CHIHANDE CHACHINENE
Vihula Vitatu Vize Vatu Vasaka Kuhulisa Kalunga
OMU Susan apwile namyaka yakusemuka 7, sepa lyenyi Al vamuwanyine namusongo wakalepa kaha nawa mahuyungu kawapwile nakuzata kanawako. Ngocho vamupachikile kumakina akuhwimina. Jino Susan aputukile kuhulisa Kalunga ovyo etavishila kuyanda. Mujimbu wenyi vausonekele mulipapilo lyamijimbu lyaThe New York Times lyaJanuary 6, 2013.
Omu ayile muchipatela nakumeneka sepa lyenyi Al, Susan ahulishile naye ngwenyi: “Mwomwo ika Kalunga nalingila vyuma kana kuli kanyike wamundende?”
Naye amukumbulwile ngwenyi: “Kapilishitu eji kwambanga ngwenyi Kalunga ejiva ovyo eji kulingilanga vyuma kana, oloze ami kangwatachikijileko.”
Kuheta mu 1954 te munahichi myaka yivali, ndotolo Jonas Salk awanyine vitumbo vyamusongo wakalepa. Kaha naye yaSusan ambile ngwenyi Kalunga ikiye namuhane chinyingi chakuwana vitumbo kana.
Oloze Susan ambile ngwenyi, “Nge Kalunga akafwile vandotolo vaze vapwileko lyehi vawane washi vitumbo, kachi musongo wasepa lyami Al vaukile.”
Susan akukulwile ngwenyi: “Omu mwahichile myaka 8, sepa lyami Al afwile. Halwola kana ngwafwelelele ngwami Kalunga katwamakoko.”
Ngana muze evwile Susan, vatu vavavulu vaze vanamononga ukalu wamuyachou, kavawana mutu wakukumbulula vihula vyavo vize veji kuhulisanga Kalungako. Echi cheji kulingisanga vamwe vahone kufwelela muli Kalunga. Veka vanahase kufwelela tuhu muli Kalunga, oloze oku vali nakukakasana.
Vatu vamwe veji kukakasana chipwe kuhona kufwelela muli Kalunga mwomwo yavyuma vyakuhenga veji kunangulanga mumauka akwitava. Vamona ngwavo mauka akwitava anahono kukumbulula vihula vyavo. Uno vihula muka veji kuhonanga kukumbulula? Vihula kana shina vize veji kulipikanga navyo vatu vaze valivuluka ngwavo vafwelela muli Kalunga. Tushimutwilenu havihula vitatu vize vatu vavavulu vasaka kuhulisa Kalunga, nomu Mbimbiliya yavikumbulula.
1 “MWOMWO IKA WETAVISHILA KUYANDA?”
Ika veji kuhulishilanga chihula kana?
Vatu vavavulu veji kwambanga ngwavo, ‘Nge Kalunga atuzanga, mwomwo ika etavishila kuyanda?’
VYUMA WATELA KUSHINGANYEKAHO: Pamo tunahase kulikomokela havisemwa vyavatu vamwe vize vafwelela, nakushinganyeka ngwetu vanakulinga vyuma vyakuhenga. Chakutalilaho, muvisemwa vimwe chapwa chakutamo mutu kulitala meso nameso namukwavo nge vali nakuhanjika, oloze muvisemwa vikwavo chapwa kasautu. Shikaho, twatela kwijiva ngwetu vanakulinga vyuma vyakwoloka kweseka nachisemwa chavo, chikalu kaha nge natuvatachikiza kanawa.
Kutala omu keshi mukiko twatela kulinga hakusaka kwijiva vyuma ajina Kalungako tahi? Vatu vavavulu vashinganyeka ngwavo kuyanda chavatu chasolola nge Kalunga katwamakoko. Oloze vatu vaze vatachikiza ovyo Kalunga etavishila kuyanda vafwelela ngwavo Kalunga kwatwama.
VYUMA YAHANJIKA MBIMBILIYA: Twatela kwanuka ngwetu vishinganyeka vyaKalunga vyalihandununa navishinganyeka vyetu. (Isaya 55:8, 9) Evi vikiko vyatulingisa tuhone kwivwishisa kanawa ovyo vyalingisa Kalunga ahone kufumisako kuyanda.
Chipwe ngocho, Mbimbiliya kayatuseza mulihayihayi nakutulingisa tufwelele mazu veji kuhanjikanga vatu vavavulu ngwavo, “Mutu keshi kuhasa kwivwishisa vilinga vyaKalungako mwomwo azata mujila yakukomwesa.” Oloze yeji kutulwezanga tulinangule vyaKalunga nakumutachikiza kanawa novyo eji kulingilanga vyuma kana. * Kaha nawa tunahase kupandama chikuma kuli ikiye.—WaYakova 4:8.
2 “MWOMWO IKA MAUKA AKWITAVA ANAKUNANGULA VYUMA VYAMAKULI?”
Ika veji kuhulishilanga chihula kana?
Vatu vavavulu veji kwambanga ngwavo, ‘Nge Kalunga vamumona kupwa wamulemu, keshi vaka-kumulemesa kaveshi kunangula vyuma vyamakuliko.’
VYUMA WATELA KUSHINGANYEKAHO: Achishinganyekenu hali mwana uze mwalikanga kuli Ise, kaha himwafuma hembo nakuya nakutwama kwauka wenyi nakundupukila muvilinga vyavipi. Numba tuhu Ise kasakileko, oloze mwamwitavisa alinge vyuma nasake. Uno nachipwa chakutamo vatu kukukulula ngwavo Ise ikiye apihishile tahi, chipwe ngwavo uze mwana katwama naIseko nyi? Nduma. Chochimwe nawa, navyuma vyamakuli vanangula mumauka akwitava vyasolola nge Kalunga etavila vatu valisakwile vavene vyuma vasaka kulinga.
