MUJIMBA wamutu vautenga mujila yakukomwesa. Chakutalilaho, nge mutu nalilemeka mbandu, mujimba ukwechi uhashi wakulyuka uvene kuputuka vene halwola luze nalilemeka.

Shinganyekenu hachumechi: Maselusi amujimba akiko eji kuzatanga mulimo kanou wakuka mbandu. Talenu jijila eji kuzachilangamo:

• Maselusi akuka mbandu eji kujingilikanga washi kumbandu, nakukinga manyinga ahone kutwalaho kuhita, nakulamata hamisonyi haze hanalyenyeka.

• Mbandu yeji kujimba nakuchilana mangana yikose majilo osena aze aliho.

• Omu mweji kuhitanga makumbi amandende, misonyi yahambandu yeji kulitunga cheka, nakununga cheka mishisa yamanyinga yize yambitukanga.

• Mbandu jino yeji kukanguka, kaha chikova cheji kulitunga nakupwa chakukola.

Vaka-kakuhehwojola vali nakutunga vyuma vyajindundu vize navihasa kulinunga vivene nge vinapulika. Vindundu kana vavitunga navitumbo vize vyeji kulingisanga chindundu chilitunge cheka chivene nge chinapulika. Muka-kuhehwojola umwe ahanjikile ngwenyi: “Tuli nakuhundangana mangana tuwane jila yayihya yakulondezezelamo vyuma vize vyapwako lyehi.”

Munashinganyeka Ngachilihi? Uno uhashi wamujimba wakulyuka jimbandu walijililile uvene tahi? Nyi valingile wakutenga?