CHIHANDE CHACHINENE | OMU MUNAHASE KUPWA VAKUUNDA MUTANGA
Vyuma Navikafwa Tanga Yitwame muKuunda
UNO mwashinganyeka ngwenu jindongi jamuMbimbiliya jinahase kukafwa tanga yenu yitwame mukuunda tahi? Tunamilombo mutange chihande chino mumone vyuma yahanjika Mbimbiliya nomu yinakafwe jitanga jimwe. Hunananenu havishina vize navimikafwa mutwame mukuunda natanga yenu, nakulinunga, nakuhonesa vikokojola.
JISHIMBI JAMUMBIMBILIYA JIZE JEJI KUKAFWANGA VATU VATWAME MUKUUNDA
MONENU MUKA-MAHYENU KUPWA WAMULEMU.
“Kanda kulinga chuma numba chimwe namuchima wakulikindukilako, chipwe namuchima wakulitohwesa chamokomokoko, oloze linyisenunga nakumona vakwenu ngwenu vamihambakana enu. Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.”—Wavaka-Fwilipi 2:3, 4.
Pwevo nalunga (C. P.) vaze vanatwame muulo hamyaka 19 vambile ngwavo, “Chapwa chamwaza mutu kumona muka-mahyenyi kupwa wamulemu.”
IVWILILENUNGA KANAWA.
“Vanukisenga lika valuukenga . . . vazeneke kupwa vaka-kukokojola, oloze vashiwisenga michima, vasololenga muchima wauvwovu kuvatu vosena.”—WaChituse 3:1, 2.
Pwevo nalunga (P. P.) vaze vanatwame muulo hamyaka 20 vambile ngwavo, “Chapwa chamwaza kwivwilila nakuhanjikanga nalizu lyalivwovu, nakalemesa kuli muka-mahyove nakwivwishisa kanawa muze natwale.”
PWENU VAKUUNDA NAKUTALILILA VAKWENU CHIKOKI.
“Kutalilila chikoki nachikunyula kapitau wajita, kaha lilimi lyalivwovu nalihokola chifuwa.”—Vishimo 25:15.
Pwevo nalunga (G. A.) vaze vanatwame muulo hamyaka 27 vambile ngwavo, “Shimbu jimwe muulo mweji kupwanga vikokojola, oloze mwatela kulitalilila chikoki nakufwila kuukumisa. Kulinga ngocho cheji kukumisanga ukalu mutanga.”
KANDA KULIVETANGA CHIPWE KULISAULANGAKO.
“Mwatela kuseza vyuma vyosenevi: utenu, namatoto, naupi, nahanjikiso yakasautu, namazu aunyengwe mukanwa kenu.”—Wavaka-Kolose 3:8.
Pwevo nalunga (B. D.) vaze vanatwame muulo hamyaka 20. Pwevo ahanjikile ngwenyi, “Lunga lyami atwama namuchima wamwaza. Apwa wakuunda kaha nawa keshi kungutukanako.”
PWENU NAMUCHIMA WAKUKONEKELA NAKUKUMISANGA WASHI UKALU.
“Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo.”—Wavaka-Kolose 3:13.
Pwevo nalunga (A. B.) vaze vanatwame muulo hamyaka 34 vambile ngwavo, “Kachapwa chachashi kuunda muchima nge mukwenu nakwivwisa kupihyako, mwomwo chapwa chachashi kuhanjika mazu amapi. Halwola kana chapwa chamwaza kusolola muchima wakulikonekela. Nge lunga napwevo navahona kulikonekelanga kaha ulo wavo kaweshi kuzamako.”
PWENU NAMUCHIMA WAKUHANA.
“Pwenunga muvaka-kuhana, kaha vatu navakamihana nayenu nawa. . . . Mwomwo chesekelo chize muli nakwesekelanga nacho vakwenu, chikiko navakamyesekela nacho nayenu nawa.”—Luka 6:38.
Pwevo nalunga (H. K.) vaze vanatwame muulo hamyaka 44 vambile ngwavo, “Lunga lyami ejiva vyuma vize ngwasaka nakungulingilavyo, nayami nawa ngweji kumulingilanga vyuma vize asaka. Ngocho twapwa vakuwahilila muulo wetu.”
LINGENUNGA VYUMA VIZE NAVINEHA KUUNDA MUTANGA
Tunashimutwila kaha hajitanga jajindende jize vahulishile kuli vaka-kusoneka Tonenu! yino. Kuli nawa jitanga jajivulu jize jinanganyala hakukavangiza jindongi jamuMbimbiliya. * Numba tuhu vamwe mujitanga vali nakukana kukavangiza jindongi kaneji, oloze vatachikiza ngwavo kujononoka cheji kunehanga kuunda mutanga. Mbimbiliya yamba ngwayo: “Vaka-kuneha kuunda vapwa vakuwahilila.”—Vishimo 12:20.
^ par. 24 Nge namusaka mijimbu yayivulu yahanjika hatanga, kaha talenu kapetulu 14 mumukanda waUno Chikupu Mbimbiliya Yanangula Vyuma Muka? vasoneka kuli Vinjiho jaYehova uze uli naha www.pr418.com. Talenu HAVYUMA YANANGULA MBIMBILIYA > VYUMA NAVIKAFWA TANGA.
Pamo Nauzanga Nawa
MUNAHASE KUWAHILILA MUTANGA YENU
Mwakukumishila Ukalu
Kuzachisa jila yamwaza hakusaka kukumisa ukalu nachilingisa ulo wenu upwenga wakuzama nakuwahilila.
