VATU kakavulu veji kuvulukanga lifuchi lyaNicaragua ngwavo lifuchi lyavijiva najipili. Lifuchi kaneli lyatwama nachijiva chachinene chamuCentral America chize vavuluka ngwavo Chijiva chaNicaragua. Vatu vamulifuchi kana vavulukilenga chijiva kanechi ngwavo Cocibolca, kulumbununa “Kalungalwiji Uzekemena.” Chijiva kana chatwama namatungu akuhambakana halikulukaji, kaha chikiko kaha chatwama nameya akuzeneka mungwa muze mwatwama navaishi vamukalungalwiji vakufwana nge vapungu, naveka vakusongoloka mivumbo navaishi vavanene vavuluka ngwavo vashark.

MuNicaragua mwatwama ngalila vavuluka ngwavo Mosquito Coast yize yatwamina hahasuku muCentral America. Yatwamina kungenge yakalungalwiji, kumusamuko walifuchi lyaNicaragua, kaha yambata tunda yayisuku yakuheta kujikilomita 65 nakwingila mulifuchi lyaHonduras. Vatu vahanjika lilimi lyaMiskito (chipwe ngwetu Mosquito) vakiko vasemukila mulifuchi lyaNicaragua vaze vapwileko halwola luze vejile vaka-Europe mulikulukaji lyamyaka lyakusokesa 16.

VaMiskito valinunga hamwe, kaha nawa vatwama navisemwa vyakulipwila. Chakutalilaho, lilimi lyaMiskito kalyatwama namazu akuvuluka vatu ngana muze chapwa muChingeleshi ngwavo “Mister” chipwe “Miss” koko. Kuvihela vyakumembo, vanyike veji  kuvulukanga vakulwane vaze vapwa vausoko wavo navaze kavapwa vausoko wavoko ngwavo, “Natu” chipwe “Tatapwevo.” Kushikulu mapwevo vahanjika chiMiskito vamenekelanga masepa chipwe vausoko hakuliwanyisa makili. Kufumaho, pwevo uze aputukanga kumeneka mukwavo mwahwimina mumazulu.