Uno Mazu aKalunga Analumuka Tahi?
Vatu vamwe veji kushinganyekanga ngwavo atela Mazu aKalunga analumuka. Kapolofweto Isaya ahanjikile ngwenyi mazu aKalunga “nawelilanga haya myaka yosena.” (Isaya 40:8) Uno tunahase kufwelela ngachilihi ngwetu mazu aKalunga kaalumukileko?
Kalunga akwechi ngolo jakukinga Mazu enyi mangana atwaleho lika kupwa amuchano. Kushikulu, malunga vaze vapwilenga vaka-kunungulula mazu valavilenga vasona vaze vapwilenga hamikanda yajila kuchina kuhakilako chipwe kufumisako mazu amwe. Chipwe ngocho, vatu kavakupukako, echi chikiko chalingishile vaka-kunungulula mazu vamwe valimbenjeko chindende.
TUNAHASE KUFWELELA NGACHILIHI NGWETU MAKUMBI ANO MUMBIMBILIYA MULI MAZU AKALUNGA AKWOLOKA?
Kwatwama jimanyusikilipiti jakushikulu jajivulu jaMazu vasoneka Ajila. Nge manyusikilipiti yimwe yinahanjika vyuma vimwe vize vinalimbalaka chindende nayikwavo, kaha jimanyusikilipiti kana vajesekesele kujimanyusikilipiti jeka mangana vawane muchano uvene. Hakusaka mulinangule vyavivulu, talenu chihande chakwamba ngwavo, “Has the Bible Been Changed or Tampered With?” hakeyala yetu ya jw.org.
Chakutalilaho, achishinganyekenu hamikanda yakuvunga yakushikulu yize vavuluka ngwavo Dead Sea Scrolls, vawanyine mumena akusendeveka mu 1947 kuli vatu vavuluka ngwavo vabedouins kwakamihi naKalungalwiji waKufwa. Hali eji jimanyusikilipiti vasonekele kushikulu hatwama vihanda vimwe vyamuMazu vasoneka Ajila vasonekele kafwe myaka yakuzomboka 2,000 kunyima. Vasachitetahundu muvyakuhehwojola vakekesele eji jimanyusikilipiti jakushikulu nakujesekesa kuMbimbiliya tuli nakuzachisa makumbi ano. Uno vyuma muka vawanyine?
Vaka-Kulinangula vawanyine nge mazu atwama muMbimbiliya tuli nakuzachisa makumbi ano, alitombola namazu atwama mumikanda yakulivanga yakushikulu. * Chikupu vene, kukekesa mujimanyusikilipiti jakushikulu, chinatukafwe tufwelele ngwetu mazu tweji kutanganga muMazu vasoneka Ajila, apwa chikupu mazu aKalunga vahwima aze vasonekele hakavanga. Twafwelela ngwetu Kalunga nalame muchano wamumazu Ajila amuMbimbiliya mangana etu makumbi ano tuwijive.
Shikaho, tufwilenu kutanga Mazu aKalunga namuchima wakusuuluka nakufwelela ngwetu vyuma tunakutanga vyakwoloka. Tukekesenu jino vyuma tunahase kulinangula kuli Kalunga kuhichila muli vapolofweto jenyi.
^ par. 7 Mikanda yakuvunga yaDead Sea Scrolls yize vasonekele kuli Geza Vermes muChingeleshi, lifwo 16.
Pamo Nauzanga Nawa
KAPOSHI KAKUTALILA
Mbimbiliya Yayovokele Kuli Vaka-Kole Vaze Vasakile Kuyalumuna Mweka
Vatu vamwe vakuhona kashishi vanesekanga kwalumuna mujimbu wamuMbimbiliya. Uno vilinga vyavo vyavipi vavihonesele ngachilihi?
ESSENTIAL BIBLE TEACHINGS
Uno Tunahase Kufwelela Ngachilihi Ngwetu Mbimbiliya Yapwa yaMuchano?
Kachi nge mwenya-Mbimbiliya apwa Kalunga, kaha yatela kulihandununa namikanda yeka yize vasoneka kuvatu.
DOCUMENTARIES
Vamwene Mbimbiliya Kupwa Yayilemu—yaChihanda (William Tyndale)
Zangi yenyi yakuzanga Mbimbiliya vayimwenenenenga mumilimo yenyi azachilenga, yize yili nakutunganyalisa.
