Mwaka himwaka muJuly, vayishi vamuyachi kanou vavihwevo (Eubalaena australis) veji kuyanga kungenge yakalungalwili kuchihela chaSanta Catarina mulifuchi lyaBrazil. Veji kufumanga kwakusuku chikuma kusulo yakalungalwiji nakwiza nakusemena kuchihela kana. Vatu veji kuyanga kuchihela kana nakutala ava vayishi omu veji kutumbwojokanga nakuhema navana vavo.¹

Yishi kana apwa wamusuku kafwe jimita 16. Nge vanamutumbika muze kwijiva nge sacha, kaha alema jitani 80. Mujimba wenyi wapwa ulava, namapenga atoma mujimo. Mutwe nakanwa kenyi vyapwa vyavinene. Katwama navitendo hanyima ngana muze vapwa vaishi vakwavoko. Hakutambuka eji kutwalanga chipepe chenyi helu namwishi, oloze vaishi vakwavo veji kutwalanga vipepe vyavo kusali nasali. Hakwalumuka eji kuzachisanga vitendo vivali vize vyatwama kusali nasali yamutwe wenyi. Eji kwalumukanga ngana muze yeji kwalumukanga ndeke.

Numba tuhu ou ishi apwa wamunene, oloze eji kulimizanga mupeho nakutumbwojoka hakuhema. Kaha eji kwimika chipepe chenyi mwilu, nakuchivetaveta hameya, nakulyalanga hameya kaha munahase kumumona numba muli hahasuku.

Kumutwe wenyi kwapwa kwausela, kaha chikova chenyi kachapwa chisenenako. Chilolo Karina Groch, uze apwa mukulwane muliuka lyakuhehwojola vaishi kana lyaBrazilian Right Whale Project ambile ngwenyi: “Chikova chayishi hiyishi chalihandununa  nachavakwavo ngana muze tumifunda twamunwe washina twamutu himutu twalihandununa. Echi chikiko cheji kulingisanga vaka-kuhehwojola vahase kutachiza yishi hiyishi. Tweji kuvakopanga nakutumbika mivwimbimbi yavo mangana tukamone nge vayishi vovamwe navakeza cheka mwaka ukwavo.”

Vaka-kuhehwojola vamba ngwavo chapwa chachikalu kutachikiza myaka yavo mwomwo kavatwama namazoko. Oloze vamba ngwavo vanahase kuyoya myaka 65.²

Veji kulyanga vakala, natumbongola, navakolekole natututu veka vamuyachou. Vatwama namazakwila amavulu mukanwa. Omu veji kutambukanga, veji kwasamanga mukanwa kaha meya eji kwingilanga nakulovokela kusali, kaha vakala natumbongola veji kukakachilanga haze hamazakwila. Echi cheji kumukafwa alyenga vakala vavavulu chikuma halikumbi.

Ava vaishi veji kuyanga kuvihela kanevi vizuma muJanuary namuFebruary mangana vakalye nakutohwa chikuma nakupwa namaji amavulu mumujimba. Kahomu veji kukindulukanga kuchihela chameya atuta chikuma, mijimba yavo yeji kupwanga yizuma nakuhona kufwa zala.

Kuputuka mulikulukaji lyamyaka lyakusokesa 18, vatu vamwe vavuluka ngwavo whalers vayilenga nakujiha vayishi kana kutulungalwiji vakusulo mwomwo vapwile vavashi kujiha. Vapwa vaka-kutambuka chindende chindende, kaha vanahase kuvawana nakuli vatu vali nakutambuka nawato nakuvasa namyumba. Veji kufwapukanga nge vanafu mwomwo vatwama chikuma namaji mumujimba. Kaha nge vanamuwane, veji kumukokela kutunda nakumukeka.

Maji nachikova chenyi vapwile nakuvilanjisa najimbongo jajivulu hamyaka kana. Maji enyi vawakwichilenga kuvikungo vyamakina mangana vizate kanawa, kaha nawa vawahakilenga mumanongo akumunyikisa mujila. Chikova chenyi vachitungishilenga miluchi, namikole, navikote, namahina andando yayinene. Jimbongo valanjishilenga chikova chayishi umwe kaha, jafwikilenga vyuma vyosena vize vazachishilenga haungeji wavo wosena.

Jino kuheta mulikulukaji lyamyaka lyakusokesa 20, vayishi kana vakehele kaha vatu vechele jino kusekasana kana. Kuheta mu 1973, kusekasana chavayishi kana muBrazil chakumine. Numba tuhu vaze vasalaho vali nakusema, oloze nge vanavawane vali nakuvajihanga.

Ou yishi tunashimutwila natukafwe tumone omu vyuma vyakuyoya vavitenga mujila yakulipwila. Chasolola nge Yehova Kalunga uze apwa Tengi, atwama nangolo namangana akujindama.—Samu 148:7.