Vyuma Veji Kuhanjikanga Vatu Kutalisa kuKulomba
MARÍA ambile ngwenyi: “Nge ngunakulomba, ngweji kwivwanga nge Kalunga ali nayami, nangukwate kulivoko nakungutwaminyina.”
RAÚL ambile ngwenyi: “Puwami avijile musongo wakasa hamyaka 13, kaha afwile. Ngunakwanuka omu ngwalombelenga kuli Kalunga hakumbi hakumbi, kaha ngwejivile ngwami Kalunga apwile nakwivwilila kukulomba chami. Echi changukafwile nguunde muchima.”
ARNE ambile ngwenyi: “Kulomba chapwa wana wamwaza uze Kalunga ahana vatu.”
María, naRaúl, naArne navatu veka vavavulu, vamona kulomba kupwa hiwana wakulipwila. Vatu kana vatachikiza ngwavo kulomba nachivakafwa vahanjike naKalunga, nakumusakwilila, nakumulweza avakafwe. Vafwelela mazu amuMbimiliya aze ahanjika kutalisa kukulomba kuli Kalunga ngwawo: “Tunafwelela Kalunga ngwetu, vyeshovyo natumulomba kweseka namwaya muchima wenyi, mwatwivwa.”—WaYowano 1, 5:14.
Chipwe ngocho, vatu vavavulu veji kuchiwananga kupwa chachikalu kufwelela vyuma yahanjika Mbimbiliya kutalisa kukulomba. Chakutalilaho, Steve ahanjikile omu evwile kutalisa kukulomba, ambile ngwenyi, “Omu ngwapwile namyaka yakusemuka 17, masepa jami vatatu vafwile. Umwe afwile muponde yahamukwakwa, kaha vavali vafwile hakalungalwiji.” Steve alingile ngachilihi? Ambile ngwenyi, “Ngwalombele kuli Kalunga angulweze ovyo vyalingishile ukalu kana usoloke, oloze kangukumbulwileko. Ngocho ngwalihulishile ngwami, ‘Kahaze kulomba kuli Kalunga chaka?’” Vatu vavavulu valitwamina kulomba mwomwo ngwavo kulomba chavo kavachikumbululako.
Kuli nawa vyuma vikwavo vyalingisa vatu vamwe vamone ngwavo kulomba kacheshi kuvakafwako. Vamwe vamba ngwavo, hakuwana nge Kalunga atachikiza ukalu wetu navyuma twasakiwa, shikaho kacheshi kupwa chamangana kumulweza cheka vyuma kanako.
Veka nawa ngwavo, Kalunga kevwilila kukulomba chavoko mwomwo yavyuma vyavipi valingilenga kunyima. Chakutalilaho, Jenny ambile ngwenyi, “Ukalu waunene ngwatwama nawo shina, kulimona kupwa nguwamokomoko. Ngweji kuliveyanga havyuma vize ngwalingilenga, echi cheji kungulingisanga ngushinganyeke ngwami Kalunga katela kwivwilila kukulomba chamiko.”
Uno enu kulomba mwachimona ngachilihi? Kachi nge nayenu mweji kuhuhwasananga ngwenu Kalunga kakumbulula kulomba chenuko, kaha mwatela kufwelela chikupu ngwenu Mbimbiliya yeji kukumbululanga vihula veji kuhulisanga vatu. Twatela kufwelela vyuma yahanjika Mbimbiliya kutalisa kukulomba, * mwomwo nayimikafwa kuwana muvakumbulwila vihula vyakufwana nge vino:
-
Kutala Kalunga eji kwivwililanga kukulomba chetu tahi?
-
Uno Kalunga eji kukumbululanga kulomba chosena tahi?
-
Munahase kulomba ngachilihi kuli Kalunga numba evwilile kulomba chenu?
-
Uno kulomba nachimikafwa ngachilihi?
^ par. 9 MuMbimbiliya vasonekamo kulomba chavangamba jaKalunga vavavulu, kuhakilako nakulomba chaYesu Kulishitu. MuVisoneka VyachiHepeleu vize vavuluka nawa ngwavo Tesetamende yaMwaka, vavulukamo kulomba chakuhambakana ku 150.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Mwomwo Ika Twatela Kulombela? Uno Kalunga Nahase Kungukumbulula Tahi?
Kuli vyuma vimwe twatela kulinga numba Kalunga evwilile kukulomba chetu.
VAKWEZE VEJI KUHULISA NGWAVO
Mwomwo Ika Ngwatela Kulombela?
Uno kulomba cheji kulingisanga mutu evwenga kumuchima hwo nyi mwaliweza vyavivulu?
