OMU YAHANJIKA MBIMBILIYA
Mwono
Mauka akwitava eji kulumbununanga mujijila jakulisezaseza chihande chamwono navyuma vyeji kusolokanga nge mutu nafu. Oloze Mbimbiliya yalumbununa kanawa chihande kana.
Uno mwono kawafwako tahi?
VYUMA VEJI KUHANJIKANGA VATU
Vatu vavavulu vafwelela ngwavo mwono kawafwako. Vamwe vafwelela ngwavo nge mutu nafu mwono wenyi weji kusemukilanga muchuma cheka. Veka nawa vafwelela ngwavo mwono weji kuyanga mwilu chipwe mungehena.
VYUMA YAHANJIKA MBIMBILIYA
Mbimbiliya yahanjika hatoma ngwayo mwono weji kufwanga. Kapolofweto Ezekele uze vahwiminyine kuli Kalunga asoneke mukanda umwe muMbimbiliya ahanjikile ngwenyi, mwono vanahase kuujiha. Kaha nawa Mbimbiliya yazachisa mazu akwamba ngwavo “mwono wakufwa,” kulumbununa nge mwono weji kufwanga. (VyavaLevi 21:11, kwinyikila chamwishi) Chikupu vene, Mbimbiliya yahanjika nge mwono weji kufwanga.
“Mwono uze nauvulumuna ukiko naufwa.”—Ezekele 18:20.
Uno mwono namujimba vyalihandununa tahi?
VYUMA VEJI KUHANJIKANGA VATU
Mwono weji kupwanga mumujimba, oloze nge mutu nafu weji kufumangamo.
VYUMA YAHANJIKA MBIMBILIYA
Mbimbiliya kayahanjika nge mwono weji kuyoyanga nge mutu nafuko. Chakutalilaho, hali WaYakova 5:20 vamba ngwavo: “Ou mwakindulwisa muka-shili kufuma mujila yenyi yakuhenga, mwalwila mutu [chipwe ‘mwono,’ kwinyikila chamwishi] kana kukufwa.” Nge mwono kaweshi kufwako kaha kacheshi kupwa chakutamo kulwila mwono kukufwako. Shikaho tunamono nge Mbimbiliya yahanjika hatoma ngwayo mwono weji kufwanga. Kweseka nalilimi lyatete vasonekelemo Mbimbiliya, lizu mwono lyatalisa kumutu yivene. Evi vikiko Mbimbiliya yaKaye Kakahya yalumuna chisoneka kana ngwayo, “ou mwakindulwisa muka-shili kufuma mujila yenyi yakuhenga, mwalwila mutu kana kukufwa.”—WaYakova 5:20.
“Mwalwila mutu [chipwe ‘mwono,’ kwinyikila chamwishi] kana kukufwa.”—WaYakova 5:20.
Vyuma muka vyeji kusolokanga kumwono nge mutu nafu?
VYUMA YAHANJIKA MBIMBILIYA
Mbimbiliya yahanjika ngwayo nge mutu nafu mufuka eji kuyanga “kamweshi milimo, chipwe kujina, chipwe chinyingi, chipwe manganako.” (Muka-kwambulula 9:10) Nge mutu nafu “eji kukindulukanga kumavu. Vishinganyeka vyenyi vyeji kunonganga halikumbi vene lize.” (Samu 146:4) Mwono wakufwa kaweshi kulinga chuma numba chimweko, echi chikiko Mbimbiliya yavulukila ngwayo mutu wakufwa nafwane nge “nasavala kaha tulo.”—Mateu 9:24.
MWOMWO IKA CHAPWILA CHACHILEMU?
Vatu vosena vaze vafwisaho lyehi, veji kusaka kutachikiza muvakumbulwila vihula vyakufwana nge: Vafu veji kuyanga kuli? Vali nakuyoya ngachilihi? Uno vali nakuyanda tahi? Hakuwana nge Mbimbiliya yavuluka ngwayo vafu kavatachikiza chuma numba chimweko, ngachize twatela kwivwa kuwaha hakutachikiza ngwetu vausoko jetu vaze vafwa kaveshi nakuyandako. Kaha nawa Yehova atushika ngwenyi mwakasangula vafu, chipwe ngwetu myono yakufwa, mangana vakayoye cheka.—Isaya 26:19.
“Vafu kavatachikiza chuma numba chimweko.”—Muka-kwambulula 9:5.
Pamo Nauzanga Nawa
Kunangula Chakwamba Ngwavo Kalunga Apwa waUkenya
Vatu vavavulu vafwelela ngwavo Kalunga eji kuzangamisanga vaka-shili haya myaka yosena. Uno Kalunga eji kulinganga vyuma vyavipi tahi? Vyuma muka vyeji kusolokanga kuli mutu nge nafu?
KUKUMBULULA VIHULA VYAKUPANDAMA KUMBIMBILIYA
Uno Kusanguka Chapwa Chika?
Munahase kulikomokela havatu vaze navakasanguka kulutwe.
KUKUMBULULA VIHULA VYAKUPANDAMA KUMBIMBILIYA
Mwono Chuma Muka?
Uno mwono wapwa chuma chimwe chize chatwama mumujimba wenu tahi? Uno mwono naukatwalaho lika kuyoya nge munafu tahi?
