“Omu namulomba, kanda namuhilukila hilukila nakuvuluka vyuma vyovimweko.”—Mateu 6:7.

Yehova kasaka tuvulukenga mazu owamwe aze twalamina mumutwe chipwe kutanga mazu akulomba aze vasoneka mumukandako. Oloze asaka tulombe kufuma kumuchima wetu. Namwivwa ngachilihi nge sepa lyenu mwamilweza vyuma vyovimwe hakumbi hakumbi? Masepa vamwenemwene veji kukasunukanga kulilweza kala vyuma. Shikaho kachi nge natuzachisanga mazu akufuma kumichima yetu hakulomba kuli Kalunga, kaha nachisolola nge twamumona kupwa hisepa lyetu.

“Omu mweji kulombanga, kamweshi kutambulako mwomwo mweji kulombanga muvizachise mujila yakuhenga.”—WaYakova 4:3.

Katwatela kushinganyeka ngwetu Kalunga mwakumbulula kulomba chetu, kachi nge natumulomba vyuma vize kasaka etu tulingeko chipwe vyuma vize kasaka etu tupwenga navyoko. Chakutalilaho, kachi nge mutu ali nakuhema njuka, kaha mwalomba kuli Kalunga amukafwe mangana apwenga nakutokwa chakutapa vakwavo, kutala Kalunga mwakumbulula kulomba chenyi okunyi atulweza hatoma tulihende kumuchima wachipululu nakuvitumbo vyakuneha kutokwa tahi? (Isaya 65:11; Luka 12:15) Chikupu vene katweshi kufwelela ngwetu Yehova mwakumbulula kulomba kanako. Hakusaka Kalunga akumbulule kulomba chetu, twatela kulombanga vyuma vize vyalitombola navyuma atulweza muMbimbiliya.

 “Ou mwakana kwivwilila kujishimbi, nakulomba chenyi chinapu chaunyengwe.”—Vishimo 28:9.

Kushikulu, Kalunga kakumbulwile kulomba chavatu vaze vakanyinenga kwivwilila jishimbi jenyiko. (Isaya 1:15, 16) Kalunga kalumukileko. (Malaki 3:6) Nge tuli nakusaka Kalunga akumbulule kulomba chetu, kaha twatela kukavangiza jishimbi jenyi. Ngachilihi nge twalingilenga vyuma vyavipi kunyima, kutala echi chalumbununa nge Yehova keshi kuhasa kwivwilila kukulomba chetuko tahi? Nduma. Kalunga mwatukonekela kachi nge natuseza vilinga vyetu vyavipi nakuzata noho hakumina ngolo jetu mangana tumwivwise kuwaha.—Vilinga 3:19.