SARAH * wakuGhana, uze natwame muulo nalunga lyenyi Jacob hamyaka 17 ambile ngwenyi: “Kakavulu tweji kulikokwejwesanga nalunga lyami hajimbongo.” Ambile nawa ngwenyi: “Ngweji kulinganga vyuma vyavivulu vyakuzakama tanga, oloze lunga lyami keshi kungulweza jimbongo tuli najoko. Echi cheji kungwivwisanga chikuma kupihya, kaha mweji kuhitanga vene vyalumingo chakuzeneka kulihanjikisa.”

Lunga lyenyi Jacob etavilile ngwenyi: “Lwola lumwe tweji kulyambanga mwamupi, mwomwo yakuhona kulivwilila, nakulivwishisa, nakupihilila washi.”

Nathan wakulifuchi lyaIndia, uze ambatanga kalinwaha avulukile vyuma vyasolokele omu isewenu nanayewenu valizungishile. Kaha nayewenu “afundumukile nakuya.” Kufumaho, ngwahulishile tatawenu ahanjike oho hafumine vikokojola vyavo, ikiye amwene ngwenyi ngwamusaula. Kaha aputukile kututenukila tuvosena hembo.”

Pamo nayenu mwamona omu mazu amapi anahase kulingisa vatu valikokojwese mutanga. Vatu vanahase kuputuka kuhanjika mukuunda, oloze kutwala muze hinavaputuka kulinyijeka minwe. Tuvosena tweji kulimbenjanga mukuhanjika, oloze chinahase kupwa chachashi kushinganyekela vakwetu vyuma vyavipi. Chamokomoko tuhu naukalu kanou, kuli vyuma vinahase kutukafwa mangana tutwame mukuunda.

Vyuma muka mwatela kulinga nge munaputuka kulikokojwesa? Vyuma muka mwatela kulinga mangana mulinunge cheka mutanga? Uno vatu vanahase kutwama ngachilihi mukuunda mujitanga? Tangenu chihande chinakavangizaho.