Uno vatutenga navishinganyeka kanevi tahi? Eyo! Visoneka vyamba ngwavyo, Kalunga ahaka vishinganyeka kana mumichima yetu. (Muka-kwambulula 3:11) Kaha vyamba nawa ngwavyo “Kalunga ikiye zangi.” (WaYowano 1, 4:8) Kachi nge Kalunga kajinyine ngwenyi tuyoyenga myaka yosenako, kaha mwomwo ika ahakililile vishinganyeka vyakufwila kuyoya haya myaka yosena mumichima yetu?

Chikupu vene, naumwe asaka kufwa wauchi. Shikaho, Mbimbiliya yalumbununa ngwayo kufwa chapwa “muka-kole,” uze twahunga. (Wavaka-Kolinde 1, 15:26) Vatu vamwe veji kufwanga unyike kaha veka veji kufwanga vanakolo lyehi. Chipwe ngocho, kufwa katweshi kuhasa kuchichinako. Vatu vavavulu kavasaka kushinganyeka hakufwako, kaha veji kuchivwanga woma. Uno ou muka-kole navakamufungulula tahi? Kutala chikupu vene navakamufumisako nyi?

Kutala munahase kulikomokela hakutachikiza ngwenu Kalunga kajinyine ngwenyi vatu vafwengangako tahi? Mukanda waKuputuka watuhana unjiho wakusolola nge Kalunga ajinyine ngwenyi vatu vatwamenga hano hamavu haya myaka yosena. Yehova Kalunga awahishile kanawa hano hamavu mangana vatu vatwamengaho. Kufumaho, atengele mutu watete Alama nakumuhaka mupalachise, mumilemba yaEtene. Kaha “Kalunga amwene vyuma vyosena vize atengele ngwenyi vinawahe chikuma.”—Kuputuka 1:26, 31.

 Alama vamutengele muchifwanyisa chaKalunga kaha nawa apwile wakukupuka. (Lushimbi lwamuchivali 32:4) Eve pwevo lyaAlama naikiye kapwile nakatengako, kaha nawa vishinganyeka vyenyi namujimba wenyi vyapwile vyakukupuka. Yehova avalwezele ngwenyi: “Semenunga muvule chikuma, muzalise hamavu, nakuwalamanga, kaha pwenunga nawata havaishi vamukalungalwiji, navyuma vyakutuka mwilu, navyuma vyakuyoya vyosena vyakutambuka hamavu.”—Kuputuka 1:28.

Chatelelele kumbata lwola lwalusuku numba vazalise mavu. Eve atelelele kusema vana, kaha vaze vana nawa vatelele kusema nakusemunwina mangana vazalise mavu ngana muze ajinyine Kalunga. (Isaya 45:18) Uno kachi chapwile chakwoloka Yehova kuhana Alama naEve mulimo kana, nge ajinyine ngwenyi navayoya kaha kashimbu kakandende nakumona kaha vana vavo navazukulu javo, nakuhona kutachikiza vyuma navikasoloka tahi?

Shinganyekenu nawa hamulimo vavahanyine wakupwa nawata hatunyama. Alama vamuhanyine mulimo wakuluka tunyama majina, kaha mulimo kana kachi wambachile lwola. (Kuputuka 2:19) Oloze hakusaka mangana apwenga nawata hatunyama kana, atelele kuvatachikiza kanawa nakwijiva nawa mwakuvazakamina. Chuma kana kachi chambachile lwola lwalusuku chikuma.

Shikaho, Yehova Kalunga hakulweza Alama naEve vazalise mavu nakupwa nawata hatunyama, chasolola nge vavatengele mangana vayoyenga myaka yayivulu. Kaha chikupu vene Alama ayoyele myaka yayivulu.

Mbimbiliya yasolola nge kushikulu vatu vayoyelenga myaka yayivulu kuhambakana myaka tuli nakuyoya makumbi ano. Yamba ngwayo: “Makumbi osena aze ayoyele Alama ahetele mumyaka 930.” Kaha yavuluka nawa malunga 6 vaze vayoyele myaka yakuhambakana 900. Malunga kana shina, Sete, naEnoshe, naKenane, naYalete, naMetusela naNowa. Malunga vosena ava, vapwileko shimbu kanda Livaji lyamumakumbi aNowa, kaha Nowa ayoyele myaka 600 shimbu kanda Livaji. (Kuputuka 5:5-27; 7:6; 9:29) Uno chuma muka chalingishile vayoye myaka yayivulu ngana?

Malunga vosena ava vapandamine kulwola luze Alama naEve vapwile vakukupuka. Pamo echi chikiko chavalingishile vayoye myaka yayivulu. Uno kukupuka chatambukila ngachilihi hamwe nakuyoya myaka yayivulu? Uno kufwa navakachifungulula ngachilihi? Hakusaka tuwane kukumbulula chavihula kana, twatela chatete kutachikiza ovyo tweji kushinakajiwilanga nakufwa.