UNO VALINGILE VYAKUTENGA TAHI?
Tututu Vaze Veji Kuchikanga Maji
MUMWAKA wa 2010 maji akuheta kujilita kafwe 800 miliyoni amwangilikilile mukalungalwiji muMexico omu likina lyakufulisa maji lyatuvikile nakuvomba. Oloze omu mwahichile tukweji vavandende, maji amavulu ajimanganyine. Uno echi chapwile ngachilihi ngocho?
Achishinganyekenu: Vaka-sayasi vanawane nge tututu vamwe vanahase kuchika maji. Mutu alinangula chikuma, Terry Hazen avulukile tututu kanava ngwenyi “vaka-kuchika maji.” Tututu kanava vakafwile aze maji amwangalilile mukalungalwiji kuMexico ajimangane ngana muze tunalumbununa kumaputukilo.
Vaka-kusoneka mijimbu vaBBC vambile ngwavo: “Katweshi kulikomokelako hakuwana nge kalungalwiji atwama natututu vakuchika maji. Mwomwo kufuma vene kunyima, chasoloka nge mukalungalwiji mwatwama tututu veji kuchikanga maji shikaho meya eji kupwa amwaza lwola lwosena.”
Numba tuhu jijila jize vatu veji kuzachisanga hakukelulula maji aze anamwangilikila mumeya jeji kuzatanga kanawa, oloze jeji kwenyekanga vyavivulu. Vitumbo vize veji kumwangilanga mumeya vyeji kuhonesanga jijila jize ahakileko Kalunga jakufumishilamo maji. Vitumbo kanevi vyatwama nausungu chikuma, ngocho vyeji kwenyekanga mavu nameya. Oloze jijila ahakako Kalunga jakufumishilamo maji jakufwana nge tututu vaze veji kuchikanga maji, vyeji kuzatanga kanawa mulimo kanou chakuzeneka kwenyeka mavu nameya. *
Ove Unashinganyeka Ngachilihi? Uno tututu vaze veji kuchikanga maji valijilile vavene tahi nyi valingile vakutenga?
^ par. 6 Oholyapwa kanda tutachikize ukalu unahase kukeza kulutwe mwomwo yaponde yize yasolokele kuMexicoko.
Pamo Nauzanga Nawa
TONENU
Vimbangachi vyaVakolekole VamuKalungalwiji
Vimbangachi vyavakolekole vamukalungalwiji vyeji kuvakinganga.
TONENU
Ulombo Ulauluka Chikuma Wamuhako Vavuluka Ngwavo Pollia Berry
Muhako kana kawatwama naulombo ulaulukako, oloze wapwa ulauluka chikuma. Uno chuma muka cheji kulingisanga muhako kana upwenga ulauluka?
TONENU
Mangona aMbau WamuKalungalwiji
Tunyama vamwe vaze vatwama mumeya vatwama nachilanda chamaji chize cheji kuvakafwanga vevwanga kuzuma. Mbau wamukalungalwiji eji kuzachisanga jijila jakulisezaseza.
