KUTALA muli nakuviza misongo yakuhona kukuma, nyi ulo wenu unafu, nyi munafwisa kausoko kenu tahi? Nge muli naukalu uze kamweshi kuhasa kukumisako, chinahase kumikaluhwila kuwana mwakulingila nakushinganyeka ngwenu kachi ukalu kana ukume. Munahase kupwa ngachilihi nangolo hakuyoya chenu?

Kaposetolo Paulu atambukilenga jitunda jajisuku hakupwa kamishonali watwima wamulikulukaji lyamyaka lyakulivanga. Oloze mulimo wenyi wemanyine omu vamukashile nakumuhaka muzuvo oku vali nakumulama kuli liswalale hamyaka yivali. Muchishishisa chakuhomba, Paulu ahakile mangana kuvyuma vize ahashile kulinga. Azachishilenga Mbimbiliya nakukafwa vatu vosena vaze vejilenga nakumumenekela. Kaha nawa asonekele mikanda yayivulu yamuMbimbiliya.—Vilinga 28:30, 31.

Muchihande chinafumuho, twavulukanga ngwetu Anja katambukako atwama kaha muzuvo mwomwo yakuviza. Ambile ngwenyi: “Musongo wakasa unanguyanjisa chikuma mukuyoya chami. Oholyapwa kangweshi nakusaka kutambula cheka misongo yikwavoko, ngocho kangweshi kuya kumilimo chipwe kuya nakushikama navakwetuko.” Uno Anja eji kuyoyanga ngachilihi naukalu kanou? Ambile ngwenyi: “Kwalumunako vyuma vimwe ngweji kulinganga mukuyoya changukafwile. Ngwalingilenga vyuma vize vyapwile vyavilemu chikuma kuli ami nakunoneka vyuma kweseka noho hakumina ngolo jami. Echi chinangukafwe ngulivwe nge nguli nangolo hakuyoya chami.”

Nge kamweshi kuhasa kukumisa ukalu wamukuyoya chenuko, kaha esekenu vyuma vino:

• Hakenu mangana kuvyuma vize munahase kulinga. Chakutalilaho, chinahase kumikaluhwila kukumisa musongo muli nakuviza, oloze munahase kukehesako musongo kana hakulinyukako mujimba, nakulya vyakulya vyamwaza nakupwa nalwola lwaluvulu lwakuhwima.

• Shinganyekenu vyuma vize muli nakusaka kulinga mukuyoya chenu. Lingenu vyuma kana chindende chindende palanga nomu namukavitesamo.

• Zatenunga milimo yayindende yize nayimilingisa mulivwe nge muli nangolo hakuyoya chenu. Wahisenu hamesa nakukosa malonga. Vwalenu muunyoji. Vangilenu kuzata milimo yayilemu nachimene.

• Talenu hanganyo nayifuma haukalu muli nawo. Chakutalilaho, kutala ukalu wenu unamihane chinyingi chakumikafwa mwakuuhonesela tahi? Kutala munahase kuzachisa chinyingi kana mangana mukafwe vakwenu tahi?

Chishina Chachilemu: Numba tuhu kamweshi kuhasa kukumisa ukalu wenu wosenako, oloze munahase kuwana jila yamwaza yakuukeheselamo.