NUMBA tuhu kulikanga chavisemi jetu vatete vaAlama naEve chanehele shili nakufwa kuvatu vosena, oloze kachalumwine vyuma ajinyine Kalunga hakutenga vatuko. Kalunga ahanjika muMazu enyi Mbimbiliya ngwenyi, vyuma ajinyine hakutenga vatu kavyalumukileko.

• “Vaka-kwoloka navakaheta mavu, kaha navakatwamangaho haya myaka yosena.”—Samu 37:29.

• “Mwata Wakulitulaho Yehova mwakamina kufwa haya myaka yosena, mwakahunda masoji kumeso avatu vosena.”—Isaya 25:8.

• “Kufwa chize chapwa muka-kole wakukuminyina, navakachifumisako.”—Wavaka-Kolinde 1, 15:26.

• “Kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—Kusoloka 21:4.

Uno Kalunga ‘mwakamina ngachilihi kufwa’ chipwe kufumisako kufwa chize chapwa muka-kole? Mbimbiliya yahanjika hatoma ngwayo, “vaka-kwoloka . . . navakatwamangaho haya myaka yosena.” Oloze yahanjika nawa ngwayo, “kakweshi mutu wakwoloka hano hamavu uze eji kulinganga lika vyamwaza.” (Muka-kwambulula 7:20) Uno echi chalumbununa nge Kalunga mwakechelela vatu vakuhona kukupuka vakahone kukavangiza jishimbi jenyi mangana vakayoye haya myaka yosena tahi? Nduma keshi kuhasa kulinga ngochoko. Mwomwo ‘Kalunga kongako.’ (WaChituse 1:2) Jino vyuma muka mwakalinga Kalunga mangana akatesemo vyuma ajinyine hakutenga vatu?

Yehova Kalunga ahanyine wana wandando yakusokola mangana asokole vatu kukufwa. Ndando yakusokola yapwa ndando yize nayifwika chuma chimwe, chipwe kufweta mulonga kweseka navyuma vanatomena mutu. Hakuwana nge vatu vosena vapwa vaka-shili kaha veji kufwanga, shikaho Mbimbiliya yahanjika ngwayo: “Naumwe wauchi nahase kusokola ndumbwenyi, chipwe kuhana Kalunga ndando yakumusokolako. (Ndando yakusokola mwono wamutu yapwa yayikalu chikuma, ngocho kaveshi kahasa kuyifwetako).”—Samu 49:7, 8.

Nge mutu wakuhona kukupuka nafu, eji kufwetanga mulonga wenyi washili, keshi kuhasa kulisokola yiveneko, kaha nawa naumwe wauchi nahase kumufwetela shili yenyi. (Wavaka-Loma 6:7) Shikaho, twasakiwile mutu wakukupuka uze kapwile nashiliko ahane kuyoya chenyi mwomwo yajishili jetu keshi mwomwo yashili yenyiko.—WavaHepeleu 10:1-4.

Omu mukiko alingile Kalunga. Atumine mwanenyi Yesu Kulishitu kufuma mwilu mangana ezenga nakusemukila hano hamavu kupwa mutu wakukupuka kaha nawa wakuzeneka shili. (WaPetulu 1, 2:22) Yesu ambile ngwenyi, ejile “nakuhana mwono wenyi kupwa ndando yakusokola vavavulu.” (Mako 10:45) Afwile mangana afungulule kufwa chize chapwa muka-kole mangana tukayoye.—Yowano 3:16.

Makumbi ano, upolofweto wamuMbimbiliya uli nakutesamo, mwomwo tuli nakuyoyela ‘mulwola lwalukalu.’ Ou hiunjiho wakusolola hatoma nge tuli nakuyoyela “mumakumbi akukuminyina” amapi akatwamino kamyaka yino. (WaChimoteu 2, 3:1) Makumbi akukuminyina nawakakuma “[ha]likumbi lyakusopesa nalyeli lyakunongesa vaka-kuzamukila Kalunga.” (WaPetulu 2, 3:3, 7) Oloze vatu vaze vazanga Kalunga navakayovoka halikumbi kana, nakuvakisula  nakukatambula “kuyoya chahaya myaka yosena.”—Mateu 25:46.

Vatu vavavulu vaze navakasanguka navakiko navakapwa nakutokwa chakuyoya haya myaka yosena. Omu Yesu ayile kunganda yaNane alingile chuma chize chasolwele hatoma nge mutu vanahase kumusangula. Omu tuliwe umwe wapwevo afwishile mwanenyi umwe kaha walunga, Yesu “amwivwilile keke,” ngocho asangwile uze mwanatuliwe. (Luka 7:11-15) Kaposetolo Paulu asonekele ngwenyi: “Nguli nalutalililo muli Kalunga . . . ngwami nakukapwa kusanguka chavaka-kwoloka navaka-kuhenga.” Lutalililo kana lwasolola hatoma nge Kalunga azanga chikuma vatu.—Vilinga 24:15.

Vatu vavavulu navakapwa nalutalililo lwakukayoya haya myaka yosena. Mbimbiliya yamba ngwayo: “Vaka-kwoloka navakaheta mavu, kaha navakatwamangaho haya myaka yosena.” (Samu 37:29) Halwola kana vatu navakawahilila chikuma omu nawakatesamo mazu akuvendejeka asonekele kaposetolo Paulu myaka kafwe 2,000 kunyima akwamba ngwenyi: “Ove kufwa, kufungulula chove chilihize? Ove kufwa, mumunyi wove ulihize?” (Wavaka-Kolinde 1, 15:55) Halwola kana, kufwa chize chapwa muka-kole wamunene nachikapwa hivanachifungulula lyehi.