JIMBONGO japwa jajilemu chikuma mukuyoya chamutu, chakuzeneka jimbongo vyuma mukaye kavyeshi kutambuka kanawako. Jimbongo tweji kujilandanga vyakulya, navyakuvwala, nakufwetela jizuvo chipwe kulanda membo. Lunga umwe atala vyajimbongo asonekele ngwenyi, “Jimbongo jazata mulimo waulemu chikuma. Nge jimbongo vanajifumisako, kakweji keshi kulikuminako kuvanga vatu vazunge jita.”

Chipwe ngocho, jimbongo kajeshi kuhasa kukumisa ukalu wosenako. Muka-kusoneka tushilikilo wakuNorway Arne Garborg ambile ngwenyi jimbongo “munahase kujilanda vyakulya, oloze kajeshi kumikafwa mwivwenga chipepa chakulyako, munahase kujilanda vitumbo, oloze kajeshi kumikafwa mulikangule kumujimbako, munahase kujilanda kahela, oloze kajeshi kumikafwa musavale tuloko, munahase kujilanda chinyingi, oloze kajeshi kumikafwa mupwenga namanganako, munahase kujilanda maji akuvyakumisa, oloze kajeshi kumilingisa mupwenga muvamwazako, munahase kujilanda ukelenga, oloze kajeshi kumilingisa mupwenga nachisamboko, munahase kujilanda chiseke, oloze kajeshi kumilingisa mupwenga vakuwahililako, jinahase kumikafwa mulitachikize navatu vavavulu, oloze kajeshi kumikafwa mutunge usepako, jinahase kumikafwa mupwenga navangamba, oloze kajeshi kumikafwa mupwenga navangamba vakushishikako.”

Mutu uze amona jimbongo mujila yamwaza atachikiza ngwenyi jimbongo jinahase kumukafwa alinge vyuma ali nakusaka, oloze kahaka muchima wenyi wosena kukutondatonda jimbongoko. Mbimbiliya yatuhuhumuna ngwayo “zangi yakuzanga jimbongo yinapu mwiji wavyuma vyavipi vyosena, kaha hakupwa nazangi kaneyi, vamwe . . . vanalituvasana vavene namakava amavulu.”—Chimo. 1, 6:10.

 Nyingililenu ngwenu jimbongo kajeshi kuneha pondeko, oloze shina kujizanga chikiko cheji kunehanga ponde. Chikupu vene kuzanga chikuma jimbongo chinahase kutulingisa tulihandunune navausoko nakujiha usepa wetu. Achitalenu havyakutalilaho vimwe.

Daniel: * “Lwola lwosena ngwashinganyekelenga ngwami sepa lyami Thomas apwa mutu wamwaza kaha nawa wakashishi. Katwalizungishilengako palanga nomu alanjile munyau wami. Kangwatachikijile ngwami kumunyau kwapwile ukaluko. Hakuulanda etavilile nakusoneka ngwenyi weshowo ukalu mwakawana kumunyau mwakautala ikiye. Omu mwahichile tukweji vatatu, uze munyau wafwile. Thomas ashinganyekele ngwenyi ngwamwongele, kaha apihililile nakungulweza ngumukindulwishile jimbongo jenyi. Ngwalikomokelele chikuma. Omu ngwesekele kushimutwila nenyi, asulakanyine nakusaka mangana tuzunge. Jimbongo jajihile usepa wetu uze twapwile nawo hakavanga.”

Esin: “Nesrim ikiye kaha ndumbwami ngwasemuka nenyi. Lwola lwosena twalivwasanyinenga, kaha kangwashinganyekele ngwami usoko wetu naukafwila hajimbongoko. Oloze omu mukiko chapwile. Omu vafwile visemi jetu, vatuselele uswana waundende nakutushika ngwavo jimbongo twatela kukalipangilajo hakachi. Songo yami kakavangijile mazu vatushikileko, ngocho asakile ambate jimbongo jajivulu. Hakuwana nge ngwasakile kukavangiza mazu vatushikile visemi jetu, apihililile nakutuvatuva mazu amapi. Noholyapwa hanga angujinjila.”

Kuzanga chikuma jimbongo chinahase kulingisa vatu vahane vakwavo milonga. Chakutalilaho, vatu valuheto vanahase kushinganyeka ngwavo vatu vakuhutwa vapwa vovwa shikaho veji kuyanjilanga. Chipwe mutu wakuhutwa nahase kushinganyeka ngwenyi vatu valuheto vafwila chikuma jimbongo nakulinganyalisa kaha vavene. Leanne mukweze wamutanga yaluheto, veji kumumonanga ulumbi kuli vakwavo. Ambile ngwenyi:

“Vatu vangutachikijile nge tata apwile najimbongo jajivulu. Ngachize kakavulu vatu vahanjikilenga ngwavo: ‘Nge uli nakusaka vyuma vimwe, yako kaha kuli iso mwakuhana.’ chipwe ngwavo ‘Tukonekeleko yetu katwapita ngana mwayenuko numba tuhase kulanda minyau yamwaza ngana yayenuko.’ Kaha kutwala muze ngwalwezele masepa jami valitwamine kuhanjika mazu kana nakuvalumbunwina nge mazu vapwile nakuhanjika apwile nakungukola kumuchima. Kangwasakile vatu vangumone kupwa mutu wajimbongoko, oloze kupwa mutu uze akafwilenga vakwavo.”

