VINAKUSOLOKA MUKAYE
Mijimbu yize yahanjika hamafuchi ahata Kumututuko waChijiva chaMendetelenya
Kunyima, mafuchi ahata kumututuko wachijiva chaMendetelenya apwile akuzovoloka muchinyingi namuchiyoyelo mukaye kosena, ngocho mwatwama vyuma vyakuvumbwojola vyavivulu vyakushikulu.
Vaka-kukela Vinyo Vamukanane
Mu 2013, mulifuchi lyaIsalele lyamakumbi ano, vaka-kuvumbwojola vawanyine chihela valaminyinenga vinyo vaka-Kanane chize chapwileko kafwe myaka 3,700 kunyima. Muchihela kana mwapwile milondo kafwe 40 muze vanahase kulamina mitumwa yavinyo yamakumbi ano 3,000. Muka-kuvumbwojola vyakushikulu uze akekesele tuvinyo tuze twasalile mumilondo kana awanyine nge, vaka-Kanane vapwilenga vasachiteta hundu mukukela vinyo. Ambile ngwenyi: “Vakavangijilenga munona munona vyuma vyosena vatelele kulinga hakukela vinyo vyamumulondo himulondo.”
UNO MWATACHIKIZA TAHI? Mbimbiliya yavuluka nge kushikulu vaIsalele vakelelenga “vinyo vyamwaza” nakuvilongela mumilondo yayinene.—Mwaso waSolomone 7:9; Yelemiya 13:12.
Kuvula Chavatu
Lipapilo lyamijimbu vavuluka ngwavo Guardian, lyasolola nge muEjipitu, vakemba vakuheta ku 560,000 vasemukile mu 2012 kuhambakana vaze vasemukile mu 2010. Magued Osman, muka-kuhehwojola wahakapani yaBaseera ahanjikile ngwenyi: “Hamyaka yosena muEjipitu kanda musemukengaho lyehi vatu vavavulu nganako.” Nge vatu navavulilangako lika ngana, kaha lifuchi nalipwa muukalu wameya, nakakahya kakezi nakuhona vyakulya.
UNO MWATACHIKIZA TAHI? Mbimbiliya yahanjika nge, Kalunga ajina ngwenyi vatu ‘vakazalise hamavu,’ nakupwa navyuma vyakuvakafwa mukuyoya.—Kuputuka 1:28; Samu 72:16.
Vawanyine Lumbongo Vaswekele
Lumbongo luze lunatwame kafwe myaka yakuhambakana ha 100 luze lwapwile namazu akwamba ngwavo “Year Four” valuwanyine kwakamwihi namukwakwa waunene wamuIsrael. Mazu akwamba ngwavo “Year Four” atalisa kumwaka wamuchiwana uze vaYuleya valikangile kuchiyulo chavaLoma (69-70 C.E.) numba Yelusalema vayinongese. Pablo Betzer mukulwane wavaka-kuvumbwojola vyuma ambile ngwenyi: “Chasoloka nge kwapwile mutu umwe uze alizakaminyine ngwenyi kukuma kalinwomu chizenga, pamo omu amwene maswalale vavaLoma vali nakuswenya kwakamwihi. Ngocho aswekele lumbongo lwenyi nakushinganyeka ngwenyi mwakalumbata kulutwe.”
UNO MWATACHIKIZA TAHI? Mu 33 C.E., Yesu ahanjikile chimweza ngwenyi vaLoma navakeza nakuhaka Yelusalema muchingombela. Ngocho alwezele vaka-Kulishitu vakachinyine kujipili nakuswamako.—Luka 21:20-24.
