Vakweze vamwe veji kufumanga hembo lyavisemi javo nakuya nakuzata milimo kujingalila jeka. Oloze nge milimo yinakumu veji kukindulukanga kuli visemi javo. Uno nayenu munakinduluka kuli visemi jenu tahi?

Vakweze vamwe veji kuchiwananga kupwa chachikalu kukinduka nakutwama navisemi javo numba tuhu vavazanga chikuma. Chakutalilaho, mwanapwevo umwe walijina lyaSarah * ahanjikile ngwenyi: “Kutwama uka wami changukafwile ngulizachile milimo yami chakuzeneka kupendamina hali mutu. Oloze kukinduluka cheka kuvisemi jami changulingishile ngwivwenga nge vachili nakungulela.” Mukweze walunga walijina lyaRichard nayikiye ashinganyekele mwomumwe. Ambile ngwenyi: “Kangweshi nakusaka kukinduluka kuvisemi jamiko, mwomwo nachipwa nge ngukemba uze vali nakulela.”

Nge uli muukalu wamuyachou, kaha uli nakwivwa sonyi kukinduluka kuli visemi jove, chihande chino nachikukafwa.

Ukalu wajimbongo. Vakweze vavavulu veji kwivwanga kuwaha kufuma hembo nakuya nakutwama kweka, oloze mukuhita chalwola vyuma vyeji kuvakaluhwilanga. Richard, ou tunavuluka ahanjikile ngwenyi: “Jimbongo josena ngwapwile najo jakuminyine kukulanda vyakulikafwa navyo.” Omu mukiko ahanjikile naShaina kanyike wapwevo uze asele visemi jenyi te ali namyaka 24. Kaha akindulukile omu mwahichile mwaka umwe natukweji 6. Ambile ngwenyi: “Ngwafumine hembo chakuhona jimbongo. Kuze ngwayile ngwapwile najimbongo, oloze ngwahonene mwakujizachishila. Kaha ngwakindulukile hembo namikuli.” *

Kuhona milimo. Vatu veji kwivwanga kupihya chikuma nge vanavafumisa hamilimo kaha nachiyoyelo cheji kukaluhwanga. Shaina ambile ngwenyi: “Ngwayile kushikola yakulinangula milimo yakuhana vitumbo kuvipatela, kahomu ngwakumishile ngwaputukile kuzata. Oloze omu yakumine milimo ngwapwile muukalu. Ngwatwaminenga kungaliya yakwimbo kuze kakwapwile milimo yize ngwalinangwileko.”

Kufwelela vyuma vize kawamweneko. Vakweze vamwe veji kushinganyekanga ngwavo vyuma vinahase kupwa kanawa nge vanakutwama uka wavo. Oloze omu veji kulinganga nge vanaputuka kuzata, veji kumona jino ngwavo vyuma kumana vyapwa vyavikalu, keshi nge muze vashinganyekele hakavangako. Veji kumona ngwavo chapwa chachikalu mutu kulimanyina.

Watela kulweza visemi jove nge unakusaka kukinduluka. Kuvisemwa vimwe, vana vatela kushimutwila navisemi javo havyuma vyakufwana nge: Milimo muka muzatangako hembo, mangana ukafweko tanga yosena? Vyuma muka mulinga mangana uwanengako jimbongo jakulikafwa najo? Nge unakinduluka kuli visemi jove watela kwononoka nakuvavumbika mwomwo uli nakuyoyela kukanda yavo.—Lushimbi lwamuMbimbiliya: Kulovoka 20:12.

Linangulenu mwakulamina jimbongo. Mukanda waThe Complete Guide to Personal Finance: For Teenagers and College Students wamba ngwawo: “Jila muzachishilamo jimbongo jove yinahase kukulingisa ulame kanawa jimbongo jove chipwe chiku. . . . Nge mulandanga vyuma chamulanjila kaha jimbongo jove kajeshi kuswako.”—Lushimbi lwamuMbimbiliya: Luka 14:28.

Hulisa vakukafwe. Visemi chipwe vakulwane veka vanahase kukukafwa mwakulamina jimbongo namwakujizachishila. Mwanapwevo walijina lyaMarie ambile ngwenyi: “Sepa lyami angunangwile mwakunonekela vyuma vyakulanda, kuputuka navyuma ngunakusaka chikuma navyuma vize kangweshi nakusaka chikumako. Ngwalikomokelele hakumona omu ngwalanjilenga vyuma chamulanjila. Ngwalinangwile mwakuzachishila kanawa jimbongo jami mukuyoya.”—Lushimbi lwamuMbimbiliya: Vishimo 13:10.

Zatenu kala milimo. Mwatela kukilikita nangolo mangana mutonde milimo yakuzata. Mwatela kwanuka ngwenu, vatu vamwe vanahase kumilweza ngwavo mwatela kuzata kaha milimo yize mwayilile nakulinangula kushikola. Nge namusakula kaha milimo yize mwasaka, kaha nachimikaluhwila kuwana milimo mulifuchi lino. Ngocho, muchishishisa chakufwila kaha kuzata milimo mwasaka, mwatela kwitavila kwingila kala milimo yize namuwana. Mwatela kwanuka ngwenu chuma chachilemu shina kuzata kanawa milimo yenu nakusuuluka. Nge mutu nashimbula hamilimo yimwe, kaha eji kupwanga nauhashi wakuzata milimo. Shikaho, chapwa chachilemu shina kuzanga kaha milimo yize unakuzata, keshi kuzata milimo yize wazangako.