Vatu vamwe veji kwambanga ngwavo kachapwa chamwaza kusangejeka mwanako. Veka veji kwambanga ngwavo kusangejeka mwana chinahase kumulingisa alimone kupwa wamulemu chikuma, nakulinga kala vyuma nasake.

Numba nge mweji kusangejekanga mwanenu, oloze mwatela kushinganyekanga jijila namumusangejekelamo. Mwatela kumona numba nge kusangejeka kana nachimukolezeza azovoloke, chipwe nachimulingisa ahone kuzovoloka. Uno kusangejeka muka chinahase kulingisa mwana azovoloke?

Kusangejeka chimwe kachapwa chamwazako. Tutalenu havyakutalilaho vimwe:

Kusangejeka nakuhambakanyisaho kachapwa chamwazako. Visemi vamwe veji kusangejekanga vana vavo mangana vana valimone kupwa vavalemu. Visemi veka vashinganyeka ngwavo, nge navasangejeka mwanavo nakuhambakanyisaho, kaha mwazovoloka. Ndotolo David Walsh asonekele ngwenyi, “vanyike veji kwijivanga numba nge kusangejeka kana chamuchano chipwe chamakuli. Nge namuvasangejeka havyuma vize kavalingile kanawako, kaha kaveshi kwitavilanga kusangejeka chenuko.” *

Chapwa chakutamo kusangejeka mwana hauhashi atwama nawo. Achishinganyekenu mwanenu wapwevo atachikiza kufunjejeka vyuma. Nachipwa chamwaza kumusangejeka mangana afwile kulinganga vyuma kana. Oloze nge namumusangejekanga ngwenu uhashi wenyi wapwa wakusemuka nawo, kaha nachimulingisa ashinganyeke ngwenyi mutu keshi kuhasa kulinangula vyuma vyekako kuvanga kaha nge asemukile nauhashi kana. Kaha nawa nahase kwivwa woma kulinangula vyuma vyeka mwomwo ngwenyi keshi kuvihasako. Nahase kwamba ngwenyi, ‘nge kangwasemuka nauhashi kanako, kaha mwomwo ika nanguliyanjishila kulinangula chuma kana okunyi kangweshi kuchihasako?

Kusangejeka mwana hamuchima wenyi wakufwila kulinga chuma. Visemi vaze veji kusangejekanga vana vavo hamilimo yize vanatesamo, veji kulingisa vana vatachikize ngwavo chasakiwa kuzata nangolo  numba mutu apwenga nauhashi. Mukanda umwe wamba ngwawo, nge vanyike navatachikiza ngwavo “kupwa nauhashi hachuma chimwe chasakiwa kukilikita nangolo, kaha cheji kuvahana pwipwi yakufwila kuzata chikuma. Numba nge vanahono kutesamo chuma vanakulinangula kaveshi kuhombako, oloze navatwalaho lika kulinangula.”—Letting Go With Love and Confidence.

Sangejekenu mwana hamuchima wenyi wakufwila kulinga chuma, keshi hauhashi asemuka nawoko. Nge namulweza mwanenu ngwenu, “Ngunamono watwama namuchima wakufwila kufunjejeka vyuma,” kaha mwevwa kuwaha chikuma kuhambakana kumulweza ngwenu, “Watwama nauhashi wakufunjejeka.” Jijila josena jivali jinapu jamwaza kusangejeka mwana, oloze jila yamuchivali yinahase kulingisa mwana amone ngwenyi kutesamo chuma kuvanga wasemuka nauhashi kana.

Nge namusangejeka mwana ngwenu watwama namuchima wakufwila kulinga vyuma, kaha mwamona ngwenyi nge mwazata nangolo nahase kutesamo vyuma kana. Kutachikiza chuma kana nachimukafwa alifwelele nakuhaka mangana kukulinangula kala milimo.—Lushimbi lwamuMbimbiliya: Vishimo 14:23.

Kafwenu mwanenu atwaleho lika kulinangula numba nge nahono. Navatu vaze vejiva vyuma veji kulimbenjanga mukuyoya chavo. (Vishimo 24:16) Veji kuzachila havyuma vanalimbenje nakulinga jino vyakwoloka. Munahase kukafwa ngachilihi mwanenu afwile kutwalaho lika kulinangula numba tuhu nalimbenje?

Chakutalilaho, nge namusangejeka mwanenu ngwenu, “Ove wasemuka nauhashi wakutachikiza makumi,” oloze nge likumbi limwe mwahona vyeseko, kaha nahase kushinganyeka ngwenyi atela uhashi wenyi unakumu jino. Shikaho kusangejeka mwana mujila yangana cheji kwenyekanga mwana.

Nge namusangejeka mwana ngwenu akwechi muchima wakufwila kuzata chuma kana, kaha namumukolezeza azate nangolo. Ngocho nge nalimbenje hakuzata mulimo kana, kaha mwazachisa jila yeka mangana atachikize chuma kana.—Lushimbi lwamuMbimbiliya: WaYakova 3:2.

Mulwezenu vyuma nalimbenje. Nge namulweza mwanenu mujila yamwaza vyuma nalimbenje, kaha kacheshi kumupihisa kumuchimako. Nge namusangejekanga mwanenu havyuma vyamwaza nalingi, kaha nachimukafwa azate nangolo nakuzovoloka. Ngocho enu namwanenu namuwahilila hakumona omu mwafukila havyuma mwalinga.—Lushimbi lwamuMbimbiliya: Vishimo 13:4.