VYUMA YAHANJIKA MBIMBILIYA

Hakuwana nge aka kaye vavuluka keji ‘kufwila’ vyuma ahunga Kalunga, ngocho kumana kaye kana kemanyinako vyuma vyeka keshi mavu aveneko. Kemanyinako vatu vaze valikanga kuli Kalunga, vaze valilingisa vavene kupwa vaka-kole jaKalunga. (WaYakova 4:4) Vatu kana “navakavazangamisa nakunongesa chahaya myaka yosena.” (Wavaka-Tesolonyika 2, 1:7-9) Oloze vaze vononoka Yesu Kulishitu nakukana kupwa “vaka-kaye” navakayoya haya myaka yosena.—Yowano 15:19.

Mukanda WaYowano 1, 2:17 wakukulula ngwawo: “Ou eji kulinganga mwaya muchima waKalunga mwatwamanga haya myaka yosena.” Chikupu vene, vatu kana navakalivwisa kuwaha kuyoyela hano hamavu ngana muze wahanjika mukanda waSamu 37:29 ngwawo: “Vaka-kwoloka navakaheta mavu, kaha navakatwamangaho haya myaka yosena.”

“Kanda namuzanga kaye chipwe vyuma vyamukayeko. Kachi nge mutu mwazanga kaye, kaha zangi yakumuzanga Setu kayeshi muli ikiyeko.” —WaYowano 1, 2:15.

VYUMA YAHANJIKA MBIMBILIYA

Kaye nakakakuma mujijila jivali. Chatete, Kalunga mwakanongesa mauka akwitava aze emanyinako pwevo muka-ujila uze vavuluka ngwavo “Mbavilone Yayinene.” (Kusoloka 17:1-5; 18:8) Eji kulisasa ngwenyi ononoka kuli Kalunga, oloze eji kuzachila hamwe namauka aupolitiki nakuvahungumwisa. Kutwala muze, ava vaka-kuyula navakamwalumukila. Mbimbiliya ngwayo: Navakahunga “uze pwevo muka-ujila nakumwenyeka nakumuseza uselesele. Navakalya nyama yenyi, navakamwocha nakakahya.”—Kusoloka 17:16.

Chamuchivali, Kalunga mwakalitalasana jino ‘navamyangana vahamavu vosena.’ Kaha navakavanongesela hamwe navatu vakuhuka vosena “kujita yahalikumbi lyalinene lyaKalunga Wangolo Josena” yize vavuluka ngwavo “Alamangetone.”—Kusoloka 16:14, 16.

“Mutondenu Yehova, enu vavavwovu vahamavu, . . . Tondenunga kwoloka, tondenunga kuvova. Kwiji pamo navakamisweka halikumbi lyautenu waYehova.”—Zefwanyiya 2:3.

VYUMA YAHANJIKA MBIMBILIYA

Kano kaye nakakakuma omu mujimbu waWangana waKalunga navakawambulula mukaye kosena. Kufumaho jino numba chiyulo chaKalunga chikeze nakufumisaho jifulumende josena hano hamavu. (Ndanyele 7:13, 14) Yesu Kulishitu ambile ngwenyi: “Mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.” (Mateu 24:14) Kwambulula mujimbu wamwaza chasolola nge Kalunga akwechi chiyulo nazangi, kaha asaka vatu vakayoye. Vinjikizo vikwavo shina jijita, namindenda, najizala jakalombolombo namisongo.—Mateu 24:3; Luka 21:10, 11.

Mbimbiliya nawa yatulweza omu navakapwa vatu “hamakumbi akukuminyina.” Yamba ngwayo: “Hamakumbi akukuminyina nahakapwa lwola lwalukalu. Mwomwo vatu navakapwa vaka-kulizanga vavene, vaka-kuzanga jimbongo . . . vaka-kulikanga kuli visemi, . . . vaka-kuhona muchima wakulikanyisa vavene, vaka-ukenya, vaze kavazanga vyuma vyamwazako, . . . vaka-kuzanga viseke muchishishisa chakuzanga Kalunga.” *—WaChimoteu 2, 3:1-5.

Vyuma vyosenevi vyaputukile kusolola kufuma vene haJita yaKaye mu 1914. Vinjiho jaYehova valisuula kuvilika Wangana waKalunga kujimbango josena jiwana muno mukaye. Kaha nawa mangazini yize veji kuhananga chikuma kuvatu vayivuluka ngwavo, Kaposhi Kakutalila Ali Nakuvilika Wangana waYehova.

“Tonenunga, mwomwo kamwatachikijile likumbi chipwe olako.”—Mateu 25:13.