GENGHIS KHAN, apwile liswalale wakuhona woma wamulikulukaji lyamyaka lyakusokesa 12. Alile chihela chize vavulukilenga ngwavo great Mongol Empire. Lifuchi lyaMongolia lyatwama mukachi kalifuchi lyaRussia naChina. Mulifuchi kana mwatwama vatu vavandende chikuma muno mukaye.

Lifuchi lyaMongolia lyatwama natulwiji, namihongi, najipili jajisuku, namwila navyana. Kumutamba wakusulo kwatwama likundu lyaGobi Desert, likundu kana lyaya fuma mwomwo lyatwama navifuwa vyakanyama umwe wamunene uze vavuluka ngwavo dinosaur. Lifuchi kana lyatwama hachihela chakulunduka chikuma kafwe jimita 1,580. Vatu vamulifuchi lyaMongolia vavuluka lifuchi kana ngwavo “Land of Blue Sky.” Lijina kana lyatamo mwomwo lifuchi lyaMongolia lyatwama namakumbi akuhambakana 250 amusana mumwaka.

Mulifuchi lyaMongolia mwazuma chikuma, kaha nawa lwola lumwe mweji kututanga chikuma. Mungonde yanonga, kuzuma cheji kuhetanga kujindingili 104 (40°C), kaha mungonde yachishika kututa cheji kuhetanga kuseteko yakufuma  hajindingili 40 nakuneha mwishi (-40°C). Vatu vavavulu vatwama mulifuchi lyaMongolia vapwa vaka-kunungwojoka. Malunga namapwevo veji kuputukanga milimo chimenemene, yakufwana nge kukamuna mavele avapembe, avangombe, avangamela natunyama vangachize. Vatu vamulifuchi lyaMongolia veji kulyanga chikuma nyama yangombe, nayamukoko.

Vatu vamulifuchi lyaMongolia vapwa vachisambo. Veji kusezanga jimbalaka javo jahululu mangana vatu vaze navahita vengilemo nakuhwima, nakulya kala vyakulya navawanamo. Kakavulu veji kuzumbulanga vangeji tiyi yakuhaka mavele natumungwa twatundende.

Mulifuchi lyaMongolia mwavula chikuma kwitava chavaka-Buddha. Mwatwama navatu vavandende vaze vatwama mukwitava chavaka-shamanism, Islam, nakwitava chavaka-Kulishitu, kaha vavavulu kavapwa vaka-kwitavako. Mulifuchi lyaMongolia muli Vinjiho jaYehova vakuhambakana 350 vaze vali nakunangula Mbimbiliya vatu vakuhambakana 770.