CHIHANDE CHACHINENE | KUTALA MWATWAMA NANGOLO HAKUYOYA CHENU TAHI?
Ukalu: Vishinganyeka Vyakuhenga
KUTALA kulizakamina chikuma, kuhomba, matoto, chipwe kujinda vakwenu vyeji kumiyanjisanga tahi? Nge mukiko, kaha kamweshi kupwa nalwola chipwe ngolo jakuzata vyuma vyavilemu mukuyoya chenuko. Vyuma muka mwatela kulinga? *
CHAKUTALILAHO CHAMUMBIMBILIYA: NDAVICHI
Mwangana Ndavichi ahombelenga, nakulizakamina, nakulishona. Vyuma muka vyamukafwile atwaleho lika kuzachila Yehova? Ndavichi asezele vyuma mumavoko aKalunga. (Samwele 1, 24:12, 15) Kaha nawa asonekele ukalu wenyi. Hakuwana nge apwilenga lunga walufwelelo, alombelenga kuswakumwe. *
VYUMA EJI KULINGANGA GREGORY
Ngana muze twavulukanga muchihande chakulivanga, Gregory aviza musongo wakulizakamina. Ambile ngwenyi: “Chapwile chachikalu kuhonesa ukalu kanou wakulizakamina.” Uno Gregory ahashile kuhonesa ngachilihi ukalu kanou? Ambile ngwenyi: “Hakusaka nguhonese ukalu kana, ngwetavilile kungukafwa mujila yalikoji kuli puwami namasepa jami. Ngwahanjikile nawa nandotolo mangana angukafwe, ngachize echi changukafwile ngwijive ukalu wami. Omu ngwalumwineko vyuma vimwe mukuyoya chami, ngwaputukile kwivwa nge nguli nangolo hakuyoya chami, keshi nge ukalu ukiko uli nangolo hali yamiko. Numba tuhu noholyapwa ngweji kulizakaminanga, oloze ngwatachikiza vyuma vyeji kungulingisanga ngulizakamine, kaha nawa ngwatachikiza vyuma vize vyeji kungukafwanga nguhonese ukalu kana.”
“Muchima wakuwahilila unapu nge vitumbo vyamwaza.”—Vishimo 17:22
VYUMA MWATELA KULINGA
Nge vishinganyeka vyakuhenga vili nangolo hakuyoya chenu, kaha esekenu kulinga vyuma vino:
-
Sonekenu omu muli nakwivwa.
-
Lwezenu sepa lyenu chipwe kausoko kenu omu muli nakwivwa.
-
Kamwatela kwitavila ngwenu vishinganyeka vyenu vyakuhenga vili tuhu kanawako. Chakutalilaho, lihulisenu ngwenu: ‘Kutala kuliko unjiho wakukundwiza vishinganyeka vyami vyakuhenga tahi?’
-
Kanda kutwalaho lika kulizakamina, chipwe kupwa namatoto, chipwe kujindanga vakwenuko. Oloze zachisenunga ngolo jenu mangana muzate milimo yize nayiminehela nganyo. *
Chishina Chachilemu: Kakavulu vishinganyeka vyakuhenga kavyeza mwomwo yaukalu tuli nawoko, oloze mujila tuli nakuumwenamo.
^ par. 3 Vishinganyeka vyakuhenga vimwe vinahase kwiza mwomwo yakuviza chize nachisakiwa ndotolo kuzachilaho. Mangazini yaTonenu! kayanangula vatu mwakukila misongoko. Mutu himutu atela kulikekesa yivene shimbu kanda asakule vyakulinga.
^ par. 5 Mujisamu jajivulu jamuMbimbiliya mwatwama kulomba chaNdavichi.
^ par. 13 Nge muli nakusaka mijimbu yayivulu, kaha talenu vihande vyakuputukilako vyamuKaposhi Kakutalila kaJuly 1, 2015 vyakwamba ngwavo, “Vyuma Navimikafwa Muhone Kulizakamina.”
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Mbimbiliya Yinahase Kungukafwa Nge Ngunahombo Tahi?
Kuli jijila jitatu jize Kalunga eji kukafwilangamo vatu vaze vanahombo.
KUKUMBULULA VIHULA VYAKUPANDAMA KUMBIMBILIYA
Uno Kalunga Mwangukafwa Nge Nangulomba Kuli Ikiye Tahi?
Uno Kalunga eji kutuzakamanga nge tuli muukalu tahi?
