Vyuma yahanjika Mbimbiliya: “Kutwama chenu chipwenga chakuzeneka kuzanga jimbongo, oku munasuuluka navyuma muli navyo.”—WavaHepeleu 13:5.

Makumbi ano kaye kali nakushinyinyika vatu vafwile kupwa naluheto lwaluvulu. Oloze Mbimbiliya yamba ngwayo, tunahase ‘kusuuluka navyuma tuli navyo.’ Mujila muka?

Kanda ‘kuzanga chikuma jimbongoko.’ ‘Kuzanga chikuma jimbongo’ cheji kulingisanga vatu vahichikisemo myono yavo, najitanga javo, namasepa naulemu wavo. (WaChimoteu 1, 6:10) Kavamona vyuma kana kupwa vyavilemuko. Kaha nawa muka-kuzanga luheto “keshi kukasuuluka[ko].”—Muka-kwambulula 5:10.

Monenunga vatu kupwa vavalemu kuhambakana kala vyuma. Vyuma vyakulikafwa navyo kumujimba vyapwa vyavilemu mukuyoya chetu. Chipwe ngocho, vyuma kana kavyeshi kuhasa kutuzanga chipwe kutusakwililako, oloze vatu vanahase kulinga ngocho. Kupwa “[na]sepa wamwenemwene” cheji kulingisanga mutu apwenga wakusuuluka mukuyoya. —Vishimo 17:17.

Vyuma yahanjika Mbimbiliya: “Muchima wakuwahilila unapu nge vitumbo vyamwaza.”—Vishimo 17:22.

Ngana “mwavitumbo vyamwaza” kupwa vakuwahilila chinahase kutukafwa tumike kachi nge tuli nakuviza. Uno tunahase kupwa ngachilihi vakuwahilila kachi nge tuli nakuviza?

Pwenunga namuchima wakusakwilila. Kachi nge natushinganyekanga chikuma haukalu tuli nakumona, kaha natumona ‘makumbi osena’ kupwa amapi. (Vishimo 15:15) Oloze Mbimbiliya yahanjika ngwayo, “sololenunga kusakwilila chenu.” (Wavaka-Kolose 3:15) Pwenunga namuchima wakusakwilila vyuma vyamwaza numba vipwa vyavindende. Munahase kutala omu likumbi lili nakulauka, nakwivwa kapeho kamwaza katuta, nakumona mutu mwazanga mwamwesamwesa. Vyuma kana vinahase kutukafwa mukuyoya chetu.

Zachilenungako vakwenu. Numba tuhu lwola lumwe katweshi kuhasa kupwa vakulikangula kumujimbako, oloze twatela kwijiva ngwetu “kuhana cheji kunehanga kuwahilila chikuma kuhambakana kutambula.” (Vilinga 20:35) Kachi nge vakwetu navasakwilila vyuma tunavalingila nachitulingisa tusuuluke, nakutulingisa tuhone kushinganyeka chikuma haukalu tuli nakumona. Tunahase kupwa vakuwahilila mukuyoya, kachi nge natukafwanga vakwetu vapwenga vakuwahilila mukuyoya chavo.

Vyuma yahanjika Mbimbiliya: ‘Kekesenu mumone vyuma vyavilemu.’—Wavaka-Fwilipi 1:10.

Vaka-kulimbata vaze veji kuhonanga kuwana lwola lwaluvulu lwakupwa hamwe, veji kuhakanga ulo wavo muponde. Lunga napwevo vatela kumona ulo wavo kupwa waulemu chikuma mukuyoya chavo.

Zachilenunga hamwe milimo. Muchishishisa chakulinga vyuma ukawenu oloze nonekenunga kanawa vyuma mangana muzachilenga hamwe. Mbimbiliya yamba ngwayo, “vavali vanawahe kuhambakana mutu umwe.” (Muka-kwambulula 4:9) Munahase kuwahishila hamwe vyakulya, nakuhemena hamwe mulavalava navyuma vyeka.

Lisolwelenunga zangi. Mbimbiliya yakolezeza malunga namapwevo vazangenga vaka-mahyavo nakuvavumbika. (Wavaka-Efwesu 5:28, 33) Vyuma vyakufwana nge kumwesamwesa chamutu wazanga, nakulipakata mukasamba chipwe kulihana tumawana chinahase kuzamisa ulo. Vaze valimbata vatela kuzachisanga mazu azangi kuli umwe namukwavo, keshi kuvatu vekako.—WavaHepeleu 13:4.