VYUMA VEJI KUHANJIKANGA VATU

Vatu vavavulu vashinganyeka ngwavo kuwahilila nakutesamo vyuma vimwe cheji kwizanga mwomwo yakupwa naluheto, kaha nawa ngwavo kufukila chamwenemwene chapendamina hakupwa najimbongo jajivulu. Ngocho vashinganyeka ngwavo vatu vakuhutwa vaze kavatanga chikuma chipwe kavaya kumashikolako, vaze veji kuhonanga jimbongo jakuya najo kuvipatela vyangolo, navyuma vyeka vyamwaza, kavapwa vakuwahililako kaha nawa kavasuulukako.

VYUMA YAHANJIKA MBIMBILIYA

Mbimbiliya yanangula ngwayo kuwahilila chamwenemwene kacheza mwomwo yaluhetoko, oloze mwomwo yakupwa nausoko wamwaza naTengi. Mbimbiliya yamba ngwayo: “Vawahilila vaze vejiva ngwavo vasaka vyuma vyakushipilitu.” (Mateu 5:3) Chamokomoko najimbongo vali najo, vatu vaze vatachikiza ngwavo vasaka vyuma vyakushipilitu veji kukavangizanga vyuma asaka Kalunga kaha vanahase kulinangula muchano wamuMbimbiliya uze weji kuvendejekanga nakulingisa mutu apwenga namuchima wakuunda. Chuma kanechi chikiko cheji kunehanga kuwahilila chamwenemwene.

Vatu vaze veji kukavangizanga vyuma vyatwama muMbimbiliya vatachikiza mwakutwamina kanawa numba tuhu vali muuhutu. Chakutalilaho, Mbimbiliya yatukafwa tulihende kuvilinga vyavipi vyakufwana nge kunwa makanya nakupenda wala. Vilinga kanevi vyeji kwenyekanga jimbongo nakulingisa mutu ahone kulikangula kumujimba nakusakiwa jino kufweta jimbongo jajivulu kuchipatela.—Vishimo 20:1; Wavaka-Kolinde 2, 7:1.

Mbimbiliya yatuhuhumuna tulihende kumuchima wachipululu nakuzanga luheto. (Mako 4:19; Wavaka-Efwesu 5:3) Punga kana yinahase kukafwa mutu ahone kwenyeka jimbongo hakuhema njuka chipwe “kuzanga jimbongo” jize vavuluka muMbimbiliya ngwavo “mwiji wavyuma vyavipi vyosena.” (WaChimoteu 1, 6:10) Visoneka vyatuhuhumuna ngwavyo: “Mwomwo numba nge mutu ali navyuma vyavivulu, vyuma aheta kavyeshi kumuhana kuyoyako.” (Luka 12:15) Jimbongo kajeshi kuhasa kulanda kuyoya chamutuko. Kukavangiza vyuma yatulweza Mbimbiliya chinahase kutulingisa tuyoye kanawa nakupwa vakuwahilila.

Numba tuhu vaze vali nakutwama muuhutu veji kuyandanga numba vawane vyakulya, vyakuvwala nahakusavala, oloze veji kupwanga vakuwahilila nge navasuuluka navyuma vali navyo, nakuzachila Tengi mukuyoya chavo nakuyoya kweseka namwaya muchima wenyi. Veji kumonanga omu eji kutesangamo mazu amuMbimbiliya akwamba ngwavo, “kukisula chaYehova chikiko cheji kuhetesanga mutu luheto, kaha keshi kuhakilako luyandoko.”—Vishimo 10:22.

CHISONEKA CHACHILEMU: “Vawahilila vaze vejiva ngwavo vasaka vyuma vyakushipilitu.” —Mateu 5:3.

VYUMA YAHANJIKA MBIMBILIYA

Numba tuhu vatu vanahono kukumisa uhutu, oloze Kalunga mwakafumisako vyuma vize vyeji kulingisanga vatu vahutwe. Vyuma kana shina chipululu vatwama nacho vatu najifulumende javo jize jeji kuvalingisanga vafwile kaha kulizakama vavene. (Muka-kwambulula 8:9) Tengi yetu mwakafumisako jifulumende kaneji. Wangana wenyi chipwe fulumende yenyi nayikazakama vatu vosena hamavu chakuzeneka kuvamona mweka namweka. Mbimbiliya yatufwelelesa ngwayo, Mwangana waWangana waKalunga mwakahana vihutu vyuma vize vyasakiwa mukuyoya chavo. “Mwakapululula vaka-kuhutwa vaze vali nakutwa kawelele . . . Mwakevwila keke vaka-kukalikiza navaka-kuhutwa, Mwakalwila myono yavaka-kuhutwa.”—Samu 72:12-14.

Kaye kosena nakakapwa palachise muze vatu vosena navakapwanga navyakulya najizuvo jakusavala, kakweshi kukapwa mutu mwakahutwako. Mumukanda waIsaya, Kalunga ashika ngwenyi vatu jenyi “navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. . . . “Vaze ngwasakula navakalivwisanga kuwaha milimo yamavoko avo.” (Isaya 65:21, 22) Muchishishisa chakuyanda nazala, vatu vosena navakalivwisa kuwaha “chiwanyino chavyakulya vyamwaza” navyuma vyeka vyamwaza mwakavahana Yehova.—Isaya 25:6.

MWOMWO IKA CHAPWILA CHACHILEMU?

Kushinganyekanga havyuma ashika Kalunga vyakutwama chakuzeneka uhutu cheji kufwelelesanga vatu vaze vali nakuyanda nge Kalunga avazakama kaha nawa kalinwomu ukalu vali nakumona ukume. Kujika muchima kuvyuma vatushika cheji kukafwanga vatu vomike muukalu vali nawo oholyapwa.

CHISONEKA CHACHILEMU: “Mwomwo mwakapululula vaka-kuhutwa vaze vali nakutwa kawelele . . . Mwakevwila keke vaka-kukalikiza navaka-kuhutwa, mwakalwila myono yavaka-kuhutwa.”—Samu 72:12, 13.