CHISHINA CHAMUMBIMBILIYA: “Litwaminenu kulizakaminanga hakuyoya chenu.”—Mateu 6:25.

Uno kuhona kulizakamina chalumbunukila mulihi? Yesu ahanjikile mazu kana omu ahanjikile Chihande ChahaPili. Ndikishonali yimwe yize yahanjika haMbimbiliya yamba ngwayo, lizu lyachiHelase valumuna ngwavo “kulizakamina” lyalumbununa “omwo eji kwivwanga mutu nge nahutu, chipwe ali nazala naukalu weka uze mwamona mukuyoya chenyi.” Kakavulu vatu veji kulizakaminanga havyuma navikasoloka kulutwe. Kachapwa chakuhenga kushinganyeka havyuma vyakumujimba nahachiyoyelo chavatu twazangako. (Wavaka-Fwilipi 2:20) Oloze omu Yesu ahanjikile ngwenyi, “kanda namulizakaminako,” apwile nakukafwa vaka-kumukavangiza valihende kumuchima wakulizakamina chikuma havyuma navikasoloka hamene vize navivalingisa vahone kupwa vakuwahilila.—Mateu 6:31, 34.

Uno kuhona kulizakamina nachitukafwa ngachilihi makumbi ano? Twatela kukavangiza mazu ahanjikile Yesu. Mwomwo ika? Mukanda umwe wamba ngwawo nge mutu mwalizakamina chikuma, wongo weji kuzatanga chikuma, kahechi cheji kulingisanga mutu “avize musongo wajimbandu mujimo, namusongo wamuchima naashima.”

Yesu atulwezele chuma chachilemu chatela kutulingisa tulitwamine kulizakamina. Ahulishile ngwenyi: “Iyaze muli enu hakulizakamina mwahasa kuhakila kuvite yimwe kutando yenyi yakuyoya?” (Mateu 6:27) Kulizakamina kacheshi kuhasa kuvulisa myaka yetu yakuyoya chipwe kumana chikalako. Kaha nawa vyuma vize tweji kulizakaminanga, kakavulu kavyeshi kusolokako. Mutu umwe alinangula chikuma ambile ngwenyi: “Kulizakamina vyakulutwe chapwa kaha kulishina. Kakavulu vyuma vyakulutwe tweji kulizakaminanga kavyeshi kupwa nge muze twashinganyekeleko.”

Uno tunahase kuhonesa ngachilihi kulizakamina? Chatete, fwelelenunga Kalunga. Kachi nge Kalunga eji kulisanga tujila nakuvwika jitemo jisoloke kanawa, kutala keshi kuhasa kuhana vyuma vasakiwa kuli vangamba jenyi vaze vahaka vyuma vyakushipilitu kulutweko nyi? (Mateu 6:25, 26, 28-30) Chamuchivali, shinganyekenu vyalelo. Yesu ambile ngwenyi: “Kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina.” Chikupu vene, munahase kwitavila ngwenu “likumbi hilikumbi lili naukalu walyo.”—Mateu 6:34.

Nge natukavangiza mazu aYesu, kaha tunahase kulikinga kumisongo yize yeji kwizanga mwomwo yakulizakamina chikuma. Kaha nawa natupwa nakuunda chize vavavuluka muMbimbiliya ngwavo “kuunda chaKalunga.”—Wavaka-Fwilipi 4:6, 7.