NGACHILI nge mutanga yenu mweji kulikokojwesanga? Kaha ukalu kana uli nakutohwelako jino chikuma, pamo kamwejiva novyo vyeji kumilingisanga mulikokwejweseko. Oloze mwalizanga, ngocho kamwafwila kulinga vyuma vize navivwisa mukwenu kumuchima kupihyako.

Chapwa chachilemu kutachikiza ngwenu numba kamweshi nakulivwasanako, oloze tanga yenu yinahase kutwama mukuunda. Jila namukumishilamo ukalu muli nawo chinahase kumilingisa mutwame mukuunda chipwe nduma. Talenu havyuma vimwe vize navimikafwa mwakukumishila vikokojola.

Vatu vanahase kulikokojwesa, oloze nge umwe mwevwilila mukwavo kaha vanahase kukumisa vikokojola mukuunda. Shikaho lihendenu kumuchima wakulinga sambanjinga nge vanamipihisa kumuchima. Mwatela kupwa namuchima wakulikanyisa nge vanamivwisa kupihya. Anukenu ngwenu kupwa vakuunda mutanga chapwa chachilemu kuhambakana kufwila kuwana owo napihisa.

“Kakahya keji kujimanga nge jikunyi jauchi, navikokojola nawa vyeji kukumanga nge muka-lusongi wauchiko.”—Vishimo 26:20.

Kwivwilila kanawa chakuzeneka kukwata mukwenu kulizu chinahase kuunjisa vikokojola nakuneha kuunda mutanga. Muchishishisa chakuwanyina mukwenu tutenga, mwatela kufwila kutachikiza omu ali nakwivwa mukwenu havyuma kana. Kanda kufwila kuzangamisa mukwenu havyuma vize mwalimbenja mwomwo yakuhona kukupukako. Hanjikiso yayipi yeji kukolesanga chikuma kumuchima hamakumbi amavulu.

“Vwalenu muchima wakeke, nalikoji, nakulinyisa, nakuvova, nakutalilila chikoki.”—Wavaka-Kolose 3:12.

Nge munamono ngwenu munapihilila kaha kamwatela kutwalaho kuhanjikako, oloze mwatela kukahanjika chihande kana lwola lweka. Munahase kulingako vyuma vyeka chipwe kuya nakuchamajala mangana muchima uunde numba jino muhanjike cheka chihande kana. Echi kachalumbununa nge mutu nakane kushimutwilako, oloze yapwa kaha jila yakuunjishilamo muchima. Kaha nawa hilwola lwamwaza lwakulomba kuli Kalunga mangana akuhane muchima wakuunda, nachinyingi nakunangakana. Echi cheji kukafwa mutu anuke mwakuzachishila jindongi jamuMbimbiliya.

“Shimbu kanda vikokojola vyepuke, katuka uyenga.”—Vishimo 17:14.

Kachi nge namufwila kuhanjika mazu aze nawevwisa mukwenu kumuchima kupihya kacheshi kukumisa vikokojola vyenuko. Oloze mwatela kuhanjika mazu aze nawaunjisa matoto amuka-mahyenu. Muchishishisa chakuhanjika kaha vyuma vili kumuchima wenu, mwatela kwivwilila namukwenu ahanjike munayi vishinganyeka vyenyi nakusakwilila mukwenu havyuma mwakukafwa.

“Kuhanjika chakulusuka cheji kutuvanga nge poko yamukwale, oloze lilimi lyamuka-mangana lyeji kuhindulanga.”—Vishimo 12:18.

Kachi nge lunga chipwe pwevo mwapwa namatoto, kaha nahase kufutwisa mukwavo kumuchima nakumulingisa apihilile. Kanda kuzachisanga mazu akasautu chipwe kuhanjikila helu kachi nge vanamivwisa kupihya kumuchimako. Kanda kuhanjikanga ngwenu, “Kawangumona kupwa wamulemuko” chipwe “Kawasaka kungwivwililako.” Oloze mwatela kulweza muka-mahyenu nalizu lyalivwovu vyuma vinamivwisa kupihya. Kuliveta nakulitukana chipwe kulitomba kachakumisa vikokojolako.

“Mbilenu koko yosena, namatoto, nautenu, nakukalwomwoka, nahanjikiso yakasautu, navyuma vyavipi vyosena.”—Wavaka-Efwesu 4:31.

Anukenu ngwenu matoto eji kulingisa vatu vavavulu vahone kutwama mukuunda. Kachi nge namulisulakanyisa, muvosena kamweshi kunganyalako. Oloze nge namulikonekelanga kaha muvosena namutwama mukuunda. Shikaho mutu himutu atela kufwila kukumisa vikokojola numba vene namono ngwenyi keshi yikiye napihisako. Kutwama mukuunda chapwa chachilemu chikuma kuhambakana kufwila kuwana owo napihisa. Shikaho nge muka-mahyenu nalombo mumukonekele mwatela kwitavila washi.

“Yako ulinyise kuli ikiye, umulembelele chikuma.”—Vishimo 6:3.

Kachi nge vikokojola vinakumu, vyuma muka mwatela kulinga mangana munehe kuunda mutanga? Talenu chihande nachikavangizaho.