Tengi Eji Kutuzakamanga
1. TENGI EJI KUTUTWISANGA LIKUMBI
Katweshi kuhasa kuyoya chakuzeneka musanako. Musana weji kukafwanga mitondo yikole kanawa nakufukula jitemo, nakusokesa jimbuto namanona. Musana nawa weji kukafwanga miji yamitondo yikoke meya kufuma mumavu nakutwala kumafwo.
2. TENGI EJI KUTUHANANGA VULA
Kalunga eji kutuhananga vula yize yeji kusokesanga vyakulya hamavu. Shikaho, vula yapwa wana wakufuma kuli Kalunga yize yeji kusokesanga vyakulya mangana tuwahilile.
3. TENGI EJI KUTUHANANGA VYAKULYA NAVYAKUVWALA
Malunga vavavulu vaze vapwa mitwe yajitanga, veji kulizakaminanga hakuwana jila yakuwanyinamo vyakulya navyakuvwala vyavaka-tanga yavo. Talenu omu yahanjika Mbimbiliya, ngwayo: “Achitalenu kanawa tujila vahelu. Vakiko kaveshi kukuvako, chipwe kwahako, chipwe kukungulwila muviseteko, oloze Senu wamwilu eji kuvalisanga. Uno enu kamwalema kuvahambakanako numba?”—Mateu 6:25, 26.
“Linangulenu kujitemo jamuvipapa omu jeji kukulanga. . . . Oloze nangumilweza ngwami, numba vene [Mwangana] Solomone muupahu wenyi wosena, kavwalile uvwalo umwe wakulita natemo yimweko. Enu vaka-lufwelelo lwalundende, jino kachi nge Kalunga eji kuvwikanga vyuma vyakusoka hamavu . . . , kutala keshi kuhambakana chikuma kumivwika enuko nyi?”—Mateu 6:28-30.
Hakuwana nge Kalunga eji kutukafwanga tuwane vyakulya navyakuvwala, ngocho nahase nawa kutukafwa tuwane vyuma vyeka vyakulikafwa navyo. Kachi nge natulinga mwaya muchima waKalunga, kaha mwatukafwa tuwane vyakulya chipwe kuwana milimo yize nayitukafwa tupwenga najimbongo jakulanda kala vyuma navisakiwa.—Mateu 6:32, 33.
Chikupu vene, nge natushinganyeka havyuma atuhana Kalunga vyakufwana nge likumbi, navula, natujila, najitemo nachitulingisa tumusakwilile chikuma. Chihande chinakavangizaho nachisolola omwo Tengi yetu nahanjikanga navatu hano hamavu.