Mbimbiliya kayakanyisa kupwa najimbongoko kaha nawa kayeshi kupopolola vatu vaze vatwama najimbongo jajivuluko. Kupwa najimbongo jajivulu chipwe jajindende kachapihyako, oloze shina muchima ali nawo mutu kutalisa kujimbongo ali najo chipwe jize ali nakusaka kupwa najo. Mbimbiliya yahanjika hajimbongo mujila yamwaza, kaha mazu atwamamo apwa amalemu makumbi ano ngana muze chapwile kunyima omu vayisonekele. Achitalenu havyakutalilaho vinakavangizaho.

MBIMBILIYA YAMBA NGWAYO: “Kanda naulijiha nakutondatonda luhetoko.”—Vishimo 23:4.

Mukanda waThe Narcissism Epidemic wamba ngwawo, vatu vaze vafwila kupwa naluheto veji kuvizanga chikuma “muvishinganyeka, nakupwa najimbandu kumiliu, nakuviza nyima namutwe, kaha nawa veji kunwanga chikuma wala namaundu akupendesa. Kufwila kupwa najimbongo jajivulu cheji kwingisanga vatu muukalu waunene.”

MBIMBILIYA YAMBA NGWAYO: “Kutwama chenu chipwenga chakuzeneka kuzanga jimbongo, oku  munasuuluka navyuma muli navyo.”—WavaHepeleu 13:5.”

Lwola lumwe namutu uze asuuluka navyuma ali navyo mukuyoya eji kulizakaminanga vyajimbongo, oloze atachikiza vyuma vize vyapwa vyavilemu mukuyoya chenyi, ngocho keshi kulizakamina chikumako. Chakutalilaho, mutu asuuluka navyuma ali navyo mukuyoya chenyi keshi kuhomba chikuma nge najimbalisa luheto lwenyiko. Oloze eji kufwilanga kupwa namuchima apwile nawo kaposetolo Paulu uze asonekele ngwenyi: “Ngunatachikiza mwakutwamina navyuma vyavindende, namwakutwamina navyuma vyavivulu. Kaha muvyuma vyosena namuchiyoyelo chosena, ngunalinangula lyehi jila yamwakupwila nguwakwikuta namwakutwamina nazala, nomu mwakutwamina navyuma vyavivulu namwakutwamina chakuzeneka vyuma.” —Wavaka-Fwilipi 4:12.

MBIMBILIYA YAMBA NGWAYO: “Ou mwafwelela luheto lwenyi mwakalimbuka.”—Vishimo 11:28.

Vaka-kuhehwojola vawana nge chihande chajimbongo chikiko chinakunehanga ukalu mumalo nakulingisa vatu vavavulu valilukulule. Ukalu wajimbongo unakulingisanga nawa vatu vavavulu valijihe vavene. Chaluvinda vatu vamwe vamona jimbongo kupwa jajilemu chikuma kuhambakana jishiko jaulo chipwe kuyoya chavo. Oloze vatu vaze vamona jimbongo mujila yamwaza kavafwelela nge jimbongo jinahase kukumisa ukalu wavo wosenako. Oloze veji kwanukanga mazu aYesu akwamba ngwenyi: “Numba nge mutu ali navyuma vyavivulu, vyuma aheta kavyeshi kumuhana kuyoyako.”—Luka 12:15.

Kulikekesa enu vavene chinahase kumikafwa mumonenga jimbongo mujila yamwaza. Chakutalilaho, lihulisenu vihula vino.

• Kutala ngweji kusakanga kwingila mukusekasana chachipi mangana nguwane washi jimbongo jajivulu tahi?

• Kutala ngwachiwana kupwa chachikalu kuhana vakwetu jimbongo tahi?

• Uno ngwasaka kaha kulikata navatu vaze veji kuhanjikanga hajimbongo navyuma vize vatwama navyo tahi?

• Kutala ngweji kuzachisanga makuli chipwe kwingila muvilinga vyeka vyavipi mangana nguwane jimbongo tahi?

• Kutala jimbongo jeji kungulingisanga ngulimone nge nguwamulemu tahi?

• Uno lwola lwosena ngweji kushinganyekanga kaha hajimbongo tahi?

• Uno kufwila jimbongo chili nakungulingisa nguhone kulikangula kumujimba chipwe kusuvilila tanga yami tahi?

  Pwenunga namuchima wazumbu hakuhananga vakwenu

Nge munakumbulula ngwenu eyo kuchihula chimwe havihula kanevi, kaha mwatela kuzata nangolo mangana muhonese vishinganyeka vyakufwila luheto. Kanda kulikatanga navatu vaze vazanga chikuma jimbongo naluhetoko. Oloze mwatela kulikatanga navatu vaze vafwila kupwa navilinga vyakwoloka.

Kanda namwechelela muchima wakufwila jimbongoko. Jimbongo kajatela kupwa jajilemu kuhambakana masepa chipwe tanga yenu chipwe kulikangula chenu chakumujimbako. Nge namulinga ngocho, kaha namusolola nge mwamona jimbongo mujila yamwaza.