Kalunga ashikile kapolofweto Apalahama ngwenyi “vaka-mafuchi ahamavu vosena” navakavakisula kuhichila muli muka-tanga yenyi. (Kuputuka 22:18) Uno ou muka-tanga ikiye iya?

Munahichi kafwe myaka 2,000 kufuma haze Kalunga ahanyine ngolo Yesu, uze apwile mukatanga yaApalahama mangana alinge vyuma vyakukomwesa. Vyakukomwesa alingile, vyasolwele nge lushiko luze vashikile Apalahama nalukatesamo kuli vaka-mafuchi osena kuhichila muli Yesu.—Wavaka-Ngalesha 3:14.

Vyakukomwesa kana vyasolwele hatoma nge chikupu vene, Yesu apwile mutu uze vasakwile mangana Kalunga akisule vatu vosena kuhichila muli ikiye, kaha vyasolwele nawa omwo Kalunga mwakazachisa Yesu mangana akakisule vatu haya myaka yosena. Talenu vyakukomwesa alingile Yesu omu vyasolola vilinga vyenyi vimwe atwama navyo.

Kutetela—Yesu okilenga vaveji.

Omu muka-mbumba alembelelele Yesu mangana amuke, Yesu akwachile uze muka-mbumba nakwamba ngwenyi: “Ngunasake vene.” Kaha hahaze vene yize mbumba yamufumine.—Mako 1:40-42.

Zumbu—Yesu alishile vatu vyakulya.

Yesu kasakile vatu vayenga nazalako. Shimbu jimwe Yesu alishilenga vatu vavavulu mujila yakukomwesa hakulingisa tujimbolo twatundende natuvaishi twatundende vivule. (Mateu 14:17-21; 15:32-38) Vosena vekuchile kaha vyakulya vimwe vyasalileho.

Keke—Yesu asangwile vafu.

Yesu ‘evwililile keke’ tuliwe uze afwishile mwanenyi walunga, kaha nawa kapwile namutu weka wakumulamako, ngocho Yesu asangwile mwana yauze tuliwe.—Luka 7:12-15.