Vyuma Twatela Kutachikiza Kutalisa kuKufwa
ACHISHINGANYEKENU muli nakutala vindiyo yamutu uze aya fuma, pamo yamuka-kwimba myaso. Vindiyo kana nayiputuka kusolola omu aputukile kulinangula mwakwimbila kufuma vene kuunyike wenyi, nomu alijilishilenga kwimba hakumbi hakumbi. Kaha hinayisolola nawa omu embililenga kulizavu, nomu ayilenga kumafuchi amavulu, nakuya jino fuma mukaye kosena. Oloze nakushimbula chiku, namumona jino omu ali nakushinakajiwa, kaha kumakumishilo avindiyo kana hinamumona nomu mwafwa.
Eyi vindiyo kana kayeshi yakutakako, oloze yinahanjika hamujimbu wamuchano wakuyoya chamutu uze afwa lyehi. Numba nge mutu kana apwile muka-kwimba myaso, chipwe muka-sayasi, chipwe muka-kulaha chipwe apwile kala mutu uze ayile fuma, mujimbu wenyi kaweshi kukalumukako. Nge mutu kana kashinakajiwile nakufwako, kachi nakilikita milimo yayivulu chikuma.
Tweji kwivwanga kupihya hakushinganyeka ngwetu nayetu natukashinakajiwa nakufwa. (Muka-kwambulula 9:5) Numba tuzata tuhu ngachilihi, oloze katweshi kuhasa kuchina ushinakaji nakufwako. Kaha nawa kufwa chinahase kutuwana kala lwola, tunahase kufwa muponde chipwe kumisongo. Ngana muze yalumbununa Mbimbiliya, etu vatu twapwa kwijiva nge mbundu yize “yeji kusolokanga hakatando kakandende, kaha nganomu yinalelangana lyehi.”—WaYakova 4:14.
Vatu vamwe vamona kuyoya kupwa chamokomoko shikaho veji kuyoyanga navishinganyeka vyakwamba nge, “tulyenu, tunwenu mwomwo hamene natufwa.” (Wavaka-Kolinde 1, 15:32) Vatu vaze veji kuyoyanga mujila kaneyi, vatachikiza ngwavo vanahase kufwa kala lwola, kaha kavatwama nalutalililoko. Kaha nawa hakuhita muukalu wamukuyoya, munahase kulihulisa ngwenu: ‘Uno kuyoya chiliko chikiko nachipwangako lika nyi?’ Kaha kulihi munahase kuwana kukumbulula chamwenemwene?
Vatu vavavulu makumbi ano vafwelela ngwavo vaka-sayasi vakiko vanahase kukumbulula vihula kana. Kuzovoloka muvyuma vyasayasi namukutunga vitumbo, vinalingisa myaka yakuyoya chavatu yivulileko chindende. Kaha vaka-sayasi vamwe vali nakukilikita vavulishileko myaka yakuyoya chavatu. Chamokomoko nakukilikita chavo, tunahase lika kuhulisa ngwetu: Mwomwo ika tweji kushinakajiwilanga nakufwa? Kutala tukwechi lutalililo ngwetu muka-kole wetu kufwa navakamufumisako tahi? Vihande vinakavangizaho vinakumbulula vihula kana nachihula chakwamba ngwavo: Uno kuyoya chiliko chikiko nachipwangako lika nyi?
Pamo Nauzanga Nawa
KAPOSHI KAKUTALILA
Kufwila Kuwana Jijila Jakuvulishilamo Myaka yaKuyoya
Vaka-sayasi vamwe vaze valinangula havyuma vyakuyoya navaze valinangula omu weji kulitunganga mujimba wamutu, vali nakuhehwojola vawane vyuma vyeji kulingisanga vatu vashinakajiwe. Uno vyuma muka vinafumu mukuhehwojola chavo?
