ACHISHINGANYEKENU vana venu vali nakusaka muvahake mangana. Omu mukiko ali nakusaka namukulwane wenu wamilimo. Muka-mahyenu naikiye ali nakusaka mumulingile vyuma vimwe. Vyuma vyosenevi mwatela kuvilinga oku nawa muli nakuzakama chisemi chenu uze ali nakuviza. Vyuma kana kamwashinganyekele ngwenu navikamisolokela mukuyoyako, oloze vili nakumiyanjisa hakumbi hakumbi. Munahase kulihulisa ngwenu, “Nangulinga ngachilihi? Vatu vali nakusaka nguvahake mangana.” Kuvahaka mangana mukala vyuma navasaka chinahase kumikaluhwila enu chipwe vakiko. Munahase ngachilihi kupwa cheka nangolo?

Hakuwana nge Mose kaha ikiye apwile muka-kuyula vaIsalele, ashinganyekele ngwenyi vyuma apwile nakulinga vyapwile vyavilemu. Oloze isewenu amulwezele ngwenyi: ‘Vyuma uli nakulinga kavyawahileko, nauzeya chikuma.’ Alwezele Mose ahane milimo yakuyula kuli malunga vakuhya, nakuvalweza vanehenga kaha milonga yayikalu kuli ikiye. Vyuma muka vyafuminemo? Mose vamufwelelesele kuli isewenu ngwenyi: “Kaha muzata kanawa. Ngocho navatu vosena nawa navayanga kumembo avo namichima yakusuuluka.”—Kulovoka 18:17-23.

Ngana muze twavulukanga muchihande chatete, Delina aviza musongo vavuluka ngwavo dystonia. Kaha nawa eji kulamanga vasongo jenyi vamalunga vavitonji vatatu. Ambile ngwenyi: “Ngweji kuzatanga kaha milimo yize nanguhasa mulikumbi, kaha nawa kuhona kulangisa cheji kungukafwanga nguhone kuzeya. Ngweji kulwezanga vakwetu nalunga lyami ukalu wami, kaha veji kungukafwanga. Kaha nawa nalwola lwachimene ngweji kuzatangako chindende mulitepa, echi cheji kungusuulwisanga.”

Nge vyakulinga vyavivulu vili nangolo hakuyoya chenu, kaha esekenu kulinga vyuma vino:

• Lwezenuko vakwenu vamikafwe. Chakutalilaho, kutala mwatwama navana hembo vaze vanahase kumikafwa tahi? Kutala kuli vausoko chipwe masepa vaze vatwama hakamwihi vaze navahasa kumikafwako tahi?

• Lwezenu vakwenu vyuma muli nakusaka. Chakutalilaho, hanjikenu namukulwane wenu wamilimo nge ali nakumizachisa chikuma. Oloze kanda kumwivwisa woma ngwenu namwecha milimoko. Mulwezenu kaha ukalu muli nakumona. Pamo nahase kuwana mwakumikafwila.

• Sonekenunga milimo yize muli nayo muchalumingo. Kutala munahase kuhanako vakwenu milimo yimwe tahi?

• Kanda kuyanga kukala vilika vyosena navamilanyako. Nge kamweshi kuhasa kuya kuchilika vanamilanyeko mwomwo yakuhona lwola chipwe ngolo, kaha mwatela kukana mukalemesa ngwenu nduma.

Chishina Chachilemu: Nge namulikungulwila milimo yosena, kaha munahase kuhona kuyizata.