VYUMA VEJI KUHANJIKANGA VATU VAMWE

Hakusaka mulame milimo yenu, mwatela kuyimona kupwa yayilemu chikuma mukuyoya chenu. Muchima kanou unalingisa vatu vamwe vandupukile chikuma mumilimo nakuvalingisa jino vasuvilile jitanga javo nakulikangula chavo chakumujimba.

VYUMA YAHANJIKA MBIMBILIYA

Mbimbiliya yatukafwa tumonenga milimo mujila yamwaza. Yatukolezeza tuzatenga nangolo, kaha nawa kayakundwiza uvwako. (Vishimo 6:6-11; 13:4) Mbimbiliya kayatulweza twenyekelenga lwola nangolo jetu josena kumilimoko. Oloze yatukolezeza tuwanengako lwola lwakuhwima. Mukanda waMuka-kwambulula 4:6 wahanjika ngwawo: “Kunokako chindende chinawahe kuhambakana kukilikita chikuma nakuhangasana peho.” Ngachize, katwatela kulilumbikila milimo yayivulu yize nayitulingisa tusuvilile tanga yetu chipwe kulikangula chetu kumujimbako. Kulikanya milimo kacheshi nanganyoko, oloze nachitutwala kaha kukufwa.

“Kakweshi chuma chamwaza atela kulinga mutu kuhambakana kulya nakunwa nakulivwisa kuwaha hamilimo yenyi eji kukilikitangako.”—Muka-kwambulula 2:24.

VYUMA VEJI KUHANJIKANGA VATU VAMWE

Nge uli nakuhola jimbongo jajivulu, kaha milimo kana yamwaza. Vishinganyeka kana hamwe kaha namuchima wakufwila kupwa najimbongo jajivulu vinalingisa vatu vamwe vazane mukusekasana chakulyapula vatu nakuzata milimo yize kavetavisa kufulumendeko.

Vatu vaze valinangula mangana autu akwamba ngwavo ‘linga vyoshovyo uli nakusaka’ chipwe ngwavo ‘linga vyuma wazanga’ veji kwitavilanga kaha milimo yize nayivasuulwisa. Nge milimo yavo kayeshi “nakuvasuulwisa” mukuyoya chavoko, kaha milimo kana yeji kuvevwisanga uli. Echi cheji kuvalingisanga vahone kuhaka chikuma muchima kumilimo kana. Vanahase vene nakukana milimo yamwaza mwomwo yakushinganyeka ngwavo milimo kana keshi yayilemu kuli vakikoko.

VYUMA YAHANJIKA MBIMBILIYA

Mbimbiliya kayetavisa kuzata milimo yakulyapula vatu chipwe yize yinahase kulemeka vatu mukala jilako. (VyavaLevi 19:11, 13; Wavaka-Loma 13:10) Milimo yamwaza yeji kunganyalisanga vakwetu nakukafwa muka-kuyizata apwenga “nachivezu chamwaza.”—WaPetulu 1, 3:16.

Mbimbiliya yatunangula nawa ngwayo kuzata milimo chapwa chamwaza mwomwo cheji kulingisanga mutu akafwe tanga yenyi keshi nge kulinganyalisa yivene kahako. Numba tuhu kachapwa chakuhenga kulivwisa kuwaha milimo yakumujimbako, oloze katwatela kuyimona kupwa yayilemu chikuma mukuyoya chetuko.

Eyo, kutohwa chajindando chinahase kutulingisa tulizakamine vyachiyoyelo chetu, oloze Mbimbiliya yatulweza ngwayo: “Omu tuli navyakulya nauvwalo, natusuulukanga navyuma kanevi.” (WaChimoteu 1, 6:8) Mazu kana kawalumbununa nge katwatela kulivwisa kuwaha navyuma vyekako. Oloze alumbununa nge twatela kusuuluka navyuma vize tuli navyo, kaha nawa katwatela kulilumbikila vyuma vyavivuluko.—Luka 12:15.

OMWO CHALUMBUNUKILA KULI ENU

Mwatela kuzata milimo nangolo. Mwatela kuyivwila kuwaha. Numba tuhu milimo muli nakuzata yinapu yaupukuvele chipwe nge keshi yikiko mwapwile nakushinganyeka kuzata mukuyoya chenuko, oloze mwatela kuyitachikiza chikuma. Kuzata milimo nangolo chinahase kumilingisa mutesemo vyuma vyavivulu, kaha nawa kuyitachikiza kanawa chinahase kumilingisa musuuluke hakuyizata.

Mwatela nawa kupezalisa kanawa vyuma. Jola jimwe mwatela kuhwimangako. Tunahase kulivwisa chikuma kuwaha kuhwima nge tunazate milimo yetu naunyongochima. Kupwa navyuma vyasakiwa mukuyoya chinahase kutulingisa tulimone nge tuvavalemu, kaha nawa vakwetu navatuvumbika kuhakilako vene navatanga jetu.—Wavaka-Tesolonyika 2, 3:12.

“Kanda namulizakaminako nakwamba ngwenu, ‘Natulya ika?’ chipwe ngwenu, ‘Natunwa ika?’ chipwe ngwenu, ‘Natuvwala ika?’ . . . Senu wamwilu atachikiza ngwenyi mwasakiwa vyuma vyosena evi.”—Mateu 6:31, 32.