Nge Mukwenu Anakuviza
Maribel ambile ngwenyi: “Omu Tata apwile kwakamwihi nakumulukulula muchipatela, twahulishile ndotolo apime manyinga enyi. Oloze ndotolo atulwezele ngwenyi, ali kaha kanawa. Kufumaho ashishikile cheka haze halipapilo lyamuveji, kaha himwamba ngwenyi nduma, kuli hamwe vanalimbenje. Kaha alikonekelele nakuya nakusanyika ndotolo mukwavo uze atala hamusongo kana. Tata ali jino kanawa, oloze twalingile kanawa kumuhulisa.”
Shimbu kanda muyenga kuchipatela, hulisenu muveji amilweze musongo anakuviza navitumbo vize kanwako
Kutupwangilanga kuchipatela cheji kuzeyesanga. Ngana muze nahanjika Maribel, chapwa chamwaza kukafwa sepa lyetu chipwe kausoko uze anakuviza mwomwo tunahase kulwila mwono wenyi. Uno munahase kukafwa ngachilihi mukwenu uze anakuviza?
Shimbu kanda muyenga kuchipatela. Hulisa muveji akulweze musongo anakuviza navitumbo vize kanwako. Atela nawa kukulweza vihula vyosena vize mwasaka kukahulisa ndotolo. Kaha nawa atela kukulweza numba nge kausoko kenyi umwe avizaho lyehi musongo kana. Kanda kushinganyeka ngwenu ndotolo mwakahulisa vihula kana chipwe navitachikiza lyehiko, nduma.
Ivwililenu kanawa vyuma mwahanjika ndotolo, nakuhulisa vihula, nakusoneka vyuma mwahanjika nge munahase
Halwola muli nakushimutwila nandotolo. Mwatela kwivwilila kanawa kuvyuma mwamilweza ndotolo. Muhulisenu vihula vize namusaka amikumbulule. Muveji nawa atela kuhulisa kala vihula ali navyo, nakulihanjikila yivene. Nge munasake, kaha sonekenu vyuma mwahanjika. Munahase nawa kuhulisa muyachi weka wavitumbo uze nauhasa kuzata kanawa.
Hitulukenu muvyuma namilweze ndotolo, nakumona ngwenu munatambula vitumbo vyakwoloka
Nge munafumu kuli ndotolo. Hitulukenu namuveji muvyuma namilweze ndotolo. Mwatela kumona ngwenu muveji natambula vitumbo vyakwoloka. Mulwezenu akavangize kanawa jindongi jamwakunwina vitumbo, nakulweza ndotolo nge kuli ukalu umwe. Mwatela kufwelelesa muveji ngwenu mwapwa kanawa nakumukolezeza akavangize vyuma vyosena vamulwezanga kuli ndotolo. Mulwezenu atachikize kanawa musongo wenyi.
Omu namupwa muChipatela
Mwatela kumona ngwenu munasoneka kanawa mapapilo osena amuveji
Undenu muchima nakupwa vakuvanguluka. Nge muveji himwaya kuchipatela, eji kulizakaminanga chikuma. Nge namuunda muchima, kaha namulinga vyuma mujila yakwoloka. Mwatela kumona ngwenu munasoneka kanawa mapapilo osena amuveji. Mwatela kuvumbika vishinganyeka vyamuveji najila mwasakila kumukilamo. Nge keshi nakuhanjikako, kaha mwatela kukavangiza vyuma ahanjikanga shimbu kanda avize chikuma. *
Valwezenu kanawa omu yili misongo
Hanjikenu navo kanawa. Pwenu vakukasunuka kuya nakuhanjika navaze vazata muchipatela. Nge namuhanjika navo mujila yamwaza yakalemesa, kaha navasuuluka kumikafwa vyuma vyosena namusaka, nakuzakama muveji. Muvipatela vimwe, muveji veji kwiza nakumutala kuli vandotolo vakulisezaseza. Namulinga kanawa nge namuvalweza vyuma vanahanjika vakwavo vandotolo. Hakuwana nge enu mwatachikiza kanawa muveji wenu, shikaho mwatela kuvalweza omu yili misongo.
Kanda kulipula navo jipamiko
Hanjikenunga navo nakalemesa. Mwatela kwanuka ngwenu vandotolo veji kuzatanga chikuma, kaha veji kuzeya. Shikaho, mwatela kuvevwila keke nakuhanjika navo mujila yamwaza. (Mateu 7:12) Hanjikenunga navo mukalemesa nakuvasakwilila hamilimo yavo vanakuzata. Echi nachivakolezeza vazate kanawa nakuzakama muveji.
Tuvosena tweji kuvizanga, oloze nge namuwahishilanga chimweza vyuma, nakukafwa muveji, kaha nahase kuyoya washi.—Vishimo 17:17.
^ par. 8 Jishimbi jamafuchi nalisesa vatwama nalyo vaveji lyakusakula mujila navavokilamo vyalihandununa-handununa. Mwatela kumona ngwenu mapapilo amuveji akuchipatela vanawasoneka mijimbu yakalinwaha.
