KALUNGA kajinyine ngwenyi chiyoyelo chetu chipwenga nganomu chili makumbi anoko. Ajinyine ngwenyi hamavu hapwenga vatu vaze navavumbika wata wenyi, nakuvatwaminyina kuli ikiye nakusolola nawa vilinga vyenyi vyazangi. Kalunga asakile nawa vatu vapwenga vakulinunga hakulela jitanga javo, nakulinangula vyuma vyavihya nakulingisa mavu osena kupwa palachise.

• “Mwakumisa jijita hamavu hosena.”—Samu 46:9.

• “Kaha lwola vatongola lwahetele . . . [lwa]kwenyeka nawa vaze veji kwenyekanga mavu.”—Kusoloka 11:18.

• “Kamweshi kukapwa mutu mwakamba ngwenyi: ‘Nguli nakukola.’”—Isaya 33:24.

• “Vaze ngwasakula navakalivwisanga kuwaha milimo yamavoko avo.”—Isaya 65:22.

Uno Upolofweto wosena ou, naukatesamo ngachilihi? Kalunga atongola Mwanenyi Yesu kupwa Mwangana wafulumende yamwenemwene, uze mwakapwa mwilu nakuyula hano hamavu. Mbimbiliya yavuluka fulumende kana ngwayo Wangana waKalunga. (Ndanyele 2:44) Mbimbiliya yahanjika hali Yesu ngwayo: “Kalunga mwakamuhana litanda . . . , mwakapwanga Mwangana.”—Luka 1:32, 33.

Yesu alingile vyakukomwesa vyavivulu omu apwile hano hamavu, mangana asolole ngwenyi ikiye hakupwa Muka-kuyula mwakalingisa vatu vakayoye kanawa kuhambakana omu vali nakuyoya makumbi ano.

• Okile misongo yosena nakuviza chosena vavijilenga vatu, echi chasolwele nge kulutwe mwakafumisako misongo yosena.—Mateu 9:35.

• Aunjishile kalungalwiji, echi chasolwele nge kulutwe mwakakinga vatu kuvyuma vyakutenga vize vyeji kuvanehelanga ukalu.—Mako 4:36-39.

• Alishile makombakaji, echi chasolwele nge kulutwe mwakazakama vatu hakuvahana vyuma vyasakiwa mukuyoya.—Mako 6:41-44.

• Alumwine meya kupwa vinyo hachifupawenga, echi chasolwele nge kulutwe mwakalingisa vatu vakalivwise kuwaha kuyoya.—Yowano 2:7-11.

Vyuma muka mwatela kulinga mangana mukalivwise kuwaha kuyoya, chize Kalunga ashika kukahana vatu vaze vamuzanga? Kuli jila yize mwatela kutambukamo. Mbimbiliya yalumbununa jila kana ngwayo ‘yili nakutwala kukuyoya, kaha ava vali nakuyiwana vanapu vavandende kaha.’—Mateu 7:14.

Uno jila yakutwala kukuyoya yapwa yika? Kalunga amba ngwenyi: “Ami Yehova yami Kalunga kenu,  Ou eji kuminangulanga mangana munganyale, Ou eji kumitwaminyinanga mujila yize mwatela kuya.” (Isaya 48:17) Nge namutambukanga mujila kaneyi, nachimikafwa mupwenga nakuyoya chamwenemwene.

Yesu ambile ngwenyi: “Ami yami jila, yami muchano, yami kuyoya.” (Yowano 14:6) Kachi nge natufwelela muchano anangwilenga Yesu nakumulondezeza kaha natupandama kuli Kalunga nakunganyala.

Munahase kuwana ngachilihi jila yakutwala kukuyoya? Kwatwama mauka akwitava amavulu, oloze Yesu ahuhumwine ngwenyi: “Keshi nge vosena vaze vali nakwamba kuli ami ngwavo, ‘Ove Mwata, Ove Mwata,’ navakengila muWangana wameluko, shina vaze kaha vali nakulinga mwaya muchima waTata uze ali mwilu.” (Mateu 7:21) Ahanjikile nawa ngwenyi: “Kumihako yavo kukiko vene namuvatachikijila kanawa.” (Mateu 7:16) Mbimbiliya yinahase kumikafwa mutachikize kwitava chamuchano nakuchihandununa kukwitava chamakuli.—Yowano 17:17.

Munahase kutambuka ngachilihi mujila yakutwala kukuyoya? Mwatela kutachikiza kanawa mutu uze apwa kasulu kakuyoya: ikiye iya? Kaha lijina lyenyi ikiye iya? Apwa mutu wakufwana ngachilihi? Uno vyuma muka ali nakutulingila? Kaha ali nakusaka etu tulinge ika? *

Kalunga kasakile vatu vazatenga, nakulya nakulela jitanga kahako, oloze Tengi yetu asakile nawa tumutachikize nakupwa tumasepa jenyi. Tunahase kusolola ngwetu twamuzanga hakulinga mwaya muchima wenyi. Yesu ambile ngwenyi: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano.”—Yowano 17:3.

Hakusaka twivwise Kalunga kuwaha, twatela kwalumunako vyuma vimwe mukuyoya chetu. Tunahase kushinganyeka ngwetu chuma kana chachikalu kulinga. Oloze ijivenu ngwenu namupwa nakuyoya chamwenemwene kachi nge namuputuka kutambuka mujila yakutwala kukuyoya. Hakusaka muwane muvakumbulwila vihula vimwe vyakutalisa kuli Kalunga, Vinjiho jaYehova veji kunangulanga vatu Mbimbiliya hawana wakanyombo halwola nakuchihela namusaka. Munahase kuya hakeyala yetu ya www.pr418.com/lue.