VYUMA YAHANJIKA MBIMBILIYA: Kalunga ahunga mauka akunangula vyamakuli. (Yelemiya 7:29-31; 32:35) Kaha nawa ahana vatu lisesa lyakulisakwila vyakulinga. Vatu vavavulu vaze valivuluka ngwavo vafwelela Kalunga veji kukavangizanga vyuma vyamakuli vanangula mumauka kana nakulinga vyuma vafwila mumichima yavo.—Mateu 15:7-9.
Oloze liuka lyakwitava lize etavila Kalunga kalyanangula vyuma vyamakuliko. * Yesu ambile ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowano 13:35) Zangi kaneyi yatela kupwa “yakuzeneka kulyonga.” (Wavaka-Loma 12:9) Mauka amavulu anahono kusolola zangi kaneyi yamwenemwene. Chakutalilaho, omu vatu valizungishilenga hamalimi mulifuchi lyaRwanda mu 1994, vatwamina jamauka akwitava vajihilenga vatu vavavulu vamujichachi javo mwomwo yakuhanjika lilimi lyeka. Oloze Vinjiho jaYehova kavazanyine mujita kanako, kaha nawa Vinjiho vavavulu vaswekele vandumbwavo nakuvakinga numba tuhu kulinga ngocho chapwile ponde. Vyuma kanevi valingile vyasolola nge liuka linahase kunangula muchano.
3 “MWOMWO IKA TWEJI KUYOYELANGA?”
Ika veji kuhulishilanga chihula kana?
Vatu vavavulu veji kuhulisanga ngwavo, ‘Mwomwo ika vatu veji kuyoyelanga myaka 80 chipwe 90 kaha hikufwa? Chuma muka cheji kulingisanga vayoye hakatando kakandende kaha?’
VYUMA WATELA KUSHINGANYEKAHO: Vatu vavavulu vaze kavafwelela Kalungako vali nakulikomokelanga havyuma vyavivulu vize atenga Kalunga. Vamba ngwavo vyuma vyamumelu vyakufwana nge pulaneti yetu, nakakweji, navatanganyika vavitulika kanawa muutangatanga nakulingisa vyuma vitwaleho kuyoya. Veji kuhanjikanga ngwavo, ngolo jize jeji kulingisanga vyuma vyamuutangatanga vihone kusosoloka muvihela muze vavihaka cheji kulingisa vyuma vyakuyoya vyahamavu vihone kufwa. Nge vyuma kanevi navavisosolola chindende, kaha vyuma vyosena vyahano hamavu navifwa.
VYUMA YAHANJIKA MBIMBILIYA: Vatu vavavulu vakukulula ngwavo Kalunga wauchiko hakumona omu vatu makumbi ano vanakuyoya myaka yayindende kaha. Oloze vyuma atenga Kalunga vyasolola nge Tengi kwatwama. (Wavaka-Loma 1:20) Vyasolola nawa nge kwatwama vyuma vimwe atengelele vyuma kana, kuhakilako vene nayetu vatu. Kalunga atengele vatu vatwame hamavu myaka yosena, kaha mwakatesamo kujina chenyi.—Samu 37:11, 29; Isaya 55:11.
Numba tuhu tunahase kumona ngwetu Kalunga kwatwama hakukekesa vyuma atenga, oloze eyi keshi yikiko jila asaka tumutachikijilemoko. Hakusaka tutachikize vyuma ajina Kalunga hakutenga vatu, twatela kuhanjikanga nenyi. Eji kuhanjikanga nayetu kuhichila muMbimbiliya. * Vinjiho jaYehova vali nakumilomba mutale muvakumbulula chihula kana hakapetulu ou.
^ par. 17 Nge munakusaka kutachikiza ovyo Kalunga etavishila kuyanda, talenu kapetulu 11 mumukanda waUno Chikupu Mbimbiliya Yanangula Vyuma Muka? vasoneka kuli Vinjiho jaYehova. Uli nawa naha www.pr418.com.
^ par. 23 Nge munakusaka kutachikiza vyavivulu, talenu kapetulu 15 mumukanda waUno Chikupu Mbimbiliya Yanangula Vyuma Muka? vasoneka kuli Vinjiho jaYehova. Uli nawa naha www.pr418.com.
^ par. 29 Nge munakusaka kutachikiza vyavivulu, talenu kapetulu 3 mumukanda waUno Chikupu Mbimbiliya Yanangula Vyuma Muka? vasoneka kuli Vinjiho jaYehova. Uli nawa naha www.pr418.com.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Kwitava Chosena Cheji Kupandamisanga Vatu Kuli Kalunga Tahi?
Vishina vivali vize vavuluka muMbimbiliya vyakumbulula chihula kana.
KUKUMBULULA VIHULA VYAKUPANDAMA KUMBIMBILIYA
Mwomwo Ika Tweji Kuyoyelanga?
Kutala mwalihulisaho lyehi ngwenu, ‘Mwomwo ika ngweji kuyoyelanga?’ Talenu omu Mbimbiliya yakumbulula chihula kana.
MIKANDA NAJIMBULOSHUWA
Kulihi Tunahase Kuwana Muvakumbulwila Vihula Vyavilemu VyamuKuyoya?
Would you choose science, philosophy, or the Bible?
