Twambenga ngana ngwetu enu namuka-mahyenu munalikokojwesa. Kaha hinamuhanjika ngwenu, ‘Kangweshi kulikonekelako mwomwo keshi yami ngunapihisako.’

Numba tuhu munaliula chihande kana, oloze hanga munasulakanyina. Munakusaka jino mulikonekele, oloze muli nakuhona kuhanjika ngwenu “Ngukonekeleko.”

Kulivwimba. Charles * lunga uze ambata ambile ngwenyi: “Lwola lumwe chapwa chachikalu kuhanjika ngwami ‘ngukonekeleko,’ mwomwo kulinga ngocho nachisolola nge nguwamokomoko.” Kulivwimba chinahase kumilingisa mwivwenga sonyi kwitavila ngwenu mwaluwisanga.

Vishinganyeka vyenu. Munahase kushinganyeka ngwenu mutu kulikonekela kuvanga ikiye napihisa. Jill, pwevo uze asomboka ambile ngwenyi: “Nge unatachikiza ngwove ove yove unapihisa, kaha nachipwa chachashi kwamba ngwove ‘ngukonekeleko.’ Oloze nge tuvosena tunapihisa, kaha cheji kupwanga chachikalu kulikonekela. Mwomwo ikaze nangulikonekela okunyi tuvosena tunapihisa?”

Munahase kulisambisa chikumanyi nge munatachikiza ngwenu muka-mahyenu ikiye napihisa. Joseph, lunga ambata ambile ngwenyi: “Nge unatachikiza chikupu ngwove kawapihishileko, kaha kuhona kulikonekela chapwa hijila yimwe yakusolwelamo nge kaweshi namulongako.”

Jila vamilelelelemo. Pamo vamilelele mutanga yize vatu kavapwilenga nakulikonekelako. Nge mukiko, kaha kamwalinangwile kwitavilanga vyuma mwapihishileko. Nge kuwinyike kamwalijilishilenga kulikonekelako, kaha nachipwa chachikalu kulinga ngocho muukulwane.

Zakamenunga muka-mahyenu. Achishinganyekenu halwola luze mutu umwe ejile nakulikonekela kuli enu, kaha nomu mwevwile. Nayenu nawa nge namulikonekelanga, kaha muka-mahyenu mwevwa kuwaha. Numba tuhu munashinganyeka ngwenu keshi yenu mwaluwisangako, oloze munahase kulikonekela mangana musuulwise muka-mahyenu chipwe kulikonekela mwomwo yaukalu uneza uze kamwashinganyekanga ngwenu nausolokako. Mazu kana anahase kwivwisa kuwaha muka-mahyenu.—Lushimbi lwamuMbimbiliya: Luka 6:31.

Zakamenunga ulo wenu. Kulikonekela mwatela kuchimona nge hijila yakulaminamo ulo wenu, keshi nge vanamifungululako. Mukanda waVishimo 18:19 wahanjika ngwawo nge mutu ‘mwakakamisa muchima wenyi, kaha napu nge nganda yakujingulwisa kembwe.’ Chapwa chachikalu kuneha kuunda mujila yakufwana ngana. Oloze nge namulikonekelanga, kaha ukalu kaweshi kutohwako. Nge namulinga ngocho, kaha namusolola nge mwazakama ulo wenu.—Lushimbi lwamuMbimbiliya: Wavaka-Fwilipi 2:3.

Likonekelenu washi kuli muka-mahyenu. Muchano vene, cheji kupwanga chachikalu kulikonekela nge kamwapihishileko. Oloze tutenga twamuka-mahyenu katwatela kumilingisa mupwenga navilinga vyavipiko. Ngachize, kamwatela kulangisa kulikonekela nakushinganyeka ngwenu namukavulyama mukuhita chalwolako. Nge namulikonekelanga, kaha namuka-mahyenu mwachiwana kupwa chachashi kulikonekelanga kuli enu. Nge namulijilisanga kulikonekela, kaha nachipwanga chachashi kulinga ngocho.—Lushimbi lwamuMbimbiliya: Mateu 5:25.

Sololenu ngwenu munalikonekela namuchima wosena. Kulisambisa chalihandununa nakulikonekela. Pamo munahase kuhanjika nakufutulula ngwenu, “Ngukonekeleko nge unamono ngwove ngunapihisa.” Kuhanjika ngocho kachapwa kulikonekelako. Kamwatela kulisambisako kaha nawa mwatela kwitavila ngwenu munafutwisa muka-mahyenu kumuchima, numba nge yenu munapihisa chipwe nduma.

Itavilenunga tutenga twenu. Linyisenu nakwitavila ngwenu lwola lumwe munahase kulimbenja. Vatu vosena veji kulimbenjanga. Numba vene nge munashinganyeka ngwenu kamwapihishileko, oloze tachikizenu ngwenu pamo kamwatachikijile kanawa vyuma vyosena vyasolokangako. Mbimbiliya yamba ngwayo: “Muka-kulivanga kujimbula chihande eji kwivwakananga nge noloka. Oloze nge mukwavo neza, kaha himwamwihwojola.” (Vishimo 18:17) Munahase kupwa namuchima wakulikonekela nge namutachikiza ngwenu nayenu mwapwa muvatu, kaha munahase kulimbenja.