Kapolofweto Mose ahanjikile ngwenyi, kachi nge natwononoka jishimbi jaKalunga kaha mwatukisula. (Lushimbi lwamuchivali 10:13; 11:27) Katweshi kwononoka Kalunga mwomwo yakuchina kukatuzangamisako. Oloze tweji kwononokanga Kalunga mwomwo yavilinga vyenyi vyamwaza, kaha nawa mwomwo twamuzanga, kaha tweji kulihendanga kukulinga kala chuma chize chinahase kumwivwisa kupihya. Mbimbiliya yamba ngwayo: “Kuzanga Kalunga chalumbununa kulamanga jishimbi jenyi.”—WaYowano 1, 5:3.

Uno kwononoka Kalunga chinahase kuneha ngachilihi kukisula? Talenu havyakutalilaho vino vivali.

‘Ami Yehova yami Kalunga kenu, Ou eji kuminangulanga mangana munganyale, nakumitwaminyinanga mujila yize mwatela kuya.’—ISAYA 48:17.

Yehova Kalunga, uze apwa Tengi yetu atutachikiza kanawa, kaha nawa eji kutuhananga jindongi jize jeji kutukafwanga. Kachi nge tuli nakusaka vyuma eji kutunangulanga vitukafwe tusakulenga kanawa vyakulinga, kaha twatela kutanganga Mbimbiliya mangana tutachikize vyuma kana nakwijiva mwakuvizachishila.

“Vawahilila shina vaze veji kwivwililanga mazu aKalunga nakuwalamanga.”—LUKA 11:28.

Makumbi ano, vatu vavavulu vaze veji kukavangizanga Mazu amuMbimbiliya veji kuwahililanga mukuyoya chavo. Chakutalilaho, tuchishimutwilenu hali lunga umwe wakuSpain uze apwilenga namatoto chikuma, nakuhulamisanga puwenyi navatu veka. Likumbi limwe atangile vyuma asonekele kapolofweto Mose kutalisa kumuchima wauvwovu apwilenga nawo Yosefwe mwana Yakova. Yosefwe vamulanjishile nakupwa ndungo, kufumaho vamuvangijikilile chihande nakumuhaka mukamenga, oloze atwalileho lika kupwa namuchima wauvwovu, nawakuunda, namuchima wakukonekela. (Kuputuka kapetulu 37-45) Ou lunga wakuSpain ambile ngwenyi: “Kushinganyeka hamujimbu waYosefwe namuchima asolwele vyangukafwile ngupwenga namuchima wauvwovu, namuchima walikoji, namuchima wakulikanyisa. Makumbi ano ngunakulivwisa kuwaha kuyoya.”

Mbimbiliya yikwechi jindongi jajivulu jize jinahase kutukafwa kuwana mwakutwamina kanawa navakwetu. Chihande nachikavangizaho nachishindakanya chikuma hachishina kanechi.