutamo kulinyenga nge usepa wenu unafu. Adam ambile ngwenyi “Nge usepa wove namutu uze wapwanga nakulisesembwa nenyi unafu, chinahase kukukolesa kumuchima numba vene nge unejiva ngwove unalingi chuma chamwaza.” Namwivwa nge muze evwile Mwangana Ndavichi, uze ahanjikile ngwenyi: “Ngweji kuzovesanga kahela kami namasoji ufuku wosena,” mazu kana awasonekele halwola apwilenga nakumona vihuli. (Samu 6:6) Tachikizenu ngwenu namwivwa kukola kumuchima nge ukalu kana unasoloka, kaha nawa kamweshi kuhasa kulihenda kuukalu kanako. Nge namutachikiza ngwenu vyuma kana vyeji kusolokanga mukuyoya, kaha namwivwako hwo kumuchima.—Lushimbi lwamuMbimbiliya: Samu 4:4.

Likatenu navatu vaze vanahase kumizakama. Chinahase kupwa chachikalu kulinga ngocho. Anna uze tunavuluka lyehi ambile ngwenyi: “Hakavanga kangwasakile kupwa navakwetuko. Ngwasakile kupwa ukawami mangana ngushinganyeke kanawa haukalu ngwapwile nakuhitamo.” Oloze kutwala muze, Anna amwene ngwenyi kupwanga hamwe namasepa jenyi vaze vanahase kumukolezeza chapwa chachilemu. Ambile nawa ngwenyi: “Nguli nakwivwa jino kumuchima hwo, kuhambakana muze ngwevwilenga hakavanga.” —Lushimbi lwamuMbimbiliya: Vishimo 17:17.

Linangulenu kuvyuma munahichimo. Lihulisenu ngwenu: ‘Uno echi chinangunangula nge ngwatela kuzachilako havyuma vimwe tahi? Vyuma vyeka muka ngwatela kulinga jino nge nguli nakulisesembwa namutu?’ Mwanapwevo umwe walijina lyaMarcia ambile ngwenyi: “Omu mwahichile makumbi, ngwamwene jino vyuma vyanehele ukalu kana. Mwahichile lwola lwalusuku numba nguputuke jino kushinganyeka kanawa mujila yamwaza.” Adam uze twavulukanga hakavanga naikiye ahanjikile mwomumwe ngwenyi: “Mwahichile mwaka wamuundu numba jino nguvulyame uze pwevo. Mwahichile lwola lwalusuku numba ngumone vyuma ngwalinangwileho. Vyuma ngwahichilemo vyangukafwile ngulitachikize kanawa ami lyavene namutu ngwatela kulisesembwa nenyi. Oholyapwa jino kangweshi nakwivwa kukola kumuchima ngana muze ngwevwile hakavangako.”

Lombenu Yehova amikafwe. Mbimbiliya yahanjika ngwayo Kalunga “eji kuhindulanga vaze vali nakulyonyinga mumichima. Eji kukasanga hajimbandu javo.” (Samu 147:3) Kalunga keshi ikiye eji kutusakwilanga mutu uze natukalimbata nenyiko, ngachize katweshi kumuhana mulonga nge usepa wetu unafuko, mwomwo atuzakama. Ngocho, mulwezenu vyuma vyosena vili mumuchima wenu kuhichila mukulomba.—Lushimbi lwamuMbimbiliya: WaPetulu 1, 5:7.