KWATWAMA vyuma vyavivulu vyeji kulingisanga mutu apwenga kapuputa vyakufwana nge ponde, misongo chipwe ukalu weka. Vyuma kanevi vyeji kunehanga ukalu kumishisa yameso, nakuwongo. Vatu vaze veji kufwanga meso veji kuvahunganga, nakuvevwa woma kuvatu. Oloze tupuputa vamwe veji kutwamanga nakusuuluka chamokomoko naupuputa.

Meso eji kutukafwanga tumone nakutachikiza vyuma vyamulifuchi. Shikaho, nge mutu nafu meso eji kupendaminanga jino hakwivwa, nakuhumbika, nakukwata, nakumakila.

Mukanda umwe wamba ngwawo, vaka-kuhehwojola vahanjika nge wongo ukwechi uhashi “wakwalumuka kweseka nomu vili vyuma.” Wamba nawa ngwawo: “Wongo weji kutachikiza ngwawo meso anafu, kaha weji kukundwizanga jino vihanda vikwavo vize vyazata kukwivwa, nakukuhumbika, nakukukwata chipwe kumakila.” (Scientific American) Tushimutwilenu jino havyuma kanevi.

Kwivwa: Nge mutu nafu meso, eji kupwanga jino namatwitwi chikuma, nakulama mazu avatu, nomu veji kutambukanga. Fernando, lunga uze afwa meso ambile ngwenyi, “Ngwalinangula kutachikiza lizu lyamutu himutu, nomu eji kutambukanga.” Juan uze apwa kapuputa ambile ngwenyi: “Kapuputa hikapuputa ejiva kanawa mazu avatu.” Kaha nawa eji kutachikizanga numba nge mutu anakuhanjika napihilila chipwe nawahilila.

Tupuputa nawa veji kutachikizanga okwo kunakufuminyina chivumo nokwo chinakuya, nakwijiva numba nge kuli vatu vavavulu chipwe vavandende.

Kuhumbika: Nge mutu nafu meso, mazulu enyi eji kupwanga chikuma nangolo jakuhumbika. Chakutalilaho, nge ali nakutambuka mujila, eji kutachikizanga  numba nge hachihela kana vali nakuteleka vayishi chipwe hachisakano hali nyama, chipwe vyuma vyeka. Vyuma kana vyeji kumukafwa ashinganyeke ngwenyi hachihela kana hali musenge chipwe zuvo.

Kukwata: Mwata Francisco uze apwa kapuputa ambile ngwenyi: “Minwe yami yikiko yapwa meso ami.” Minwe yeji kungukafwanga kukwata mukombo nakutachikiza vyuma. Manasés, uze asemukile kapuputa nakulinangula kutambuka namukombo ambile ngwenyi: “Nge nguli nakuya kumwe, mukombo weji kungukafwanga ngutachikize kanawa oho ngunahete.”

Minwe yakumavoko nawa yeji kuvakafwanga mangana vahase kutanga mikanda yize vasoneka muVasona vaTupuputa. Makumbi ano kuli vinoma vyavivulu vize vinakukafwa tupuputa valinangule vyuma vyakushipilitu. Kuli nawa navihande vyamazu akukopa hachisaji, navyeka vize vili hajikopyuta. Vinoma kana vinakukafwa tupuputa valinangule Mbimbiliya nakwivwilila kuvihande vyeka vyahanjika haMbimbiliya. *

 Vinoma kanevi vyakushipilitu vinakafwe nakuvendejeka chikuma Paqui nalunga lyenyi uze tunavuluka hakavanga. Vanalinungu hamwe navandumbwavo muchikungulwilo chaVinjiho jaYehova chamungalila yavo nakupwa jino vakuwahilila. Paqui ambile ngwenyi: “Tuli nakulivwisa kuwaha kuyoya hakulikata hamwe navakwetu.”

Numba tuhu upuputa weji kunehanga ukalu, oloze kuvavendenjeka nakuvakafwa cheji kuvalingisa vejilile nakuyoya kwijiva nge mwavatu vosena.