OMU YAHANJIKA MBIMBILIYA
Vyuma vyakulijila
Vatu vamwe vamba ngwavo vyuma vyakuyoya vyeji kulijilanga vivene. Veka ngwavo Kalunga atengele vyuma, oloze mukuhita chalwola vyuma kana vyeji kulyalumunanga nakupwa mweka. Uno Mbimbiliya yahanjika ngwayo ngachilihi?
Uno Mbimbiliya yetavila ngwayo vyuma vyamumelu vyalijilile vivene tahi?
Mbimbiliya yahanjika ngwayo: “Hakuputuka Kalunga atangile melu namavu.” (Kuputuka 1:1) Oloze kayavuluka omu Kalunga atengelelemo chuma hichumako. Shikaho, twatela kwijiva kaha ngwetu, Mbimbiliya yamba ngwayo vyuma vyosena vavilingishile vipwengako. Mukanda waKuputuka 1:1 watulweza owo alingishile vyuma kana vipwengako.
Vaka-sayasi vamba ngwavo vyuma vyaliwanyine nakulipula vihanda vize vyalimwangile nakulitunga vyuma vyeka vyamumelu vyakufwana nge vatanganyika, najipulaneti, navyeka vyangana. Mbimbiliya kayetavila kunangula kanako, oloze yamba ngwayo Kalunga atengele vyuma vyosena vyamumelu navyahamavu chamokomoko najila yakutenga azachishililemo.
“Hakuputuka Kalunga atangile melu namavu.”—Kuputuka 1:1.
Uno mujimbu wamuMbimbiliya wasolola nge muyachi wachuma unahase kwalumukako chindende kweseka nokwo uli tahi?
Eyo. Mbimbiliya yamba ngwayo Kalunga atengele vyuma vyosena kweseka ‘namwaya miyachi yayo.’ (Kuputuka 1:11, 12, 21, 24, 25) Uno muyachi wachuma unahase kwalumukako chindende tahi? Eyo. Uno echi chasolola nge muyachi wachuma unahase kwalumuka nakupwa muyachi weka tahi? Nduma.
Chakutalilaho, mu 1970 vaka-kulinangula vyatujila valinangwile vyatujila vahalitungu lyaGalápagos. Vawanyine nge ava tujila veji kusuhwanga mivumbo hajingonde jimwe numba vahase kuyoya kanawa. Echi chalingisa vatu vamwe vakundwize kunangula chakwamba ngwavo vyuma vyeji kulijila vivene. Uno natwamba ngwetu tujila kana veji kwalumukanga nakupwa veka tahi, nyi mivumbo yavo kaha yikiko yeji kwalumukanga kweseka najingonde? Mukuhita chamyaka, vaze tujila vamivumbo yayihi vavulile chikuma. Echi chalingishile mutu alinangula chikuma Jeffrey H. Schwartz ambenga ngwenyi, numba tuhu muyachi wachuma unahase kwalumukako chindende kweseka nangonde, oloze katweshi kwamba ngwetu ‘unalitungu nakupwa muyachi wekako.’
Uno vyuma yanangula Mbimbiliya navize vanangula vaka-sayasi vyakwamba ngwavo vyuma vyalijilile vivene vyalifwana tahi?
Mbimbiliya yamba ngwayo Kalunga “atangile vyuma vyosena.” (Kusoloka 4:11) Akumishile milimo yenyi yosena numba jino ‘anoke.’ (Kuputuka 2:2) Echi kachalumbununa nge atengele chuma chimwe kaha himwatwama nakuvandamina chuma kana chilyalumune-alumune numba atenge chikwavoko nduma. * Kunangula kanechi chalimbalaka naMbimbiliya yize yamba ngwayo, “Yehova atengele melu namavu, nakalungalwiji navyuma vyosena vyatwamamo.”—Kulovoka 20:11; Kusoloka 10:6.
“Ove Yehova Kalunga ketu, ove watamo kutambula upahu nakavumbi nangolo, mwomwo ove yove watangile vyuma vyosena.”—Kusoloka 4:11.
Linangulenu vyavivulu: Mbimbiliya yamba ngwayo: “Vilinga vyenyi evi vahona kumona, nangolo jenyi jahaya myaka yosena nauKalunga wenyi, vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga.” (Wavaka-Loma 1:20) Kulinangula vyaKalunga cheji kukafwanga mutu atachikize kanawa omu chalumbunuka kuyoya, navyuma vyamwaza vize Kalunga ashika kukalingila vatu vamichima yamwaza. (Muka-kwambulula 12:13; WavaHepeleu 11:6) Nge muli nakusaka mijimbu yayivulu, kaha talenu ha www.pr418.com. chipwe hulisenu Vinjiho jaYehova vamungalila yenu. Talenu HAVYUMA YANANGULA MBIMBILIYA > VIHULA VYAMUMBIMBILIYA VAKUMBULULA.
^ par. 12 Numba tuhu vatu vamwe vamba ngwavo Kalunga atengele vyuma vyahano hamavu mumaola 24 alikumbi, oloze Mbimbiliya kayahanjika ngochoko. Nge muli nakusaka mijimbu yayivulu, kaha talenu mumbuloshuwa yaWas Life Created? mafwo 24-27, vasoneka kuli Vinjiho jaYehova. Uli nawa naha www.pr418.com.
Pamo Nauzanga Nawa
SAYASI NAMBIMBILIYA
Vyuma Vashinganyeka Vatu Kupandama kuMaputukilo aKuyoya
Vyuma veji kuhanjikanga vaka-kulinangula vyuma vyakuyoya, navaka-kulinangula omu yazatanga mijimba yavyuma vyakuyoya, navimbuke, navandotolo vatala havyakupula, naveka hanyima yakwesekesa vyuma valinangula navize yahanjika Mbimbiliya.
